بداية حياتي .. @bday_hyaty

عضوة فعالة

بداية حياتي .. والخادمة الاندونيسية .. حسبي الله ونعم الوكيـــل عليها ..

السلام عليكم وورحمة الله وبركاته ..

أخواتي ..

اكتب لكم قصتي وأنا كلي حزن .. ولكن ارويها لأخد العبرة منها ..

تقريبآ صارلي 8 أشهر متزوجة .. وبعد ثلاث أشهر كتب الله لي الحمل ..

وكأي حامل حسيت بتعب وارهاق .. بس ما حاولت ابين بس عشان ما استعين بخادمة .. لأني ما أحب حد يخدم زوجي غيري ..

المهم .. الله ما كتب لي تمام حملي .. وسقط .. وكنت وايد تعبانة .. نفسيآ وجسديآ ..

وكنت ما ابى اخلي زوجي بروحه في البيت وانا في بيت أهلي ..

ورجعت بعد الحاح .. بشرط انه اييب لي خادمة تساعدني ..

وقالي انه اهله عندهم خادمة وايد زينه وكبيره في السن وما يحتاج اعلمها شي .. وفعلآ في بيتهم ما شفت منها الا كل خير وكانت تبين انها وايد تحبني واني كاسره خاطرها ..

بس ما كنت اخليها طول الأسبوع عندي .. يعني يوم ما احتاجها اطرشها بيت عمي ..

بعد ما يت هالخادمة تقريبآ بشهر حسيت بضيجة .. بعدين قلت يمكن هالاحساس لأني انا في الاساس ما اباها عندي ..

حاولت اتغلب على نفسي بس ما قدرت .. بعدها زادت حالتي ..وكنت مصرة بأنها مجرد هواجيس ..

كرهت زوجي وبيتي .. وبخاصة غرفة نومي احسها قبر مب غرفة ..

ونفس الحالة صابت زوجي ..

صارت حياتنا مأساة واحنا مب حاسين فيها ..

لدرجة اني اتصل فيه أقوله سير بيت أهلك .. وأنا بسير بيت أهلي ..

ويوم اطلع من بيتي نفسيتي وايد ترتاح .. وارجع ألوم نفسي أنا ليش سويت جيه ..

واعتذر له .. وبس نرجع البيت ترجع الحالة الأولية ..

صار يكره غرفتنا .. يرقد في الصالة .. وأنا في الغرفة ..

ولا العكس .. بس المهم ما نتيمع في مكان واحد ..

وهو اللي كان ضد فكرة الزوجة في غرفة والزوج في غرفة ..

الحمدلله على كل حال .. على كل هالظروف محد من هلي ولا من هله يعرفون بالسالفة ..

بس كانو يستغربون اني يوم أو يومين ما أشوفه ابدآ ..

من عشرين يوم تقريبآ عمته اتصلت فيه .. تقوله أنا وايد خايفة عليك ..

وأباك تسير عند مطوع ..

قالها ان شاء الله يوم بحصل فرصة وما كان مهتم بالموضوع وايد .. يقولي عمتي وايد تخاف من الحسد ..

وما اهتمينا بهالموضوع ..

يت عندنا البيت وقالت شوفي .. انتوا ما سمعتو كلامي بس أنا بخبركم ليش أنا قلتلكم سيرو عند مطوع ولا ييبوه البيت عندكم ..

تقول صارت تحلم بأنها اتيي غرفتنا وتشوفها وصخة .. وتكرر معاها الحلم أكثر من مرة ..

ويوم سألت قالولها حد مسوي لأهل الغرفة سوا ( سحر ) .. ومحطينه في الغرفة ..

المهم .. استنكرنا الموضوع .. وقلنا منو اللي بيسوي لنا .. ووين بيحطونه وأنا مهتمه الحمدلله بتنظيف كل زاوية فيها .. وحتى لو موجود يمكن شليته وأنا ما اعرف ..

المهم قالت أنا بييب لكم مطوع ..

يه المطوع الله يجزاه كل خير يارب .. وقالنا بأنه الخدامة هي اللي مسويه الطب ..

وداستنه في غرفة النوم .. عندي ارفف في الغرفة محطتنه تحت الرف الأخير بشكل ابدآ ما يبين ..

محطيه بلاوي في هالطب حسبي الله عليها ..

