بدك كل شيء يتحقق.. تعالي احكيلك السر

السلام عليكم رحمة الله وبركاته
بداية يسعد اوقاتكم
ثانيا قبل لاكتب موضوعي..اللي هو وعد برقبتي احكيه ولكن الظروف منعتني والحين رح لوجه الله انشره
قبل كل شيء. حتى ما حدا يحكي اني بفتي او بعمل في بدع.... انا كتبت موضوعي بداعي التجربة فقط..لربما يكون شخص بحاجته... وديننا واسع وربنا اكرم الاكرمين
انا قبل كل شيء رغم العلم والاهل والجمال... انا انسانة بسيطة...حظها بالدنيا قليل.. والمسؤولية كانت عليها في كل شيء بحكم السن والعيلة الكبيرة... كنت دايما احس نفسي غير عن باقي الاطفال.. وحتى بفترة المراهقة... جدية بحدود التعقيد ومرحة بحدود الهبل... ما كنت ارسي على مزاج واحد بس دايما كنت اسرح بهالدنيا بالسما بالارض..بالاموات ..بالحياة ككل.. ببكيني اني اشوف طفل يتيم يتعذب او امراة مسكينة مظلومة خاصة من رجل.. او اهلها.. كانو دايما يحكولي انتي حساسة بس بقرارة نفسي اعرف اني انسانة بقلب رحيم... الطيبة ما كانت ضعف بالنسبة لي..ربي كان دايما معي..ووالله ما في اشي تمنيته الا ربنا سهلو الي بدون ما اطلبه..ليش.. لاني برد بحكي طيبة..وبعمري ما اذيت انسان ..مين انا لاسب عباد الله..او استحقرهم او أاذيهم..مين انا.. فيحكيلكم كنت دايما احس بمشاعر غريبة.. خنقة من هالحياة وبنفس الوقت امل انه رح يتغير كل شي للاحسن لانه الله معي...
بمرحلة من المراحل بعد ما انهينا تعليمنا وبلش الفراغ يلعب دوره ... صرت مثلي مثل اي بنت . بلاش ..مثل اختي اللي اصغرمني وتزوجت.. نفسي افتح بيت واستقل وابعد عن ضغوطات اهلي علي.. لكن شووو .اهلي رفضو فكرة الزواج لاسباب انا ما بدي احكيهاا.. هاي اول باب تسكر في وجهي وكثير سببلي الم من جهة الحرمان ومن جهة التفرقة... سلمنا امرنا لله وحكينا بدنا نتوظف... كمان رفضو الموضوع الا بشروط ..بديهيا رح تفهموها وكمان رفضت..وهاي الباب الثاني تسكر بوجهي... طيب شو العمل.لا زواج ولا وظيفة...بس خدامة بهالبيت... ظليت على هالحال الزواج حوالي 8 سنوات ظلم.. خلالها تقربت من الله وصليت وصمت وقمت بالنوافل..بس ما تحقق مرادي ..طيب ليش....يا رب جل جلالك امرتنا بالقران ندعوك. طيب ليش ما استجيب لي..لحد ما بحثت وبحثت اكتشفت انه دعائي كان ناقص..كان بيلزمه اليقين.. انه تعبدي الله وكأنو امامك.والحاجة الثانية انك تعبدي الله وتدعيه لانه الله..يستحق كامل العبودية..مش لانو بدنا حاجة منه... فبناءا على هالكلام .. اتخذت مبادىء ك جدول يومي امشي عليه يوم يوم لعله وعسى ربنا يغفر لنا
بكرر هالمبادىء مجرد تجربة وليست فتوى
1. اذكار الصباح والمساء.. يا لجمالها..ويا لسحرها ووقعها في الذات.. تصحى من النوم تدعي يهالاذكار وتسلم امرك لله..وتنام وتسلم امرك لله...حياتك كلها بأمر الله..شو احسن من هيك
2. الذكر بشكل عام..واهمها
لا حول ولا قوة الا بالله
سبحان الله الحمد لله..لا اله الا الله..الله اكبر...
سبحان الله وبحمده..سبحان الله العظيم.
لا اله الا الله وحده لا شريك له له الملك وله الحمد وهو على كل شيء قدير
سبحان الله وبحمده عدد خلقه ورضا نفسه وزنة عرشه ومداد كلماته
حسبي الله ونعم الوكيل(تفويض كامل لله)
3. الاستغفار... اقسم بالله انه معجزة وبه تتحقق المعجزات
وفي 3 صيغ كنت اتبعها
استغفر الله..(كنت استغفر 17 الف مرة باليوم..بالسبحة الالكتؤونية واقل)
لا الا الا انت سبحانك اني كنت من الظالمين(دائما... وخاصة بعد الصلاة احكيها 3 مرات وبعدها ادعي لانه مستجاب)
واستغفر الله العظيم واتوب اليه
4.القران..
بداية حفظت منه 5 اجزاء.. ومع قراءة يومية..وبصراحة كنت احب سورة يس..هالسورة بتحنن القلوب القاسية بشكل عجيب...والقران كله شفاء اجمالا


5.سورة البقرة...
