بشر البرتقال واليوسفى احسن منكهة للكيك واستخدامات اخرى

بشر وقشر البرتقال واليوسفى والليمون الفريزر بتاعى ما يخلاش منهم
احسن منكهة للكيك مع الفانيليا بشر البرتقال واليوسفى بيضيع ريحة الزفار نهائيا اكتر من بشر الليمون
طبعا بتحطى شوية مع البيض اثناء الخفق والفانليا بتضاف قبل اضافة الدقيق
انا بجيب كمية من البرتقال كام كيلو اغسلة كويس وبعدين ابشر شوية للكيك والباقى اقشرة واكيس البشر والقشر فى الفريزر وممكن تعملية قشر بس وتاخدى بالواحدة من القشر وتفرمية عند الاستخدام للكيك
اما البرتقال اللى اتقشر باقطعة نصفين واعصرة على مصفى بلاستيك انا باستخدم سكين عريض واقور البرتقال لاستخراج العصير حيبقى عندنا عصير طازج مصفى بجيب علب الزبادى (بغسلها واشيلها بعد ما بيتاكل الزبادى )واحط عصير البرتقال بكل علبة واجمدة فى الفريزر يجى ضيف فجاءة او تحبى تعملى عصير طبيعى لزوجك والاولاد تطلعى اتنين وتضيفى كمية مناسبة من السكر وماء عادى غير مثلج لان علب العصير مجمدة اصلا واضربى فى الخلاط واستمتعى باحلى عصير طبيعى
وبعمل كدة مع الليمون باعصرة واجمدة لانة ممكن يفسد فى التلاجة من تحت لو عندك كمية كبيرة لانى ما استغناش عنة للبرد لو عطس اى عيل من عيالى او حس باى حاجة فى الزور على طول انقطلة واعصرة لة عصرة فى الفم على الزور على طول بسم **** ما شاء **** ينتهى البرد قبل ما يبدا علشان كدة شوية اخليهم من تحت والباقى اجمدة فى الفريزر فى مكعبات التلج او علبة عادى وتكسرى قطع عند الاستخدام
عصير ليمون بنكهة برتقال
مجرد انك تضيفى قشرالبرتقال على عصير الليمون العادى بيدى نكهة جميلة لعصير الليمون ما تعرفيش دة ليمون ولا برتقال واضربى القشر مع العصير وبعدين صفية طعمة جميل وممكن تضيفى اوراق النعناع معاة فى مرة ومرة تانية نعناع فقط ومرة بشر برتقال فقط نوعى وغيرى وكل مرة طعم ونكهة مختلفة وطبعا كل النكهات دى طبيعية ورخيصة ومفيدة مش مضرة زى النكهات الصناعى اللى بتئذى الجسم انا حبيت اتكلم عن استخداماتى لقشر البرتقال واليوسفى للى ما تعرفش او ما جربتش قبل كدة واللى تعرف استخدامات تانية ليهم او غيرهم تقول علشان نستفيد كلنا تقبلوا تحياتى اخواتى الحبيبات عضوات وزائرات