وسبب هالطب .. ما تباني احمل .. من جيه كانت تحاول تفرق بيني وبين زوجي ..

ويوم سألتها أم زوجي ليش جيه تسوين وأنتي تصلين وتقرين قرآن وهالشي حرام ..

بكل برود ردت عالسؤال .. أنا صرت كبيرة في السن وما اتحمل ازعاج الأطفال .. واذا زوجة ولدكم حملت أنا اللي بتأذى في أطفالها .. اتخيلو ..

زوجي - الله يحفظه - وايد متأثر .. ومو مستوعب الموضوع .. يقولي احنا في حلم ولا في علم ..

والحمدلله ما كانت عندنا في البيت يوم المطوع قالنا انها السبب .. لأنه زوجي عصب وخفت يسوي فيها شي ..

وحلفته بأنه ما يروح لها ولا يسوي فيها شي ..

وعلى طول حجز لها عمي وسفرها ..

هاي قصتي مع الخدامة الاندونيسية اللي كنت مجبره بأنها تكون عندي في البيت ..

حسبي الله ونعم الوكيـــــل .. والله شاهد علي اني ما قصرت الحمدلله في حقها .. كنت اعاملها أحسن معاملة .. وعمري ما غلطت عليها ..

بس هي جازتني ببلاويها ..

اسمحولي عالاطالة ..

ولا تنسوني من صالح دعائكم ..

تحياتي لكم ..

يلزم عليك تسجيل الدخول أولًا لكتابة تعليق.

تسجيل دخول

لمارا22 • 18 سنة

الحمد لله على العافيه

لكن اهم شئ فتشتوها قبل لا تروح؟؟!!
وبصراحه المفروض انها تروح بدون ماتعرف انكم ناوين تسفرونها ولا تاخذ شئ من اغراضها
وتجيبون لها ملا بس جديده تلبسها قبل لا تروح

انا ما ودي اخوفك لكن فيه وحده مثل حالتكم
الشغاله كانت حاطه لهم السحر بطرف الملابس من تحت
وبعد مافتحوا السحر سفروها
وبعد سفرها ارجعت لهم الحاله مره ثانيه
علشان كذا دايما نقول الشغاله مل تروح بملابسها ولا اغراضها الا بعد التفتيش الدقيق

وارجع واقول الحمد لله انكم لقيتوا السحر
روحوا اخذوا وعمره واشكروا الله على انكم ارتحتوا منها ولقيتوا السحر
والله يسهل لكم اموركم

montreal girl • 18 سنة

هلا اختي ( بداية حياتي)
اولا ساقول الحمدلله رب العالمين انكم اكتشفتوا الموضوع مبكرا ...الي يتوكل على الله عز وجل فهو حسبه و ما ممكن يتركه للمجرمين الي مثلها ( حسبي الله عليها )
تأثرت جدا بقصتك و فيها الكثيير من العبرة ...انا بالنسبة لي ما عندي شغالة و لا يمكن اجيب وحدة لاني اكرهم و ما برتاح بوجودهم ابدا ...و لكن اهلي عندهم اندونيسة و مغلبتهم كتييير و قبلها كانت وحدة و طلع منها بلاوي الله ينتقم منها سرقت مبلغ كبيير جدا من غرفة امي .. و اشياء اخرى كثيييييرة ... و الي قبلها و الي قبلها كلهم سيئييين جدا و بيحسدوا اهل البيت و خصوصا ست البيت !
و كلنا نعرف قصصهم و بلاويهم ! بس في اس ما بيقدروا يستغنوا عنهم لانهم تعودوا على وجودهم او لاسباب صحية و ظروف خاصة مثل حالتك مسلا !!!
بس انا لا افضل ابدا لانه وحدة من بين 100 ممكن تكون منيحة !
الله يعينك على هذه التجربة و الحمدلله انها اصبحت ذكرى ..
شكرا على الموضوع المهم و الي فيه درس لمن يعتبر !

غلاالروح • 18 سنة

شكرا على الموضوع المهم و الي فيه درس لمن يعتبر !

سكونة • 18 سنة

غلاالروح :

شكرا على الموضوع المهم و الي فيه درس لمن يعتبر !

شكرا على الموضوع المهم و الي فيه درس لمن يعتبر !

**jana** • 18 سنة

سكونة :

حمدالله على السلامة و الله يحمينا