كل سنة وانتوا طيبين
المكونات:
كيلو دقيق
ربع كيلو سمنة بلدى سايحة بس مش سخنة
5 بيضات كبار
كوب حليب بارد
تلت كيلو سكر بودرة
ملعقة صغيرة بيكنج بودر
ملعقة كبيرة نشادر
ملعقة صغيرة فانيليا
الطريقة:
هنخفق البيض كويس جدا بالمضرب الكهربائى لغاية مايتكاثف قوامه
وندوب النشادر والبيكنج بودر فى كوباية الحليب البارد ونضيفهم للبيض ونخفقهم
وفى اناء فاضى هنحط السمنة والسكر بودرة
ونضربهم بالمضرب
ونضيفهم لخليط البيض والحليب
ونضربهم بالمضرب
ونضيفلهم الدقيق المنخول بالتدريج
ونقلبه معاهم لغاية ماتتكون عجينة
ونبدأ نشكله واحسن حاجة لتشكيل البسكوت هى المفرمة الحديد بتاعة زمان اللى كنا بنفرم فيها اللحمة دى بتخلى تقطيعه سهل وشكله حلو ولو مش متوفرة عندكم ممكن تستخدموا ماكينة الساوا او كيس التزيين
وهنحطه فى صوانى مدهونة
هنخبزه فى فرن حرارته متوسطة واول مايحمر من تحت ويستوى نطلعه
وده شكله بعد ماخرج من الفرن
طبعا فيه طرق تانيه لبسكويت النشادر بس الطريقة دى خفيفة وحلوة انتو اختاروا الاسهل بالنسبالكم
ويارب موضوعى البسيط ده يكون عجبكم
صحه وهنا ☺️