خواتي العزيزات حواءات المنتدى :cook:
هذي طريقة برياني الربيان الخطيرة اللي دايماً أسويها بس للأسف بدون صور لأني في الدوام وصار خاطري فيها وقلت اعلمكم اياها. :icon28:
المقادير:
كيلو ربيان
4- 5 أكواب رز آنه أفضل (بوابة الهند)
3 عود دارسين (قرفة)
4 حبة هيل
6 حبة فلفل أسود
3 حبة قرنفل (مسمار)
زيت
بهارات (بزار + كركم + فلفل أحمر حار (حسب الرغبة) + بهار الكاري + بهار البرياني (مهران) وكمية البهار انه احط ملعقة الحلاوة من كل شي
حبتين ماجي (الخضروات)
قليل من الملح
بصلتين متوسطتين مفرومين ناعم
حبتين طماطم
4 فصوص ثوم + قطعة زنجبيل
ورق غار
فلفل أخضر حار + فليفلة خضراء حجم متسط + رزمة كزبرة طازجة
(ملاحظة كلما زادت كمية الكزبرة كلما الطعم صار أحلى)
الطريقة:
أول شيي ننظف الربيان جيداً ونغسله ونصفيه من الماي ونعصر عليه نصف ليمونة ونخليه شوي
نسلق الرز في الماء بعد غسله ونظيف له الفلفل الأسود + المسمار + الدارسين وقليل من الزيت ونخليه حتى يستوي نصف سواء يعني لا ناضج ولا مو مستوي
في اثناء سلق الرز نقوم بوضع الطماطم + الثوم + الزنجبيل + الفلفل الحار + الفليفله + الكزبرة في الفرامة الكهربائية ونقوم بفرم هذي المقادير
بعدين نضع البصل في قدر الطهي ونحمس البصل في الزيت حتى يذبل ويتغير شوي لونه ونحط ورق الغار وبعدين نحط عليه الربيان ونقلبه حتى يتغير لون الربيان وبعدين نظيف البهارات كلها ونقعد نقلب ونقلب ونقلب حتى يستوي لون الربيان بلون البهارات وبعدين نظيف له خليط الطماطم ونقلبه ونخليه على النار إلى أن ينضج الربيان وتشمين ريحة البهارات مع الخضرة الشهية وبعدين نحط طبقة من الرز في بايركس ونحط خليط الربيان بتلاحظين إن الربيان مع الخليط يصير مثل الصالونة شوي يعني فيه قليل من المرق ما يخالف حطيه كله على الطبقة الأولى من الأرز وبعدين غطيه بالطبقة الثانية ورشي عليه شوية زيت وإذا عندج مسحوق الزعفران الغرشة الصفرة أو لون صناعي نثري عليه وغطيه بالألمنيوم ودخليه في الفرن وخليه حتى تتبخر يعني يدخن وتعرفين إنه استوى من ريحة الخلطة وبعدين قدميه بالعافية عليكم
:icon28:
جربو الطبخة وما راح تندموا يا عزيزاتي
دعواتكم لي بتيسيير أموري يا رب :)
أموااج @amoaag_2
عضوة
يلزم عليك تسجيل الدخول أولًا لكتابة تعليق.
شوشو ام رونى
•
مشكورة يعطيك العافية
الصفحة الأخيرة