بدون مجاملات .. ليه مانتقدم أكثر في خدماتنا في المسجد الحرام ومكه الله يشرفها ؟؟

السلام عليكم ورحمة الله


الحمدلله أن وفقنا الله لدينه وجعلنا مسلمين



ياخوات موضوعي من القلب ,, وربي شاهد على النيه ..

ملينا من المجاملات حتى وصلنا أحيانا لحد الكذب على أنفسنا وغيرنا ...

موضوعي ليس للايجابيات في الخدمات لانها مكتوبه ومقروؤة ومسموعه في كل مكان

والمجاملات أكثر مما نشاهد والتلقين حفظناه أبا عن جد .....


سؤال محيرني :


ليه حرام نتكلم عن سلبياتنا عن الظواهر الغلط في أطهر مكان في العالم ونهاجم غير السعودييين لوو تكلموا بكلمه حتى لو كانوا صادقين وناصحين .... بس يتكلم الواحد بحرف ... نط الكثير الله يخلي حكومتنا ويخلي ويخلي ..

أنا قبلكم أدعي لحكومتنا الله يحفظهم وكل من قام بخير لصالح المسلمين

لكن هناك سلبيات وتُعد كبيره خاصة ونحن في عام 2009 ,,, الناس تقدمت واحنا لسه متأخرين ..



أول الأمور والمزعجة لكثير من المصلين الراكعين الساجدين في المسجد الحرام هو مسأله التكييف وضحالته ...

معقوله أغنى دوله عالميه وحاضنة المسجدين الشريفين والتكييف عندنا الله بالخير

ياعالم جهات في الحرم فيها بس مراااااوح .. ليه أحنا فين ؟؟

الناس بالتراويح في كل سنه بس يغسلوا وجييهم كل شوي .. واللي تمسح عرقها وغيرهم وغيرهم ....

الناس بالملاييين واحنا مراااااوح !!!!!

وجهات يقولوا فيها التكييف والحر كأنك في عز الصيف .. والتوسعه أبرد منها ...

الناس والمسلمين صاروا ينزعجوا من الحر بس مين يسمع ...

أطهر بقعه على وجه الأرض تحتضن قبلة المسلمين ومافيها الا تكييف عادي ومراااااااااااااوح !!!!

ياعالم كيف الناس بتخشع وترتاح .... وكيف العالم تجي من كل بقاع وتشوف هالحر عندنا واحنا أغنى العالم ....

ياخادم الحرمينن الشريفييين ياخير أب ...

لتكن بصمتك مع التوسعه .. التبريد على المسلمين كم سينالك من الأجر والثواااب دنيا وآخرة وذكر حسن .....



الأمر الثاني :

ليه العالم بمكه ماتطورت الا متأخر ... بس الآن نشوف الأبراج والمشاريع الضخمة الباقية يبغالها سنوات ...

الناس تأتينا من كل حدب وصوب .. وطرق المشاة مثلا التي تؤدي للمسجد الحرام مازالت .. كأنها أودية وهضاب ..

حفريات ومستنقعات وشي مرتفع وشي منخفض ومافي طريق مثل العالم مشاة ...

نشوف طرق المشاة في الدول الأوربية كيف هي ..

شوفوا طرق اليابان بس وتنظيمهم .. شي خيالي ....



ونجي كمان للتنظيم

المسلمين بالملاييين .. واللي ينظم المصلين بالعشرات يصرخوا ويصرخوا بطريقة غير حضاريه ولا في فايده ...

أتخيلوا اليابان مسكت تنظيم المصلين كمثال .. ايش ممكن توقعوا تعمل ..

إشارات وتنبيهات وأتوقع توضع قواطع وموانع حديديه تقفل أي مكان يمتلئ .. يعني مثل الحواجر اللي توضع على البوابات ...

أتوقع كل شي ينظم بالريموت كنترول والأجهزة بدل الصراخ والتشرد من مكان لمكان حتى تجدي مكان بين النساء .. خاصة لو جيتي متأخرة من طواف أو غيره ...



أيضا ...

بلد يرتادها الملاييين ولمسجدها الشريف .. ولما العالم تخرج من الصلاة كيف تتصوروا عددهم وتتخيلوا حاجات كل واحد فيهم .... ويحتاجوا أي مكان يقضوا أغراضهم منه ...

وبالأخير مافي الا سوبرماركت ( ابن داااود ) كأننا عايشين في قريه من صغره ...

ليه الأحتكار لوحده ..

