بسرعه الحقو علي 😠😠😠

السلام عليكم ورحمه الله وبركاته.
ببكي قهر ياعالم 😠 ايش اسوي بزوجي مخه متكرن.


القصه ان انا ماعندي مطبخ وزوجي جلس سنه يجمع قيمة المطبخ + الأدوات الكهربائيه حقته والحمد لله جمع القيمه وبنفصل قريب ان شاء الله.
المشكله ان زوجي يصبر يصبر يصبر وفي الاخير يفطر على بصله ومستعد يضيع فلوسه بالساهل على اي كلام زي ماسوى في الشقه البويه تقشرت واتعدمت والسيراميك تكسر وهي ماكملت سنه وذحين ندمان انه اختار اي كلام.


الاسبوع اللي فات وداني محلات المطابخ المحترمه و المجربه زي مطابخ مكه والشبكه وخلاص اتفقنا على واحد وسسوينا كل شي بس لسه مادفع عربون قاله العامل اشتري الاجهزه عشان ناخذ مقاساتها صح ونبدا شغل واعتمدت على هذا الشي.
اللي سار امس قالي فيه محل راح يفصل لنا بي 10000 ارخص كثير خلينا نشوفه فروحت معاه اسايره مع اني علمته ماراح اغير عن اللي اتفقنا عليه قالي طيب ولما رحته وياليتني ماشوفته اولا موقعه كان في حاره عشوائيه ثانيا كان بقاله من كثر ماهو قديم وصغير وثالثا المطابخ اللي عارضها كانت من ايام اسكت القديييمه حقت جداتي والطامه ماكان فيه جوده ابد.
دخلته تفرجت وانا مذهوله للحين عايشه هذي الموديلات وماكان عنده من الجديد غير 6 ظرفات صاج مرميه على رخامه.
قولت لزوجي يلا نروح بقاله هذي قال ان شاء الله بنفصل هنا انا هديت شوي عشان مايعند وقولت له بجدك كله قديم قالي عندك هذيك ال6 اختاري منها.
وكان معتمد العقد و التصميم حق المطبخ مسوييه ومن قدمه مو بالكمبيوتر رسم يد كان عشان تكمل بس.
وما اخترت قولت معليش شي ما احبه ما ادخل فيه وخرجت من المحل وركبت السياره ورجعنا البيت وكلمته وقولت له انت مستعجل استهدي بالله لا تضيع تعبك وتجميعك زي البويه و السيراميك روح فصل في نفس محل اخوانك مرا حلوه جودتها عصب وراح يصارخ مالي ومال الناس و المشكله اللي داله عليه واحد من شلته يقولي فلان فصل عنده وفلان هذا يفصل بدال المطبخ 10 ماشاء الله يعني ماهمه .
المهم مطابخ مكه قال لنا يكلف المطبخ 15 الف و هذا الدكان قايل لزوجي يكلفك 14 الف يعني شايفين القهر كمان بس فرق الف.
الخلاصه زوجي خلاص اعرفه راح يفصل عنده حتى لو عمتي تكلمه ماراح يفيد كلمته في الشقه ومافاد يحب البصل الله يهديه والفلوس مو بالساهل يلقاها وانا كالعاده اتفرج واتحسر وكل شوي يقولي لخلي الحريم يموتون قهر من جمال شقتك طبعا بيموتون من الفجعه ايش هذي الشقه لافرش وبويه مقشره وسيراميك مكسر و مقشر وذحين كملت بمطبخ جداتي استغفرك ربي واتوب اليك.
فاخترت لون المطبخ بني محروق نوعه صاج طبعا احسن الموجود الرخامه ابغاها جرانيت لون رمادي منقط اسود او عسلي مخلوط ببني مسود اذا لقيتها عنده والحوض حق المغسله حوضين واحد كبير وواحد صغير من نفس الرخامه طبعا والشباك وبسوي عليه تاج عليه لمبه او الغيه و احط رفوف زينه جنبه إذا عرف لها والباقي رفوف عاديه جدا و4 إدراج ودرجين حقت الرز و السكر قولت الونها لونين بني محروق وسكري هذي الادراج لكن مني عارفه كيف الون الظرفات عشان يبان حلو والظرفتين الاي فوق شفاط الفرن بخليها قزاز شفاف وفيها لمبه و الظرفتين اللي بوجهها كمان الركنية حقت صحون الضيافة قزاز شفاف فيها لمبه وفيه ظرفه طويله مرا حقت المونه والاكل بخليها قزاز معتم او ظرفه عاديه صاج بس لانه مايعرف يسوي حركات.




اللي عندها افكار تقولي بالله لاني كرهت المطبخ وايش رايكم باللي اسويه عادي مطبخ خربان قولو ارائكم مو مشكله 😒


موضوع طويل لكن مقهوره لان المطبخ عندنا مايتغر لك وللعمر وهو اهم شي في البيت يعني مو زي البويه والسيراميك.