بدّورة الحلوة :

من الحيا والفشيلة تأخرت عليكم :) ............ موب ام وليام جابت لي على القرزمز حقاق؟؟ تين وتمر وفستق ولوز وشين خلاني اصيح وهئ وهئ... وكنت اقولكم وش اجيب لها هدية بمناسبة عيد الضحية... درّاعة خشتق؟؟ ولا ديرم؟؟؟ولاكحل إثمد... ولاخاتم شرقي (انطقوها طالبتكم بال(دز) )ولافورزي... ولاتولة دهن عود..عاد هذي الي منين بجيبها... طمرت هكاليوم وانا نفسي بطرف خشمي عقب العيد واللي صار بالعيد للمحل اللي جنبنا حيث انه حاطن تخفيضاتن ماصارت ولاجت.. اجل فساتين تهيل العقل على خمسة باوند واربع باوند ؟؟ ماصارت ولا بسوق المجد ذي؟؟:) ولاحتى بالحلة... المهم واطيح لي على هكالبلوفر حق العجيزات الي يهبببببببببل...وعلى خمسة باوند (ابوك يالبخل) ... واروح للمحاسب والاه شايبن يهوجس على نفسه ... بسم الله عظيم الاسم .... ويهرّج نفسه... قلت لكم انا فيه ظاهرة ببرايتن الناس اللي يهرّجون نفسهم ... أدناه اليوم وانا احتري الباص الصبح ...والا تمر من عندي هكالحرمة اللي تقلّب ايدياتها وتضحك وتمر من عند الصرافات والبيبان وتناظر وتعلق على نفسها همين تضحك... يالله الخيرة ادعوا لي ارجع بالسلامة قبل يجيني شين بعقلي اصير اهرّج عمري زيهم... :) ............ اقولكم والا الشايب يهوجس ويسولف سولافتن كاملة ...أي والله ... ويحوس اوراق بيدياته.... واجي احط البضاعة عنده وشكلي قطعت سالفته عليه...:) يالله لك الحمد صدق... ومارفع طرفه لي وكمّل السالفة وهو يقول (موب هنا تحاسبين تحاسبين عند المحاسبة اللي داخل ) حسبت الجملة الاخيرة تبع السالفة حقته... بالتالي مارديت عليه وطلعت بطاقتي وامدها له ....وهو هشوى يرفع راسه ويقول تحاسبين عند ذيك موب عندي... واروح احاسب واشري كيسة اهداء ...عاد رجلي موصيني جيبي كرت ...يقول الكرت عندهم اغلى من الهدية... قلت تبي االصراحة انا اوافقهم بهالشي ...اموت في شي اسمه كروت بس بشرط تصير مكتوبن عليها شين يبكي ... حتى لو ورقة ممزوعة من دفتر ابو اربعين ميخالف... بس مكتوبن عليها احبك يابدورة... ...وامر عاد ادور لي محل يبيع كروت مب كرسماس حامت تسبدي من كروت القرزمز... وهشوى عاد ألقى لي كرت يهبل مكتوب عليه كلمات مؤثرة جدا جدا ...وت دز ثانكس مينيغ... امذا تعني كلمة شكرا... اي والله شكرا يامورين... ياحبيبتي...انتي... ........... وعاد يكتب ربي اقابلها هاكاليوم وانا رايحتن لهايستنغ .. قلت يام وليام وين الناس ...متى تبيني اجيتس... قالت ابد يابنيتي تسان السبت تراي فاضية لاشغل ولامشغلة... ولاهوب مسيرن علي أحد ... قلت ابد اجل السبت الساعة ثلاث بجي اتقهوى عندتس... على طاري القهوة.... راسي يفر لي يومين ماشربت قهيوة حيث انه بدا الدوام... يالله الخيرة... .. ويجي اليوم المشهود واقوم ازين لها كيكة موفن ...واحطها باكواب وتطلع وش حليلها.. ويوم جت الساعة ثلاث واطق المحزم والبس جاكيتي وحجابي وارقى لها وهي تفتح لي .. هالنوبة التسلب موب عندها يالله تخلينا من هالتسلاب وسيرتهن... ماقلت لكم هكاليوم بالحديقة لاعادت طبت علي تسلبه تبي تمسك شنطتي ... انا قلت لكم؟؟؟ واقول لها نو نو نو نو .....وهي تحسبني العّبها ...يالله لاتعيدهن ولاتعيد ساعتهن.. هذي وحدة ثانية عن الشيخ اللي هاجمني كبر النعيمي لاويهاوشني ابونا يقول اثقلي ... عطاك البلا انت وياهن ... ........ وتفتح لي ام وليام وتدخلني ...والا اليوم البيت مرتب....والكشخة وشكلها مبخرتن البيت لو انها تعرف البخور عاد هالنوبة شابتن الدفاية انا حسبتها شابتن حطب دفايتن تهبببببببل تسنها دفاية نار صدقية... والاها وشو؟؟؟