بنت المؤمنين ووردة دنياي الحمدالله ع سلامتكم عقبالنا يارب بالولاده السهله الميسره
يالله ياسالي الدور عليك ان شاءالله الله يسهل عليك وبالنسبه للاسم مشاري احلى وافخم

والله مدري يتعدل او لا ماعندي فكره بس كثري حبي وسجود وان شاءالله يقلب وتولدين طبيعي

بأكتب اكشن ولادتي
طبعًا يوم الاثنين الصباح كنت انظف البيت تنظيف عميق وطلعت الدرج اكثر من مرا وعلى الساعه ١١ الظهر حسيت شيء طلع مني رحت الحمام الله يكرمكم لقيت افرازات بنيه وجيت كتبت لكم في التجمع والحمدلله اللي ردت عليّا قلبي سدن وصرت كل ماتحركت تنزل الين صارت زي المويه لونها بني رحت على طول طوارئ وحطت جهاز التخطيط وطلع في طلق بس مو مرا قوي يوصل لل ٦٠ والرحم فاتح ١ ونص قالتلي ارجعي البيت رجعت ومازال الافراز البني ينزل مني في كل حركة صرت اشرب اشياء دافيه وامشي على خفيف ويوم الاربعاء كان عندي مراجعه وحكيت للدكتوره كل شيء وسوت لي مسحه وتحاليل وقالت النتيجه بعد ٥ ايام وكنت راجعه على بيت اهلي وانا احس بتحجر قوي ومغص كل ١٠ دقايق بس كان مو قوي قلت لزوجي بأروح طواريء اتطمن لأنو المستشفى شويه بعيد وزحمة جده مرا الموهيم رحت وحطو جهاز الطلق وكان يوصل ل٩٠ والرحم فاتح ٢ونص قالو تنويم وطلعوني غرفة الولاده الساعه ٥ العصر وجلست الى ٧ العشاء جات الدكتوره تكشف طلع نفسه ٢ ونص 😳😩 انا خلاص جلست ابكي لأني تحطمت وتعبت كان الالم قوي 😰قالتلي عندك عنق الرحم سميك و جات اعطتني طلق صناعي وابره تلين الرحم وبعدها صرت اتلوى في السرير من الالم واعطتني ابره مسكنه وحسيت اني ارتحت وكان كل ساعه يفتح سانتي بس الين وصل ٦ كانت وقتها الساعه ١٠ ونص في الليل وجات على ١١ وشويه الدكتوره بتكشف قلتلها ماأبغى خفت تكشف ويكون لسى ٦ قالتلي براحتك وراحت و شويه احس بزي الدفع وناديت عليها كشفت طلع ٨ 😃انا هنا جاني خوف وفرحه في نفس الوقت الموهيم راحت تلبس وتستعد واحس بدفع قوي جات تكشف طلع ٩ قالت يلا اذا حسيتي بالطلق ادفعي وعلى طول حطتني على وضعية الولاده وكل ماحسيت بطلق دفعت بأقوى شيء والحمدلله حاولت اني ماأصرخ واخذ نفس واكتم وادف والحمدلله يمكن ٦ او ٧ دفعات و طلعت بنوتتي حبيبتي💗💗💗 وبعدها جلست اقول بصوت عالي الحمدلله الحمدلله واعطتني ابره مخدره وكمامه وجلست تخيط والحمدلله ماحسيت بشيء احس كأني في حلم ،، وببس
طبعًا يابنات لاتصرخون لأنو ماراح تستفيدي من الصراخ الّا الالم حاولي تتماسكي وتكتمي كذا حترتاحي وتولدي بسرعه ،،
طبعًا ولادتي كانت في الاطباء المتحدون عند امل صفوت دكتوره صبوره وممتازه وخياطتها تجميلي وحلوه والنيرسات عسل الحمدلله اللي ربي يسرلي وعقبالكم كلكم بالولاده السهله 💜💜💜

الحمدلله علي السلامه بنت المؤمنين ووردة دنياي ومبروك ماجاكم💐 ياليت اللي عندها حل لمشكلتي تسعفني أنا ذابحتني الحموضة والحرقان لدرجة إني ابكي منها بدأت الحاله من آخر السابع استخدمت كل شي حليب لبن خيار ثلج حتي الكمون كل شي اسمع إنه يفيد استخدمته طبعا بدون فايدة رحت الدكتورة وكتبتلي علي حبوب زيداك اسنخدمتها والحمدلله كانت ممتازة وخفت استمر عليها فتركتها ورجعت الحموضة أشد من أول ورجعت للحبوب ودحين في الشهر التاسع وصارت الحبوب ماتفيد كمان أول مره بحملي يصيرلي زي كذا باقيلي كم اسبوع واولد إن شاء الله اخاف تستمر معايا الحاله بعد الولادة خاصة إني استخدمت الحبوب بكثرة ياليت تساعدوني 😣

فارسة الحال من بعضه .. حاولي ﻻتشبعين اذا اكلتي قسمي الوجبه كل ساعتين كلي شي بسيط .. كنت اكل الثلج واكسره باسناني من حرارة صدري والحمدلله واشرب حليب سعودي ..احس اهون يجي من فترة لفترة .. وﻻتنسدحين وقت النوم اﻻ وانتي ساندة ظهرك بمخدات وصدرك ارفع من بطنك