بدايتك بالطبخ

السلام عليكم حبيباتي الغاليات
والله احس انكم خواتي ربنا يجمعنا على طاعته
بكتب لكم موضوع توني تذكرته جا فبالي ماعرف ينكتب بهالقسم ولا بغير مكان المشرفات اعرف
بكتب لكم عن بداياتي بالطبخ
اول طبخة او محاوله طبخ كنت خامس ابتدائي يعني عمري يمكن 10 سنوات كنا تونا عازلين بيت وحدنا عن بيت اجدادي مدري امي وين راحت وانا طبعا الكبيرة عندها وقمت اسوي لهم اكل لقيت امي مطلعه دجاجة وانا تليقفت وجيت اسويها المهم جيت اقلبها يمين يسار ماعرف كيف اقطعها وجيت لعبت بها لعب شرحتها تشريح لي ما جت جارتنا وقالت انت ايش تسوين قلت اطبخ غدا و(ربنا يذكرها بخير اسمها ام عزاوي) وفطست ضحك وقعدت قطعتها وطبختها وقالت لي بس طفيها ولاتجين يم الطباخ لاتحترقين سبحان الله كيف كانت الجيرة والجيران وجت امي وزفتني رزاله ع عملتي
وبعدها ضليت في محاولات مرة اسوي بيض الى انا صار عمري 14 او 15 كنا وقتها حصار بالعراق تعرفون وكل شي ماكو السكر نجيبه كيلوات والحلويات الي تنباع كلها بالتمر والطحين الابيض والبيض كله قليل سبحان الله الحمد لله خرجنا وين كنا ووين صرنا الحين بطرنا وصرنا وين بس ماكو لابركة ولاطعم لكل شي
المهم
كنت اسوي حلويات لاخواني اقوم الظهر بالصيف بعز الحر ومطبخنا يشوي شوي من الحر واخبص بكيفي كيكة من حرمت عمي انقلها ولا شي من بنات خلاتي انقل واكتب واجرب والله اشياء اذكرها تفطس ضحك مدري شلون كنا نبلعها واحط الوان كان ابوي يجيبها لامي من خوية عطار مرة سويت حلويات مدري اشلونها حطيتها بالمجمدة الا لونها راح مدري شلون للحين اخواني يذكرونها ونقعد نضحك يقولون تذكرين كيف كنتي تسوي لنا انت ووصخك وعرقك داخل حلوياتك بس كنت وقتها واثقة من روحي
مرة كان افتتاح جامعنا ابوي سواه يم البيت وقمت سويت كيك بالصياني مالت التقديم كيكة اش كبرها وزينتها مدري بايش يمكن بياض بيض وسكر بدون طحن والوان شربت وسويت كم وحدة ووديتها وكل الجيران بعدها جابو لي مقادير وقعدت اسوي لهم هذا يمكن كان بال97 اوف واشكال من الذكريات
كنت مايوم سويت تمن(رز) الا حرقته والمرق اسوي باميا او باذنجان وكله مطوف القدر وحدة المرق وحدة ماكو تجانس بس ماكانت امي تخليني الا لما يكون ابوي مو موجود واخواني خطية ياكلون مايقولون شي وكنت لازم هم يعاونوني واقعد ساعات اسوي كنه اختراع طبعا ماكنت اطبخ بس بالعطله الصيفية كنت حيل شاطرة بالمدرسة .اشكال القصص والحين بيتي ومطبخي واجهزة حديثة سبحان الله الحمد لله والمنه لك يارب ديمها نعمه علينا واحفظها من الزوال وارزقنا رزق حلال طيب
هذي ذكرياتي انتو سولفو لي عن ذكرياتكم او اي شي عن بداياتكم بالطبخ
ياريت انكم ماتفشلوني وتكتبون اي شي يجي فبالكم
اختكم ام فنتش