*
*
*
يابناتي اليوم بنسوي برياني ..
عاد البرياني له اكثر من طريقه وكل وحده تتفلسف بطريقتها ..
تدرون الكويتيه لازم تتفلسف ..
سلمكم الله ورزقكم في ولد الحلال اللي مايكون بطيني ويحب اكل المطاعم ؟؟
برياني اللحم يبيله شوية تركيز بقولكم وانتوا كيفكم ..
اللي تحتاجونه للطبخه ..
-------------------------
كيلو لحم
6طماطات ولميات ثلاث منهم للخلطه والباجي شرايح
5 بصلات ولميات ثنتين للخلطه ..
5 فصوص ثوم ..
قوطي معجون ..
4 حبات بطاط ..
والبهارات عباره عن .. كاري .. فلفل ..قوطي روب ..فلفل اسود .. مسمار .. هيل.. كمون .. لومي اسود ..
والعيش 4 جيلات عشان المشخول
الطريقه
--------
الحين يابنات بليس تغسلون اللحم زين وتقطعونه باحجام متوسطه يعني اصغر من صابونة الرقي او نصها .. ولاتنسون تغسلونه زين مفهوووم ..
وبعدين تحطون جدر وتفوحون فيه اللحم مع بهارات .. دارسين خشن..ملح .. هيل .. مسمار .. فلفل اسود .. كمون .. ونتيفة كركم .. وتفوحونه لما ينضى ,, وهو يفوح طبعا تكونون مجهزين كل شي
يعني قاصين البصل والطماط له قصتين وحده صغار عشان الحمسه والثنيه شرايح وحتى البصل نفس الشي والبطاط هم يصير شرايح جنهم براطم بلاع البيزه ---وتقلونه نص قليه وتخلونه على كتر..
وبعدين تسون المشيخيله وعلمتكم عنها من قبل تشخلونه تفوحون العيش مع ماي وملح وتشخلونه بالمشخال وتخلونه على كتر..
الحين تحطين دهن خفيف بالجدر وتحمسين البصل والطماط المقطع صغار مو تعفسون السالفه .. وتحركينهم وتحطين عليهم بهار .. فلفل اسود ولومي اسود وكمون ودارسين ونتيفة كاري وكركم وكزبر وهذا كله مطحون طبعا وهم تحطين جم حبة مسمار خشن وهيل خشن وفلفل اسود خشن ووتحمسينهم مع بعض ..
واذا نضى اللحم تشيلينه من الماي وتحطينه بالجدر مع الحمسه وتحمسينهم مع بعض وتحطين فوقه الثوم المدقوق عشان يشرب الريحه وتحركينه عدل وكل ماتشوفينه يتلزق حطي فوقه شوي من ماي اللحم وتحركينه وعقب شوي حطي شوية معجون طماط يعني قفشتين كبار و تحمسينه مع الخلطه
وبعدها بشوي حطي نص قوطي روب وتقدرين تستغنين عن الروب
الحين تحطون الطماط والبصل والبطاط المقلي نص قليه فوق الخلطه
وتحركونهم بالعدال وطبعا نسنا نقول عن الملح حطو ملح على الخلطه لان اللحم مفيوح بدون ملح واعتقد هذي شغلات صغيره ماله حاجه كل شوي اقولها ؟؟
اي وين وصلنا ؟؟ الحين نيب جدر حجمه زين ونسوي طبقات يعني نحط تحت شوية عيش وفوقه شويه من الخلطه وبعدين عيش وفوقه خلطه يعني نصفهم فوق بعض بس اخر شي يكون العيش انزين
وييييي نسيت اقولكم ان لازم تجهزون الزعفران ويكون منقع بماي ورد .. حظي المخ صار كلش .. اي اذا زاد الكبر المخ دثر .. تضحكون ها ؟؟
الحين ترشون الزعفران فوق العيش عشان لون العيش يصير مصوفر من الخلطه والزعفران وتسكرون الجدر وتحطونه تحت حديده وعلى نار هاديه .. وعليكم بالعافيه ..
عاد البرياني يبيله اجااار ومعبوج وخضره ايي هالله هالله بالخضره تراها زينه
ونسيت اقولكم ترى برياني اللحم والدياي نفس الشي مفهوووووووووووووم وترى في ناس يحبون التبربس يعني اللي تحط بزاليا واللي تحط جزر
وانتوا وهواكم برياني لحم
برياني دجاج
وعليكم بالعااااااااااااااااااااااااافية
الحجية نبي نحلي لازم تنزل طبخات ثانية
عجبني الاسلوب و البرياني الخنين