تحت طلب احدى العضوات الغاليات على قلبي في هاد المنتدى قررت نكتب لكم برنامجي الخاص للعناية ببشرتي مرفوق بالصور لي عليها اسمي في منتدى ثاني و لكن انا نفس العضوة و ما اريد فقط هو دعوة طيبة بظهر الغيب خالصة من القلب و أي استفسار انا هنا اخواتي
أولا و بما أننا دائما تنتكلموا على التنظيف و على البشرة النضرة و المشرقة لازمنا نعرفوا بأن العناية راها نصف من الخارج و نصف من الداخل , يعني خاصنا نهتموا حتى بطريقة الأكل و طريقة العيش عموما الى بغينا نحافظوا على بشرة جميلة طول الحياة . الجسم و الجلد كيحتاج يخرج السموم اللي كندخلوها مع المشروبات و الأكل و الهواء ... الخ , و البشرة باش تبقى نضرة لازمها على الأقل واحد 3 ايام كل 40 يوم ديال detox يعني تخرج بيهم السموم من الجسم , و كنظن 3 ايام كل 40 يوم ماشي شي حاجة كبيرة و مقدور عليها سواء للي جالسة فالدار أو اللي كتشتغل أنا غادي نتكلم ان شاء الله على المأكولات اللي كتساعد و بقوووة فتنظيف الجسم من السموم و لكن نبغي فقط نذكر بواحد الحاجة مهمة بزااااااف خصوصا لينا حنا النساء من الصغار حتى للكبار و هي الرياااااااااضة الريااااااااضة خليوا على الأقل اللي ما استطعاتش تزولها يوميا أو ما عندهاش الوقت واحد نص ساعة ديال المشي يوميا على الأقل منافعها كثيرة و بزاااااااااف
ثانيا المأكولات اللي لازمنا نركزوا عليهم فديك 3 ايام ديال التنظيف :
1 - الماااااء الماااااااااء الماااااااء شربوا الما بزاااااااااف قد ما قدرتوا
2 - الفواكه و الخضر فقط هي اللي تنكال ديك الأيام , أكثروا خصوصا من الطماطم الصغيرة و الفواكه الغامقة بحال التوت البري و التوت الأزرق و الأسود ... الخ
3 - خودوا كل صباح و عشية أعشاب تتساعد فتنزيل السموم من الجسم بحال البابونج أو الزنجبيل أو الشاي الأخضر ... الخ
4 - خل التفااااااااااح ملعقة مع الصباح دايبة فكاس ديال الما بارد
5 - زيت الزيتووووووووووووووون الرااااااااائعة و لكن شوفوا اللي معصورة على البارد , و طريقتها هي كالتالي على الصباح غادي تاخذوا واحد الملعقة ديال زيت الزيتون و تدخلوها للفم بلا ما تبلعوها و بداو كتعملوت المضمضة هي شوية صعيبة و مملة حيث لمدة تقريبا 10 دقائق و من بعد رميوها أعزكم الله و شوفوا ديك الرغوة البيضاء اللي كتتكون سبحان الله و الكم ديال السموم اللي كتمتص زيت الزيتون , هاد الطريقة ممكن تستعملوها 3 مرات أسبوعيا ما كتضرش بتااااتا بالعكس مفيدة و كتقوي اللثة و الأسنان كيبياضو و الجسم كيتخلص من السموم
6 - عصير الألوي فيرا فعااااااال جدا و كل الأطباء كينصحوا بيه للديتوكس و لشحاااااال من حاجة كلها منافع باذن الله للجسم و البشرة ... الخ و لكن خودو شي واحد يكون موثوق و فيه الختم ديال الأصلي و كنظن شركة فوريفرالأمريكية موجودة كتبيع منتجات أصلية أما الى جعتوا ممكن تاخدوا طبق ديال الحبوب أو عصير البرتقال أو الحامض
يتبع ....
