بخصوص الواتس لكن صدقوني مهم مهم جدا

السلام عليكم ورحمة الله وبركاته
اشكر كل من دخلت موضوعي واحبكم في الله ...واذااحد متضايق من كثر الكلام عن الواتس اقول لها (هذا شي موجود في حياتنا نستخدمه بشكل يومي فطبيعي يكثر الكلام فيه ..واقري الموضوع الى النهايه صدقيني مهم جدا )...


طبعا مافي احد منا الا مضاف عنده في الواتس رقم لواحد اواكثر من هذي الفئه ...(راقي ..طبيبه..مسؤل كبير ...مستشار ... ابوك ...امك ...رقم غريب ابغى اتعرف مستقبلا على صاحبه ...انسانه بيني وبينها زعل وحفظت الرقم من باب الحذر ...انسانه رائعه قصرت في التواصل معها...ناس نااااااادرا ماتتواصلين معهم ...شيخ ...الخ

وتجيك رساله فيها طلب دعا لمريض (وهذا الحال هو الغالب ) او طلب نشر رقم للدعايه او البحث عن مفقود اواواو. الخ سواء الرساله جت من غريب او قريب ....وتكون تتضمن عبارات مثل (( الله لايسامحك اذا ماارسلتيها لكل الي عندك وراح يجي يوم تكونين في نفس الموقف .....او الله لايحللك ولايبيحك اذا قفلتي الرساله وانتي ماارسلتيها للجميع وراح يجي يوم تكونين تحت التراب ....او سألتك بالله او بالحي القيوم ...او ترى الامانه تبراة منها السموات والارض والجبال وهذي امانه في رقبتك ) واحيان تنسى تطلب من احد يدعي لها


انا مع استخدام التقنيه لتكاتف المسلمين وقت الشدائد وطلب الدعاء للمريض وانهم يكونون كالجسد الواحد اذا اشتكى منه عضو تداعى له سائر الجسد بالسهر والحمى لكن بهذا الاسلوب ؟؟؟؟ بالعكس راح تنفر الناس منها وتصرفهم عن الدعاء لها او للمريض وبعضهم مايدعي لان كل همه يرسلها سواء تعظيما لله او تخلصا من الامانه ولا اظن يرسلها للجميع لان زي ماقلت في فئات ناااادرا مانتواصل معهم ومستحيل ارسل لهم رساله بهذا الشكل

وبعدين كلمة ان الامانه تبراة منها الجبال لو رجعنا للايه الكريمه تقلين المولى جل في علاه يقول (إنا عرضنا الأمانة ) شوفي الاسلوب البليغ واللطيف ...الله سبحانه مااجبرهم عرض عليهم وهم ( فأبين أن يحملنها ) يعني بعد العرض ابو ...اجي انا اربط الامانه في رقاب الناس وطبعا قوله تعالى (وحملها الانسان ) مهو القصد اجي اقول كلام واجبر الناس يرسلونه لا ارجعو للتفاسير وشوفو المعنى الصحيح


وبعدين السؤال بالله لازم يكون بطريقه مؤدبه فيها تعظيم لله سبحانه وتعالى مهو نحرج الناس بهذ الشكل ووننشرها في جوالات الناس سواء مسلم او كافر او فاسق او صغير او أمي مايعرف يقرا ....الخ ...ونجبر اخواننا المسلمين واحيان يعجزون عن تطبيق (من سأل بالله فأجيبوه )


اما ندعي على الناس بان الله لايسامحهم ولايحللهم ونطلع انفسنا كأننا مظلومين بأي حق؟؟ بالعكس يمكن توصل لانسان وهو في قمة الحزن والكرب والضيق وتزيده ويقول حسبي الله على من ارسلها الله لايسامحه



بعض الاخوات بتقول صدق مايحس بالنار الا واطيها اقول هذا صحيح وليش نجبر الناس بالقوووووه والدعاء عليهم علشان يحسو فينا


والله لو ارسلناه بصوره اكثر هدوء وبدون ماندخل السؤال بالله ونطلب الدعاء ونقول جزا الله كل خير من نشرها ....كان الناس دعو من قلوبهم وتعاطفو ولانسيو في صلاتهم وذكرو بعض وتمنو يعرفون باقي اخبار المريض او غيره كذا يكون التكاتف

فكرتي يابنات اذا جتنا رساله زي كذا نعدلها قبل مانرسلها ...ايش رايكم ؟

اسال الله جل في علاه ان يشفي مرضى المسلمين وان يقضي حوائجهم ويفرج كروبهم ويرحم امواتهم ويهدي ضالهم ويغني فقيرهم ...ويارب ترزق بنات المسلمين بالازواج الصالحين وتصلح الازواج لبعضهم والذريه لوالديهم
يارب فرج كرب اخواننا المستضعفين في كل مكان ودمر اعدائك واعداء الدين