بشارة

السلام عليكم و رحمة الله و بركاته
خواتي في الله، أولاً أحب إني اشكركن على المجهود اللي بذلتوه و تبذلونه عشان صحة المرأة. و أحب إني ابشركم، بس بتغيلس عليكم شوي قبل لا اقولكم البشارة
الله يسلمكم، أنا الدورة مب منتظمه عندي، و متزوجه صار لي سنه من غير اولاد. حملت ع شهر 5 بس لأني ما كنت ادري، عقيت.
المهم، ذكرى زواجي الأول كان بشهر 7، اللي هو نفس يوم ميلادي، 17\7. و خططت و سويت اللي ما يصير عشان افرح زوجي و ينسى سالفة الطفل اللي فقدته، و في نفس الوقت، كنت اتعالج عند دكتوره شاطرة (اللي تبي عنوانها و رقم تليفونها على الخاص) الكل مدح لي فيها عشان اضطرابات الدورة. المهم، يوم الدكتورة درت انه ذكرى زواجي قريب، قالت لي إن شاء الله فيه الخير، و عطتني حبوب كلوميد. و بالنسبة لي، عرفت موعد التخصيب عندي (عن طريق مخطط الحمل اللي ارسلته وحدة من العضوات الله يذكرها بالخير)، و اكتشفت انه يوم التخصيب العالي عندي هو في نفس يوم زواجي (سبحان الله). طبعاً ما خبرت زوجي عشان ما تكون مهمة عسكرية لازم يقوم بيها إذا عرف. طبعاً، غيرنا جو في فنادق دبي، و بعدين زوجي قال لي شو الهدية اللي محضرها لي، سفرة بعد 4 ايام، و لأن اختكم تدودهت و ما عرفت شو تسوي، نست سالفة الإخصاب. و لأني مسافرة، قلت امر ع الدكتورة أول، بس اني اطمن ع نفسي قبل السفر. الدكتورة بعد ما سوت لي (ألترا ساوند) قالت لي، البطانه متضخمة عندك شوي، خذي هذي الحبوب، إذا فيه حمل فبيثبته، و إذا مافيه ما يصير لش نزيف، بس لازم تاخذينه ع نفس الموعد كل يوم. طبعاَ الطريقة اللي قالت لي فيه النتيجه قلت انه ما فيه رجا، وما صارت هذي المرة. سافرت مع زوجي، و انبسطت و الحمد لله بدون ما انسى اخذ الدوا ع نفس الموعد. و أنا راجعه صار لي اسبوع. المهم الله يعافيكم، دقيت ع الدكتورة أسلم عليها، و سألتني عن الدورة، قلت بعدها ما يتني، و لأني كنت أتابع معاها من اتزوجت، صار لي في الأشهر ال5 اللي طافوا الدورة تجيني ع الموعد، و أنا كنت طبعاً ناسية. المهم قالت لي أجيها عشان تطمن علي. (وصلت وصلت)
يوم سرت لها، قعدت عشان الألترا ساوند، و شفت شي غريب أول مرة أشوفه ع الشاشة، طبعاً خفت، و هي قاعدة تقول لي ما شاء الله، ما شاء الله، شوفي. قلت لها شو اشوف، و شو هاذي الحفرة اللي في رحمي، قالت لي هذا جنينك حبيبتي، مبروك، و هذا قلبه بعد، صار لك 5 اسابيع حامل (كلولولولولولولولووووش)
ما تتصورون شو كانت ردة فعلي، و الله انه شوي و يغشى علي من الفرحة. قالت لي الدكتورة، خلي زوجك يجي هني، و أنا بخبره.و يوم ظهرت لزوجي، سويت عمري مغتمه، و قلت له الدكتوره تبيك تجي معاي، طبعاً الريال خاف و فز معاي لغرفة الطبيب. حتى قبل لا يقعد سألها شو فيني، فقالت له، ما فيها شيء إلا جنين في رحمها. اسميكن ما كنتن وياي ذييك الحزة، و الله انه الريال شوي و يطير، بغا يبوس فيني قدام الدكتورة ( :o ) المهم، البشارة إني أنا حامل و الحمد لله. ادعولي يا خواتي انه الله يتمم علي الحمل بخير، و لا ننسى كل من تشتهي طفل.
(الله يرزقكم بالذرية الصالحة ان شاء الله، و يحفظ ابناءكم من كل شر. الله يفرح كل متزوجة تبي اطفال مثل ما فرحني. آمين يا رب العالمين)
و السموحة إذا غلست عليكم، بس معليه، من حقي ادلع، حامل :42:
الدعوة الصالحة اخواتي