بالنسبة للبنات اللي ما عندهمش الآلة ديال البخار ممكن يستعملوا طريقة أخرى أحسن و أفضل بالأعشاب , و هي أولا نديروا الماء يغلي و ناخدو اناء نحطوا فيه الزعتر + الورد + اكليل الجبل + الخزامى + ملعقة ديال خل التفاح
نزيدوا عليهم الماء المغلي و نغطيو الاناء حتى يطلقوا دوك الأعشاب جميع الزيوت الطيارة ديالهم لمدة لا تقل على 3 الى 5 دقائق
فهاد الأثناء نحضر جو مزيان يريح الأعصاب و المخ , ممكن تستعملوا أعواد الند الخاصين بهادشي أو زيت الخزامى فديك المبيخرة دالشمع الصغيرة , على فكرة أنا ما تنعمل هاد التنظيف حتى كنكون غالبا منظفة داري و تكون داري نقية كتشعل كتنعكس على نفسيتي مزيااان سبحان الله
ناخذ الباندا الخاصة تجمع ليا شعري مزيااااان و نحكمها على حدود الجبهة باش ما يتلمسش الشعر بمنتوجات دالوجه , و ناخذ مزيل الماكياج نحط منو كمية وفيرة و نمسح بيه الوجه و العنق بالقطن مزياان , أنا كنستعمل Vitamin E Cleanser ديال the body shop
من بعد مباشرة يكون الوجه ما زال ما شربش مزيل الماكياج كامل , ناخذ مقشر ديال الوجه يكون القوام ديالو كريمي ماشي على شكل جيل , و ندير منو كمية وفيرة تقريبا ملعقة صغيرة و نوزعها على الوجه و العنق و نبدا نعمل فالمساج بلطف و نركز على الأماكن المعرضة للاتساخ دائما بحال الأنف و الذقن و الجبهة و نكمل المساج حتى يبدا يطيح المقشر مع الجلد الميت بحال الوسخ أعزكم الله , هادو المقشرات اللي كنستعمل لهاد التنظيف الشهري كل مرة على حسب المزاج و على حسب حتى البشرة
من بعد دهني شفايفك بالعسل و خودي شي فوطة كبيرة و غطي بيها راسك و انت منحنية على الاناء طبعا كيكون داك البخار القوي فالأول راح و كيبقى غير المفيد , كاين بنات مع الأسف كياخذو الاناء من النار للوجه بسرعة و كتحرق وجهها بالبخار و تكبر ليه المسام و هي عند بالها راه العملية صحيحة خطأ خطأ خطأ , و حتى لو لاحظتو حتى البخار أنا كنستعملوا مرة وحدة شهريا فقط مكتعجبنيش كثرتو على البشرة , و ابقي معرضة للبخار على حسب درجة التنظيف اللي بغيتي , اللي بشرتها نظيفة و معتنية بيها يوميا و كتدير التنظيف الأسبوعي راه غير 4 الى 5 دقائق كاافية باش تخرج السموم من البشرة , أما اللي بشرتها فيها لي النقط السوداء و متسخة و خصوصا صحابات البشرة الدهنية لازمكم مدة لا تقل على 10 دقائق حتى يرطاب الجلد مزيان و الوسخ يتزال بسهولة
من بعد ناخذ دوك الاسفنجات المعروفين للتنظيف راه كيتباعوا عند محلات الماكياج و كلينيكس و هادو غادي يكونوا مرافقينا طول فترة التنظيف , و اللي ما عندها دوك الاسفنجات تاخذ قطعة ديال ثوب قماش لطيف ما يكونش خشن و تستعملو حتى هو مزيان
ناخدوا كلينيكس نبداو نزيلو بيه الرؤوس السوداء و لما ننتهي نبللوا دوك الاسفنجات بالما دافي و نمرروا على الوجه كامل , من بعد ناخذوا شي غسول منظف يكون مزيان , ناخدوا منو تقريبا ملعقة صغيرة و نبداو نمرروها بمساج دائري على الوجه بأكملو لمدة دقيقة ,بالنسبة لي ما زالت و سأظل وفية لـ Exfoliac و هاد الآخر خديتو متكون من الألوي فيرا و النعناع يعني لا بأس به
من بعد نغسلوا بالما دافي , و نديروا شي ماسك مناسب لنوع البشرة , بالنسة لي غالبا كناخذ هاد الجاهزين و كيناسبوني , هاد المرة استعملت هذا ديال الشكلاط لأول مرة
من بعد نمشيوا نستلقيوا و من الأحسن على الأرض أو شي مكان مسطح بلا وسادة و خلي الدورة الدموية تمشي و تجي على خاطرها , و الغرفة كذلك لازمها تكون ملائمة و درجة حرارتها معتدلة ما يبرد فيها الجسم و لا يسخن , من بعد مللي ينشف الماسك و نغسلوا مزيااان و ننشف وجهي بكلينيكس, ناخذ تقريبا 1 ملعقة ديال الماء المعدني و نمررها بالقطن على الوجه و نخليها حتى تنشف على خاطرها
يتبع