ماخلوا شي هالانغليز.. دفاية غاز... بس مصممين شكلها زي الحطب ويطلع منها نور وحرارة شديدة بحيث يطلع شكلها تسنها حطب مشبوب الله ينجينا من عذاب النار.... وانهبل قلت ذي التشمني يام وليام؟؟؟ قالت لالا مب تشمني دفاية غاز ...اجل التشمني انا قدها؟؟؟ تذكرت فعلا التشمني تحتاج مدخنة وعمارتنا مابهاش مداخن.. قلت يازين الدفا زيناه عاد حاطتن لها كنيبلن مصفط تحطه على رجيلاتها...وتقعدني وهي تلهث الضعيفة ويوم عطيتها الهدية قلت لها ياحبيلتس يام وليام يالله تعظم أجرها ....هذي حقتس من الضحية (عاد لو انا مضحين .... تسان يمكن)... قالت يالله لاتخليني من بدورة (عاد تبون الصدق ماتعرف تنطق اسمي لحد الحين )... وتاخذها وتجلّسني بالمجلس وتقعد تقلبها وتناظر وتقول يالله لاتخليني من بدورة..وتقوم ياحبيييييييي لها وتمطخني يمين شمال.. هذي غير مطخة الباب طبعا..:) فعلا حسيتها ممتنة الضعيفة ..وتاخذ الكيك وتحطه على طويّلتن جنبها ... وتقعد تسولف وتهرج عن ولد اختها وبنت اختها مهبلين قلبها ضعيفت الله ..وعيالها اثرها رايحتن شايفتهم في فندق بإيسبورن مجتمعين يالله الجنة ... وان ولد اختي عنده قارب ولابعد رحت اركب فيه ... وان بنت اختي اعرست ولابعد حملت ... مابقى الا تقول الا ان اختها راحت تقرا عند راعي بريدة ... وانا حاطتن يدي على خدي احتريها تخلص..ياقليبي قليبها تبي احد يسمعها من الوحدة .... اجل رجيلها ماابطى ميت ...واختها ساكنتن بوادرين ...وعييلها موب عندها.. بعذرها الضعيفة تبي احدن يوسع صديرها... المهم وعاد تقول لي وين رحتوا بالكرسمس.. ماسافرتوا منا ولا منا؟؟؟ قلت الله يرحم الحال... الله لايخلينا من برايتن التفال والتسلابة... رحنا هايستنغ ولويس وسي فورد ..لكن رحنا ابد تمشية حديقة حيوان...:) دقيقتين رحنا متنا برد واخذنا كم صورة ونكسنا بيتنا وزينت عشاي وصليت وسميت.. قال قرزمز قال.. قلت على طاري القرزمز (شوفوا الخبيثة بدورة) قلت شوفي يام وليام ترا النيو يير مب بس عندكم ...نيو ييرتنا جاية ان شالله عقب عشرين يوم ... قالت اييييييييييه وشلون يابنيتي؟؟؟ قلت ابد يام وليام انتم تحتفلون بالنيو يير عقب القرزمز .. انحن لا..النيو يير تبدا بعد العيد الاسلامي الكبير اللي يجي عقب الحج ... شفتي الحج؟؟؟ قالت ايه شفته بالتلفزيون ... قلت لها المسلمين يروحون يحجون ويتبعون خطوات ابينا ابراهيم (فاذر ابراهام)...عليه السلام .. قالت ايييييييييه... حسيتها ماتبي تدخل في الموضوع... قلت ابد ...اهم شي تدري ان لنا فرحتنا زي فرحتهم.. وان لنا جمالنا ربما الاجمل من جمالهم.. طبعا كنت مجروحة هكاليوم للغاية لأني كنت قارية مقالات مؤسفة بأقلام متعصبين نصارى ضد الإسلام ... مقالات تنضح بالتعصب والكراهية للعرب ودين العرب (كذا يسمون الإسلام ترا ومن هنا يبدأ كراهيتهم له بكل اسف).. والأشنع والأفنع أن ماورد في البايبل من ذكر لوادي بكّة (بالنص وشفته بنفسي بالنسخة العبرية والانغليزية) حرّف بطريقة عنصرية شنيعة ليكون (وادي البكاء =وادي العويل)... والجبل العظيم المذكور هناك جعلوه بالغصب جبل صهيون بدلا من عرفات الله... كنت وقتها مجروحة بشكل كافي اني انهي الموضوع وابدا الحديث عن موضوع آخر... ومواضيع أخرى ربما تأتي لي الفرصة للحديث عنها... تابعوني يابنات اوعدكم بككرة اكمل السالفة... يوم توريني صورها وهي بنت..:)

من الحيا والفشيلة تأخرت عليكم :) ............ موب ام وليام جابت لي على القرزمز...