بحبها بعشقها هالسورة..ومن حبي لها حفظتها في اسبوعين فقط والله شاهد على ما اقول ما شاء الله..وبلشت كل يوم اسمعها عن غيب وارددها وظليت هيك ما يقارب 37 يوم وتحقق دعائي... يعني انا ما كان في بالي احدد 40 يوم مثل ما في قصص بالنت..كنت رح استمر ع طول..بس الدنيا غرتني بعد ما استجيب دعائي...
6. قيام الليل..فضله عظيم وبامكانكم تشوفو القصص في فضله..بس اهم شي كنت اقيم الليل بسورة البقرة كاملة وادعي
7.والاهم الصدقة... .. مياه للقطط. للاشجار.اكل للعصافير على الشباك على سطح البيت... الاكل اعمله لاهلي بنية الصدقة.. فلوس هون وهون.ملابس... ركعتان الضحى صدقة بحد ذاتها والكثير الكثير
8.ادعو الله بعمل صالح انا عمتله..
9.بر الوالدين..رغم انهم ظلموني واحيانا يظلموني للليوم والتفرقة زادت بس ما زلت بحبهم ومستعدة ابوس رجليهم
10.المهم مهم جدا... الدعاء بيقين.. انه ربنا امامي الحين الحين وسامعني وانا بنتظر منه الاجابة بفارغ الصبر
11. تحريت اوقات الاجابة خاصة ايام الجمعة
12. صلاة الحاجة والاستخارة دايما
13.الصلاة على النبي..خاصة الصلاة الابراهيمية..وهما مفتاح الفرج بعد الصبر ومفتاح كل رزق
14..ادعو الله باسمه الافضل..الله.. الحي القيوم.. الرحمن الرحيم..واكرم الاكرمين وذو الجلال والاكرام
المهم والله استمريت على كل هالحاجات الاساسية.وشفت منام بالرسول عليه الصلاة والسلام يبشرني يالمنام ويحكيلي رح يتحقق اللي يدك اياه ما تخافي.. وبنفس الوقت بس صحيت فتحت المصحف..والله وقعت عيني على الاية ..اتى امر الله فلا تستعجلوه..يالله على الطمأنينة والبشرى الطيبة..اقسم بالله بعدها ب 10 ايام اجى نصيبي على احن واطيب خلق الله بشهادة الجميع..ولو اذكر اسمه رح تعرفو وتعرفوني كمان بس عذرا لظروف قاهرة ما اقدر .. وتوظفت والله يا ربي يعد صبر 8 سنين عشان الزواج و5 سنين لاجل الوظيفة توظفت... يومها سجدت لا تلقائيا لانه وعملت احلى عرس وعشت احلى ايام وربنا رزقني يالحمل..يااااااه والله كنت في جنة جنة. .. عشت اجمل سنتان بعمري خطبة وزواج ورحلات وطشات وذهب وحب الناس وووو..يعني كنت محسودة على هالعيشة.. ولكن للاسف غرتني الدنيا..ما عدت اقرا قران ولا اقيم الليل.وحتى استغفر نادر.. ربي يعفو عني
النتيجة.. توفى زوجي ... خسرت بيتي وكل شيء معه.. وخسرت وظيفتي.. وطلعلي اعداء بدون سبب حتى من اهلي..كل شي راح بغمضة عين لاني تكاسلت لدرجة هالناس مشكوك بامرهم انهم سببولي سحر وباثبات.بس مش قادرة اتاكد.او بالاحرى ما عاد يهم لانه خلص اللي صار صار..حسبي ربي عالظالمين والظالمات
الحين اناةاعتبره عقاب وبنفس الوقت ثواب..خسرت بالدنيا بس ربي رح يباركلي في الاخرة واكبر دليل رؤيتي اني مرافقة النبي في الجنة..الللهم لك الحمد واشكر الله ليل نهار رغم الالم انه اختارني كون ارملة وام ايتام..ربي بحبني ولهيك ابتلاني لاخد عقابي بالدنيا او يرفع درجتي في الاخرة..
في الختام
نصيحة لي..لا تعبدي الله على حرف.. تقربي من الله وما تشكي وتتذمري الا له.. والله انه البشر ما بفيدو انفسهم ذات نفسهم..كيف رح يفيدوكي... انسان بتحكيلو صلي لله بكرة ربنا بعاقبك بالنار.. بحكيلك انا حر وما تتدخل فيي.. ويمكن يشتمك..مثل هيك اصناف ما بتقبل حتى النصيحة وما بتفيد حالها..كيف رح نستفاد منها.. الانسان اناني بطبعه..لهيك توحدي مع الله وانسي كل الناس وكل العالم... سواء عندك حاجة او لا من الله ..وكلنا نحتاج رحمة الله...ارضي الله وان رضي عنك رح يعطيكي كل شيء... والحياة فانية يا جماعة..يمكن انهي كتابتي اموت او انتي يا القارئة تموتي.. الاجل بينتهي ولكن عملك باق معك ليوم القيامة..وكفى بالموت واعظا وبالقبر وعذابه عبرة
اتمنى وصلت فكرتي.. ادعولي ربنا يثبت قلبي على الايمان ويصبرني على فراق حبيبي وزوجي.. وانه يباركلي في حياتي الباقية... وسامحونا على الاطالة
شكرا