بزرانكم مايلبسون في هالشتويه..تعالوا عندي الحل.

السلام عليكم ورحمة الله وبركاته
وش اخباركم؟
عساكم بخييير..

بادخل بالموضوع على طول
تدرون البزارين اللي هم الاطفال من عمر سنتين ونص تقريبا وفوق مايلبسون الشتوي او الجاكيت بسهوله :16: واذا لبسوه مارح يطول ..حده يفرك من باب المجلس ويفصخه.. :)
بقول لكم على طريقه مرتاحه معاها من سنتين وانا استخدمها.. :icon28:
فحبيت افيدكم فيها<<<<<<خلصينا..الله من كثر الهذر.

جايتكم..

والله وليدي اللي هو كنايه عن اخوي السعنون :) الله يحفظه ولا يخليني منه..
الحين عمره 5 سنوات تقريبا ومن كان عمره 3 سنين وانا ماشيه على هالقاعده..

شوفوا مادمنا فرصة بداية الشتاء..

الطريقه:

إذا جيتي تلبسينه وقال لك ...لااااا..مابي هذا..او من هالخنبقه.. :39:
قاطعيه..وقولي له..
يالله حبيبي البس بسرعه قبل يطقك(يضربك) البرد يالله بسرعه..بسرعه..
ولما يلبس..
قولي ايواااه الحين البرد ينحاش منك ومايقدر يضربك..

نفس الشي مع الشراب(الجوارب)<<<اخس يالفصحى
البس بسرعه قبل يطقك البرد مع رجليك يالله بسرعه..
وإذا لبس ..قولي هاهاي الحين انحاش منك البرد وما يقدر يضربك..

وقبل النوم قصه(مفادها)<<<مانيب سهله والله..
القصه:
تراها من تأليفي وحقوق الطبع محفوظه...
كان ياما كان في قديم الزمان وسالف العصر والــــــأوان..
كان فيه ولد صغيور حلو وشطور واسمه عبدالغفور كان عبدالغفور ولد شاطر ويسمع الكلام لما صحى الصباح وجا ياكل الفطور قال بسم الله الرحمن الرحيم وبدا ياكل..ولما خلص قال الحمدلله رب العالمين وووانتي حطي احداث بسيطه ... يعني مثلاً بمناسبة انه عن البرد
نقول عبدالغفور لما تسبح(تروش) وخلص قال مابي البس هذي..وماابي شراب ولما رفض(عيا)يلبس يوم قام البرد وطقه مع رجوله مسكين لما جا ينام صار يكح يكح ويعوره بطنه وقام يستفرغ مسكين عشان البرد ضربه وهو مايدري لأنه مالبس زين..وراح المستشفى.يوم طاب صار يسمع كلام ماما ويلبس زين ومايفصخ جاكيته ومايفصخ شرابه وصار لما يلبس ينحاش منه البرد ويخاف منه.
وتوته توته خلصت الحتوتاااااه((وانتي طبعا قوليها باسلوب مو تخلين البرد حاجه مرعبه. :30: .حاولي تفهمينه ان البرد قوي لكن الولد لما يلبس يكون شجاع ومايقدر عليه البرد :D ))

>>>أتمنى تكونون فهمتوا يابنات والله الفكره مررره فضيييعه واتمنى اكون افدتكم أنا مرررره الحمدلله مرتاحه معاها واتمنى اكون وفيت الموضوع..
وأي استفسار أنا حااااضره :27: