بصراااحة...كم وحدة منكم تستحي من زوجها لما تسوي لووك جديد ؟؟!!

السلام عليكم و رحمة الله و بركاته ...

الصراحة سؤالي هو مشكلتي !!!
كم وحدة منكم تستحي لما تسوي لووك جديد لزوجها ... يعني تغير في شكلها و لبسها و شعرها و مكياجها و حتى عطرها و طريقة كلامها !! :33:


أعترف اني مقصرة بهالناحية على نفسي و على زوجي !!
خبري بالكشخة أول سنتين زواج ... و الحين مع العيال و المشاغل أهملت نفسي بصراحة ...

زوجي ما تذمر ليلحين !! يمكن تعود على شكلي :07: :07: :07: بس موبعيدة انه بيزهق من منظري و يطالب بالتغيير ...

العيب فيني ... و أدري بمشكلتي ... و الله يشهد اني أحاول ... بس أستحي يا بنات !!! <<< (( أدري بتقولون وش هالخبال عندها عيال و تستحي !!! ايييه والله أفتشل !!))


أقرا كلامكم في المنتديات ... و أتحمس ... و أبدأ أول الخطوات ... فجأة ... أهون وأوقف عملية التغيير !!!
أشتري ملابس جديدة للبيت ... و لما ألبسهم و أحط مكياج و أسوي شعري عدل ... أطالع نفسي بالمراية ... أستااااااانس و أتشقق !! :D لكن من أسمع صوته داخل ... اسم الله عليكم .. أتخسبق و أعتفس ... و على طول ألبس الروب وأمسح الحمرة و ألم شعري بالكلبس على طول !! تقولون كاشخة للمراية !! :08:

الصراحة ... أحس نفسي هبلة خبلة !! و أخاف لا ينقد علي و يقول شعندها ذي كاشخة ؟؟!! وش تبي ؟؟!! عاد ... يقعد ابليس يوسوس لي و يقول لي أكيد بيضحك عليك !! أكيد بينقد !! أكيد بيقول بعد ما شاب ودوه الكتاب !! (( بس ترى ماصار لي عشر سنين متزوجة ... ))
مدري و الله وش فيني ... مع اني عند الحريم شزيني .. أكشخ و الكل يمدح ...
بصراحة ... أخاف أكشخ و ما يمدحني زوجي :08: ذيك الساعة آآآآآآآآآه يافشلتي ...

المهم خواتي ... أبي نصايحكم و خبراتكم في هذا الموضوع ...
* كيف أتغلب على الحيا اللي من غير داعي و مهوب في محله ...
* و ما هي الطرق الأفضل للتغيير ... حبة حبة !! و الا حتة وحدة !!
* و ما هي أيضا أسوأ الأحتمالاات اللي ممكن تحصل بعد التغيير الفاشل ؟؟!!


و سلاااامتكم و تعيشون ...
... و معا... يدا بيد ... نحو خطوات جريئة للنيو لوووك !!!