كل سنة وانتوا طيبين
المكونات:
3 ونصف كوب دقيق
كوب وربع زبدة طرية
كوب الا ربع سكر بودرة
بيضة
ملعقة صغيرة بيكنج بودر
فانيليا
للتزيين:
ربع كيلو شوكولاته دارك سايحه
ربع كيلو شوكولاته بيضاء سايحه
الطريقة:
فى اناء هنحط الزبدة
ونضربها بالمضرب نص دقيقة مثلا ونضيفلها السكر بودره
ونضربهم كتير بالمضرب الكهربائى لغاية ماالخليط حجمه يتضاعف ويبقى لونه ابيض وقوامه كريمى
ونضيف البيضة والفانيليا
ونضربهم بالمضرب والنتيجة كريمة كريمة بتلمع وخفيفة وان وصلنا للنتيجة دى نبقى بنشتغل صح لأن ده اساس السابليه
ونضيفلها الدقيق المنخول والبيكنج بودر
ونقلبهم مع بعض بالاسباتيولا مش بالمضرب الكهربائي ونلم العجينه بايدينا وهتبقى العجينة لينة وطرية
هنغلف العجينة ونحطها فى التلاجة لمدة نص ساعة عشان نعرف نشتغل بيها وفيها ناس بتحب تعمل سابليه بالكاكاو زى البتيفور هتاخدوا جزء من العجينة او نصها وهتضيفولها ملعقة صغيرة كاكاو للتلوين لو تحبوا وهناخد جزء من العجينه نفرده بالنشابه على ترابيزه مرشوشه بالدقيق او بين ورقتين خبز بسمك متوسط
ونحضر القطاعات اللى هنشتغل بيها
ونبدأ نشكل العجينه بالقطاعات
وهنحطهم فى صينية مدهونة او على ورق خبز
وخبزته فى فرن الكهربا على درجة حرارة هادية وشغلت النار من تحت بس عشان السابليه لازم يكون لونه ابيض ونسيبه يبرد بعد مايطلع من الفرن عشان لازم نزينه وهو بارد وده شكل ظهر السابليه بعد ماطلعته من الفرن مش غامق وفى نفس الوقت مستوي
وهنسيح الشوكولاته على حمام ميه للتزيين
ونزين السابليه بالشوكولاته
ولما تجمد الشوكولاته على السابليه نعمل عليه خطوط من الشوكولاته الدارك والبيضاء وده شكله النهائي
وبالهنا والشفا
مبدعة