هلا وغلا بحبيباتي
وحشتوني مررررررررررررررة ورجعت لكم بكيكة لزيزة جداً ويارب تعجبكم
هي شكلها غريب بس والله العظيم طعمة وتشبه كيكة البركان
نجي للمقادير
حضري في طاسة كبيرة
1ك دقيق
1ك سكر
نص ك لوز مجروش
3م ك كاكاو
1م ص باكنج بودر
رشة ملح
اخلطيها مع بعض
وفي طاسة اخرى ضعي نص اصبع زبدة سايح
بيضة مخفوقة مع قليل فانيليا
و3/4 ك حليب سايل
اخلطي هذا الخليط جيدا بالملعقة او الشوكة
اضيفيه للخليط الاول واخلطي تمام واذا شفتيه ثقيل شوي
اضيفي قليل جدا من الحليب
ضعي هذا الخليط في صينية دائرية صغيرة مدهونة او مستطيلة برضه تكون صغيرة
نجي الان لاهم حاجة
خذي مقدار
نص ك سكر اسمر
و3م ك كاكاو واخلطيها ورشيها كلها على سطح الكيكة
وبعدين وهو الاهم خذي 1ونص ك ماء مغلي وصبيها على الكيكة
لاتخافي ماراح تخرب بإذن الله المهم بعد صب الماء دخليها على طول في فرن
حرارته 350 درجة
واتركيها لمدة ثلث ساعة وعموما ماراح يزيد الوقت عن نص ساعة
لانه احنا نبغى يبقى فيها شوية صوصو من تحت
في فترة وجودها بالفرن تكوني جهزت كور الايسكريم
بالنسبة لي انا كورت كور الايسكريم من العصر وصفيتهم في صحن وغطيتهم ورجعتهم للفريزر
عشان مايروح وقتي في تكوير الكور وتنشف الكيكة لانه اهم شيء يكون فيها صوص والصوص
هذا راح يتكون من السكر الاسمر والكاكاو والماء المغلي اللي صبيناه على الوجة
وراح يتكون اسفل الكيكة مو اعلاها
المهم واعملي اشكال زخرفية من الشوكولاته مثل ماهو موضح بالصورة
وساعة التقديم حطي اعملي خطوط عشوائية بشوكولاته سايلة
ثم قطعة من الكيك ومعها ايسكريم وفراولة وشوكولاته مزخرفة ورشي الطبق بسكر بودرة
وبالهنا والعافية
وهذه الصورة مرة ثانية
اتمنى تعجبكم
واذا اعجبتكم راح انزلكم كيكة التخرج اللي عملتها لبنتي
ما صدقت لما شفت اسمك ..على طول دخلت اتأكد انت والا غيرك ما خذه الاسم ..
والله انت منورتنا وما ننسى افضالك واطباقك الرائعه ..والله لا يحرمنا منك ..