بسكن مع اهل زوجي وخايفه ن المشاكل

السلام عليكم


كيفكم يابنات


مثل ماقلت لكم بالعنوان بسكن مع اهل زوجي قريب يعني شهرين او ثلاثه زوجي بيبني لي شقه فوق بيتهم وجنبنا شقه لاخوه وزوجته


انا حاليا ساكنه بمدينة بعيده مع زوجي وبناتي بس ونزورهم بالاسبوع مره او الشهر مره ع حسب وعلاقتي فيهم حلوه وماودي العلاقه تخترب بالمشاكل بعدين


لان اهل زوجي واعرفهم زين اتكاليين بشكل كبير في نظرهم زوجة الولد خدامه لازم تنظف وتطبخ لهم وتسوي كل شي والا بيهذرون عليها عند كل الحريم وام زوجي صاحبة عزايم وكل ماجوها ضيوف تدق وتهاوش انا لحالي وتعالوا ساعدوني وانا مو ضد بلعكس المساعده حلوه بس مو اترك بيتي وعيالي وطول وقتي كرف ودي العلاقه تكون رسميه انزل لهم مره او مرتين بالاسبوع اذا سويت عشا او طبق حلو انزل لهم ودي كذا بس هم مايبون كذا وبس


توها زوجة حماي الكبير تقول انها كانت تسوي لهم وتسوي لدرجة تجلس من النوم وترتب اسرتهم والمفارش وتطبخ بس تعبت ومابين فيهم والحين رفعت نفسها وتساعد باللي تقدر عليه وهي انسانه طيبه وارتاح لها كثير ياليتها تكون جارتي الجديده


بس للاسف مرت حماي الاصغر هي بتكون جارتي وانا خايفه منها اكثر من اهل زوجي مادري شقول عنها وش اخلي لسانها يقطررر عسل ومن داخلها سم جربتها في مواقف كثيره حتى لو كانت غلطانه بكل بساطه تطلع هي المظلومه انا مابيني وبينها شي لكن عجزت ارتاح لها ماتكلمني ابد ولاتسال عني الا اذا بتحش في اهل زوجي او صار لها موقف معهم ودي نكون خوات نسال عن بعض وكذا مره المح لها اني ماعلي منهم ولا في فايده طبعا هي من قدامهم تموت عليهم وهدايا وفلوس والحين سكنت معهم بالبيت ودايما تنزل تنظف وتشتغل مع ام زوجي وتترك عيالها وام زوجي تقول لسلفتي الثانيه ليش ماتصيري نفسها


يعني الدور جاي علي الله يستر


احس اني مو قدهم اهل زوجي عليهم لسان ومرت حماي فيه خبث مو طبيعي وتمشي وتحش بالناس وانا مابي اصير نفسها ولو بردها او بقولها لا بصير عدوتها وانا ماحب اكون عداوات مع احد احب علاقتي حلوه مع الكل وانا بطبيعتي هاديه جداً مع الناس
وهي علاقتها جداً قويه مع كل اهل زوجي خالاته وعماته وبناتهم كانها اختهم واقل موقف يصير مني بتشره عليهم كلهم وبتقول فلانه سوت وفلانه قالت مثل ماتتكلم ع اهل زوجي عند كل الناس او انها تروح تشتكي وتصير لفلانه وهي قصدها تفضحهم وتطلع هي المسكينه والمظلومه


انسانه ذكيه جداً


وانا مو عارفه من زوجي بدا يبني الشقه واخذ ديون عشانها وانا كل احاتي وافكر اقول اقعد بالايجار احسن لي من الحلال اللي وراه مشاكل وغير كذا زوجي بيكون بعيد عني بيجيني ويكند بس


بنات ساعدوني كيف اتعامل معهم وهل انا مكبره الموضوع