كيفكم يا حوائيــات
مثل ماهو بالعنوان..انا سافرت فترة اسبوعين وبشرتي خلال هالفتره جافه ومعدومه وكل يوم حبه
انعدمت بشرتي وكنت مره متحطمه..خاصه اني برجع وما ابغى خطيبي يشوفني بهالشكل..
كنت أحط المكياج وكل وجهي قشور ومعدوم وباهت ..:44:
بس لمن رجعت لبيتنا رجعت اهتم ببشرتي..
شريت صابونة دوف اللي بالخيار والشاي الاخضر
سرت استخدمها قبل النوم بساعه..اغسل وجهي
بعدين احط ماسك مكون من ..
ملعقه شوفان كويكر مطحون
+ربع ملعقة عسل طبيعي
+نص ملعقة ماي ورد...أنا استخدمت اللي من الرفاعي
احطهم ثلث ساعه على وجهي بعدين اغسل بالماي عادي..
أحط على وجهي اسكنول البابايا
...
لمن ينشف أدهن وجهي بزيت سمسم من المعصره لازم
ومرتين عملت تقشير بمقشر الهيمالايا بالمشمش
طبعا طبيعة وجهي مختلطه وبالبرد تسير جافه..
لمن اصحى من النوم بس اغسل وجهي بالمويه وانشفو واحط اسكنول
وترى زيت السمسم مره حلو للبشره..بعد ماتدهنيه تمتصه البشره بسرعه
وبعد خمس ايام..اليوم بالتحديد
سويت مكياج مره ناعم وطلع ماشاء الله تبارك الله مره حلوو وبشرتي ناعمه زي بشرة الاطفال :27:
وانبسطت مرا من النتيجه جد كنت شايله هم أنو بشرتي وشكلي يكون مو حلوو خاصه انو له شهر ماشافني :35:
مع الوقت هالماسك يفتح البشره وينقيها لأنو فيه اهم المكونات عسل وماء ورد وشوفان
يارب يفيدكم هالنظام البسيط
واللي تستفيد تدعيلي بالغيب الله يحفظلي ابوي ويعطيه طولة العمر ويرزقه من حيث لايحتسب
ويتمملي زواجي على خير
والله يحفظ ابوي وابوك ويعطيهم طولة العمر
والله يتمم زواجك على خير ويوفقك يارب