بسافر بوسطن لعلاج ولدي وابي مساعدتكم ضروري والي تساعدني الله يجزاها الف خييييير

السلام عليكم .. هذي اول مشاركه لي عندكم بالمنتدى وكلي امل بمساعدتكم يا اخواتيييي

بسافر بوسطن خلال هالشهر او الشهر الي وراه طبعا هذا يعتمد عالموعد والفيز بودي ولدي اعالجه بمستشفى بوسطن للاطفال

واختكم بالله ماتعرف كوووووووعها من بوعهاااا وازيد على ذالك خووووووووووووووافه بشكل مو طبيعي سافرت لكذا دوله بس لمريكا اول مره وابي استفسر عن كذا شغله اذا ماعليكم امر ممكن ؟؟؟؟

1_ الخادمه : ابي اخذ معاي خدامتي وطبعا هي جنسيتها هنديه وطبعا انا مضطره اخذها معاي لان ولدي معاه اعاقه بسيطه وما اقدر عليه بروحي يعني نبي نتناوب عليه ... والله يخليكم ادري ان الخدم هناك لهم مشاكلهم بس انا مضطره وابي احد يرد علي شاف هناك خدم وطريقه تعامل الاجانب معانا بخصوصهم .

2_ الماجله : شنو اقدر اخذر معاي من اكل لان احتمال نطول هناك وتعرفون ان رمضان بالصيف يمكن نكون موجودين هناك يعني مثل : القهوه العربيه _ الهيل _ التمر _ المكسرات _ المعلبات _ الماجي بانواعه ................ الخ يعني شنو اقدر اخذ وشنو ممنوع وشنو موجود هناك واقدر استغني عنه وما اخذه .

3_ شلون على الطيران الي اعرفه ان احنا راح نطير دايركت من الكويت الى مطار نيويورك شنو الاجراءات الي راح تواجهني هناك بخصوص الخدامه والله يستر انا بصراحه خاييييييفه من هالموضوع بس والله مو بايدي .... وبعد مانخلص اجراءات مطار نيويورك شنو راح اسوي عشان اروح بوسطن .. الله يخليكم ابي بالتفصيل الممل اذا ماعليكم كلافه ..

4_ولدي معاه نشاط زايد ومايقعد بمكانه دقيقه الله يعينه وبما ان عمره ثلاث سنين بس شكله اصغر من عمره .. هل اقدر اخذ معاي كرسي واحطه داخل الطياره لاني ادري ان كرسي الطياره ماراح يفيده يعني بيله حزام امان من تحت وعالخصر وكرسي الطياره بس الخصر يعني راح يطيح ولدي من تحت الله يهديه ويشفيه .. قبل شفت اعلان عن كرسي متعدد الاستخدامات مثل: كرسي سياره + عربانه للتنقل + سرير + كرسي اكل + كرسي للطياره يعني 5 في 1 سمعتوا فيه ؟؟ والي استخدمته الله يخليكم تعلمني عنه لاني سالت وقالوا بس مسموح لطيران الامارات فقط .. شلون على الطيران الكويتي والامريكي بما اني راح اركب طياره من نيويورك الى بوسطن هالمسموح هالكرسي والا لا ؟؟؟

5_ اخر شي ابي اعرف عن معامله الامريكان للعرب يعني عادي لما اتمشى ماراح احد يتحرش فينا بما اني منقبه وهل راح اتعرض للمضايقات ؟؟ ولما اروح اتمشى او اتسوق يعني هل راح احد يضايقني ويضايق خدامتي لان الي اعرفه ان عندهم هالشي يسمونه عبوديه ؟؟ الي عايشه بامريكا وعارفه كل صغيره وكبيره عنها تعلمني والله يجزاها الف خير.

وبس هذا الي عندي حاليااا يمكن اذا تذكرت شي سالتكم بما انكم عندكم خبره والله يعطيكم الف الف عافيه ... والله يعينكم على ازعاجي وهذرتي ....

الله يخليييييييييييييييييييييييكم ابي اجابات وافيه على هالاسئله وجزاكم الله الف خيييييييييييييييييييييييير