السلام عليكم ورحمه الله وبركاته
صباحكم ومسائكم خيرات ومسرات
حبيباتي واخواتي في عالم حواء يعلم ربي اني احبكم في الله من كل قلبي واليوم الي ما امر عليكم فيه احسه ناقصني شي ولا يرتاح بالي حتى الف عليكم كم لفه لوبسيطه اطمن عليكم
الليله مشغوله قاعده اجهز للسفر وارتب من الى وانتم ادرى عند السفر تطلع الأشغال الله يسر علينا
الموضوع وما فيه انه في فرق بين الي يسافر مبسوط وفرحان ويشوف اهله واحبابه الوالدين والاخوان والأخوات الي ياما سهرنا على الجوالات وقرقرنا وما نصدق نشوف بعض وجها لوجه
من الشوق والهفه على بعض واكيد الي مجربه بعد الأهل تحس بنار الشوق
تسافرين عند اهلك الدنيا ماهي واسعتك من الفرحه تسلمين على ابوك وامك زاخوانك واخواتك والود ودك تدخلينهم داخل
قلبك وتسكرين عليهم
تسافرين وانت تعطينهم خبر كلهم عشان يستقبلونك انت وعيالك
وتشوفين الفرحه بعيونهم
وتحسين ان نظرات العيون معبره في هذه اللحظات
لكن الشي المؤسف والمحزن انك
تسافرين وكل شي تغير وينتظرك شي يجدد احزانك ويلهب نار الحزن داخلك
يابنات ادري تستغربون وش اتكلم عنه
انا يوم اسافر وأوصل لأهلي اشوف الأستقبال الحار والباب يفتح للسياره وندخل والأنوار كلها مولعه والترحيب
والفرحه وكل تعابير السعاده على وجيهنا
ومن كان يستقبلنا
كان ابوي
الأن ياأخواتي ابوي مات
الله يرحمه
ما ادري وش اوصف حالي لو ادخل بيته من دون مايستقبلنا
احس بحرقه داخلي
اخاف ادخل بيت ابوي واشوف ابوي في كل مكان ولا اقدر اطفي الشوق الي بقلبي
هذه اول مره ادخل بيته من بعد ما مات
لأن ابوي مات في منطقه ثانيه والعزاء صار في هذه المنطقه
مو في بيته
يعلم ربي اني في حاله من الخوف والحزن
اذا سافرت واشوف مكان قهوته وجلسته ونومه
ياه ياسرع الدنيا وشلون تفرق الأهل والأخوان
تا خذنا واحد ورى الثاني ولا احد يدري متى دوره
يارب رحمتك
خواتي حبيت افضفض الي بقلبي
لأنه يعلم ربي اني احبكم وارتاح لكم سبحان من خلا لنا اخوات من ورى الشاشه كل وحده بديره ولا نعرف بعض الا من خلال هذا الجهاز
واسأل الله القدير انه كما جمعنا خلال هذا الجهاز
ان يجمعنا في الفردوس الأعلى
وصيتي يااخوات الي لها والديين تبرهم قد ما تقدر لا تقول امي والا ابوي عصبين ولا يعجبهم شي
بريهم وقومي على خدمتهم بدون تأفف
وبدون تذمر وحتى لو ما بينتي
الأم والأب نعمه قسم بالله نعمه ما يحس فيها الا الي
فقدها
وانتي استمتعي بالنعمه هذه قبل تفقدينها
ابوي يوم مات حسيت ضهري انكسر
والله العظيم يابنات انه لا اخو ولا زوج ولا عيال
يعوضونك عن ابوك
ابوك يحب من دون مقابل
يعطي من دون ياخذ
ويحبك انت لذاتك
والي زعلانه ومتضايقه من امها ولا ابوها تقوم تصلي وتدعيلهم وتغسل قلبها من الزعل وتبرهم وتخدمهم
واقول لكم من صادق احساسي
حب الأم والأب غييييييييييييييييييييييييييير
ولا يتعوض ولو بكنوز الدنيا
وصيتي الثانيه لأمي ولكل زوجه فقدت زوجها
واقولها
انه امنا عائشه رضي الله عنها
فقدت حبيبها رسول رب العالمين
فقدت حبيب رب العالمين
ولا ولد يسليها
وكانت في زهرة شبابها
اسأل الله العلي القدير ان يصبر كل مبتلي وهذه الدنيا ابتلاء ودار ممر
وفي الأخير استودعتكم الله الذي لا تضيع ودائعه
ولا تنسوني من دعائكم
محبتكم
اسطوره انثى
* اسطوره انثى * @astorh_anth
محررة فضية
يلزم عليك تسجيل الدخول أولًا لكتابة تعليق.
*RYRY*
•
رفع
الله ييسر امرك وتوصلين عند اهلك وانتم بخير وسلامه
والله يرحم ابوك رحمه واسعه ويجعله من اهل الجنان
وجميع المسلمين والمسلمات
هذا حال الدنيا ومالنا غير الصبر
والله يرحم ابوك رحمه واسعه ويجعله من اهل الجنان
وجميع المسلمين والمسلمات
هذا حال الدنيا ومالنا غير الصبر
الصفحة الأخيرة