بخصوص :: موضوع الاخت اختصار الطفولة ،،،

http://forum.hawaaworld.com/showthread.php?t=855394





احنا بدولة الامارات ما نبالغ بسالفة الماركات ( صح بتلاقين فئات كل لبسها ماركات ، بس اغلبه من التقليد الفئة الاولى ) ، صح البنات كشيخات ولبس وحركات وسوالف ، بس ترى والله العظيم لبس الكشخة يكون من صناعية عجمان ، ومن سوق الوصل ونايف والكثيييييييييير من الجنسيات الخليجية طايحين هنيه ، لانج بتلاقين كل الي تبينه من وإلى ،، وغير هذا الالوان الي تبينها بعكس الماركات بالغالب الوان فاقعة ولا اسود وابيض من ايام الستينات وعفا عليها الزمن ، وانا من النوع الي بالمرة ما اشتري ملابس ماركات ،، عندي سياسة بحياتي البس شي حلو ولو من العادي ، بدل ما تكلفني بدلة الماركة الف درهم اشتري لي من السوق العادي 300 درهم واطلع كأني اميرة والله

والاقي صنادل بالهبل بالسوق على 100 - 80 درهم بس
واحلى مليون مرة من الماركات ، وفيه بالنت تلاقين محلات تبيع ( مثل محل اينما)



اما بموضوع العطور ، على فكرة صحيح كلام البائع الي قالج انه الاسعار على حسب الايجار

انا رحت الكارفور مرة وكنت حابة اشتري موبايل N82 ، توه نازل بالسوق
لقيت سعره 2380 درهم !!! تخيلي ، والحمدلله اني اتصلت بمحل مشهوووووووووووور في دبي لبيع الموبايلات ( وهالمحل معروف انه اسعاره شوي فوق ) وتخيلي كم لقيت الموبايل ؟؟؟
والله العظيم ، لقيته على 1975 درهم وتوكلنا واشتريناه بس انتي شوفي فرق السعر على حسب المحل ، ومرة رحت محل دوم اشتري عطورات ماركات من عنده وسوالف مكياج والامور هذي ، والله اني دخلت محل ثاني اقسم بالله الاسعار زيادة عن هالمحل فوق 150-200 درهم!!! ليش حنا نشتغل ونكرف( يعني نتعب ) عشان نرمي فلوسنا ؟؟ ؟ولا خلاص بطرانين وما نحب نلف السوق ، ونشوف وين الاماكن الجيدة وبالاسعار الممتازة

خليكم واعيين بأمور التجارة والسوق ، تراه كله نصب ،، واعطيكم مثال بسيط على هالشي :

علبة الدخون ( اقراص البخور ) نشتري العلبة على كم ؟ فيه انواع توصل لحد 200 درهم اوكي ، بس تعالي جربي وسوي هالشي بالبيت ( وترى طريقة الدخون مرة سهلة وانا مستعدة اعلمكم اياها ) تخيلي بتشترين الاغراض لصنع 12 علبة دخون بهالــ 200 درهم


ومشكورين على المتابعة ،،