طيب يحتكرعلى كيفه بس ليه مايفتح سوبرماركت هايبر مثل جيان أو الدانوب أو كارفور مثلا .. يسع المسلمين ويفك أزمتهم ...

معقوله بمكه مافكروابحاجة المسلمين .. غير ايش تكون فكرة المسلمين والأجانب خاصة عن منطقتنا وخدماتها مثل القرية ..
ليه ماعملنا لها أفضل شي .....



أيضا أسعار الفنادق القريبه من الحرم وخاصة العشر الأوآخر .. ليه مافي رقيب ولا حسيب .. معقوله غرفة ب45 ألف .. وغرف ب18 ألف أرخص حاجة وهي غرفه عادية .... حتى لو كان القادر ياخذها ليه أكل الناس عيني عينك بلا حساب ..

تخيلوا تدفعوا مثلا 3 ألاف أو الفين بالليله وأنت بس تنامي فيها .. يمكن غرفه من ذهب ..



أيضا أين مراقبة المحلات والمطاعم ... كمثال محل الدونات اللي بالهلتون .. تخيلوا يبيع جالون العصير الي نشتريه ب18 من مطاعم بغير مكه .. هو يبيعها ب 30 ريال ..

ليه الغلا .. والاستغلال ..

أحنا مسلمين والأولى فينا الصدق والتيسيير على المسلمين

أيضا كثير مانشوف جهل مركب عند بعض من المسلمين وظواهر مزعجة ..

والله بعيني شفت وحده الله يكرمكم داخل المسجد قريبه من أحد مياه زمزم .. والله يابنات قضت حاجتها وغسلت بماء زمزم وعادي قامت لا أحد نهرها من المسئولات ولا غسلوا وراها ...
غير اللباس ,, مره شفت وحده لابسه بنطلون ضيق وبلوزه مخصره نازله شوي من دول شرق آسيا مابقى أحد مابقق عيونه فيها الا من رحم الله .. مالبست أي ساتر فوق ..

من دول معينه نشوف جهل النساء .. عند الصلاة الشعر طالع عادي الرقبه عادي ..
الأرجل عادي !!!

نوم النساء متسدحات من غير غطاء والرجال ينظرون لهم ..

الجهل في الحجاب وفي الصلاة أهم ركن بالدين
حتى بالوضوء ..
ليه ماتصدر المؤسسات الخاصة بالمعتمرين والحجاج وشئون المسجد الحرام .. كتيبات صغيرة ( أسوة بطباعة المصحف الشريف اللي يوزع بالألآف ) ليه مايوزعوا على أبواب الحرم .. أو على كل مؤسسة معتمرين وحجاج بلغاتهم ..

أو يكون هناك مثلا بكل مكان نسائي مرشدة بلغاتهم .. تركيه باكستانيه وغيرهم ..

للاسف من دول عربيه وتشوفي العجب العجاب




هذا اللي جال بخاطري الآن .. وممكن نكتب أكثر ولعل هناك من يسمعنا وينصح للمسئولين والكثير فيهم ا لخير

أولا واجبنا نعمل لوجه الله

ثم لأجل المسلمين

وليس من السهل أن يأتي المسلمين من شتى البقاع وبأختلاف الثقافات ومن بلاد بعيدة ويشوف وضعنا كأننا متخلفين عن باقي الدول بكثير .. تنظيما ورعاية وخدمااات ....

بلاش المجاملات أو بالأحرى الكذب ... أتمنى تشاركوني وردوا علي لو أنا ماأعرف ...

هو في مكيفات وانا ماحسيت فيها

فيه طرق مثل الناس وانا مامشيت فيها

فيه سوبرماركت كبير يسع بعض المسلمين قريب من الحرم ماشفته غير ابن داود

فيه تنظيم بدون صراخ ( أرحم حلوقهم مساكين ) تنظيم بأجهزة واشارات أو على الأقل بعدد أكبر من التنظيم ويغلقوا أي مكتان يمتلي ..


أو يفتحوا السطوح للمسلمات يوسوعوا عليهم

الله يعافيكم اللي عندها كلام ينفع أو طيب تكتب واللي بتجامل وتكذب لا تكتب ... ملينا

نسمع شي ونعيش بشي آخر ...

أسألكم بالله لو كان المسجد الحرام وهذه الخدمات عند بلد غيرنا ماتكتبوا عن سلبياتهم وتتعجبوا من تأخرهم واغفالهم لكثير من الخدمات


وربي بيحاسبنا على كلمه كتبناها