سبحان الله و بحمده .. سبحان الله العظيم ..
بنات ترا انا متابعه المنتدى لي سنين بس نادر ما اشارك .. و ما كتبت مشاركتي هذي الا عشان افيدكم .. خاصه بعد ما شفت نتايجه الرائعه والي ما كنت متوقعتنها ..
انا لي اربع سنين معانيه مع ويهي .. لاني وقت حملي بولدي البجر كنت استخدم البودره الفلبينيه حسبي الله عليهم دمرت لي ويهي و الظاهر الحمل بعد خلى بشرتي حساااااااسه .. فصارت مزيج عجيب غريب اول مره اشوف بشره دهنيه و جافه المختلطه لها اماكن دهنيه و اماكن جافه بس هاي لا ان خليتها صارت دهنيه و ان غسلتها بماء بس حتى بدون الصابون تقطعت و صارت جافه ..
و اللي عذبني في حياتي هو انها صارت خشنه .. تعرفون كيف البعض خشمه يكون فيه قشور !!! و لا حطيتي البودره يبان مقشر !! ايوووه انا بشرتي كلها كانت جيه ..
المهم اول بديت بس استخدم مقشر المشمش ماركة ST. ives ( هذا المقشر الرخيص هو الافضل على الاطلااااااااااااااااااق) كل العايله استوت تستخدمه من ورا راسي .. و كلهم مدحوووه ...
( تصدقون يا بنات يوم ييت ادور لكم صورة المقشر اكتشفت انه هو بعد ماخذ جائزة الألور .. ترا متشققه من الفرحه .. صدق انه يستااااااااهل )
بعدين و انا احثبر في النت طحت على منتج من إيفون وتحمست له وااايد لانه حائز على جائزة الور للجمال .. و كان فيه ريفيوز عليه وايد تحمس .. فطلبته من امريكا لان الماركه مش متوفره عندنا بالامارات ... و هذا هو المنتج
انا يوم خذته قريت انه مقشر و انه للتجاعيد فقلت اذا جيه اكيد بيقشر ويهي و بيشيل الطبقه المتقشره فيه .. و صرت استخدمه يوميا بالليل قبل انام و احيان الصبح ( هذي حلاته انه يناسب الكسولين مثلي طريقة استخدامه سهله وايد ) .. طبعا استخدم مقشر المشمش بعدين استخدم المنتج و بسسسسس
والللللله يا بنااااااااااااات بشرتي اختلفت عليييييييي في ظرف اسبوعين بس .. الا اقل بعد
اول النتايج ..
بشرتي استوت طبيعيه .. لا دهنيه ولا جافه .. خلى بشرتي متوازنه .. ما تصدقون كيف .. تعرفون يوم تنشون الصبح من النوم كيف تكون اماكن بويهم مزيييته و دهنيه انا انش الصبح ويهي كاني توني غاسلته .. منتعش و ناادر ما يكون خشمي شوي مدهن ...
ثاني نتيجه بعد اسبوع و شوي بينت ...
القشور الي بخشمي رااااحت ما اقول 10% ولا 50% لااااا راحت 99%
و تذكرون قبل فتره وحده نزلت موضوع تقول كثرت تنظيف الخشم تخليه يبان اصغر .. والله يا بنات اني احس خشمي انعم و مستقيم جيه و اصغر حبه ...
ثالث نتيجه ...
انا اصلا بيضا بس بسبب دمار بشرتي مبينه عاديه ..و فيه اثار على بشرتي يعني مش صافيه ... بس الحين بعد تقريبا ثلاث اسابيع .. بشرتي مستويه منوووووره و اصفىىىى ....
والله يا بنات .. ان هالمنتج سوا لي الي ما تخيلته يصير ... انا ما كنت متوقعه نتايج غير ان بشرتي تتقشر حبه .. ما تخيلت النعومه و الصفاوه .. بشرتي الحين ما بقى فيها من خشونتها الا شوية صغنونه على خدودي ... حتى لا حطيت المكياج البودره تبين طبيعيييه .. و بشرتي ما تدهن مثل قبل .... و ناويه اول ما يخلص ارجع اشتريه ..
الله الشاهد اني كنت متردده انزل الموضوع لاني اخاف تستخدمه وحده و ما يناسبها و تكون تكلفت على الفاضي بسبتي .. بس بصراحه من كثر ماحبيته قلت اتوكل و احطه .. و ما ابي منكم الا دعوه صادقه بالهدايه و ان الله يحفظ لي زوجي و عيالي ...
و الي تتحمس له ما اقول لها الا .. اهم شي المواضبه عليه هو ما ياخذ جهد بس تاكدي ان بشرتج نظيفه على الاقل لو بالليل قبل تنامين و ابشري بالنتايج ..