بصــراحـــه أجبرتـــوني أكتــــب الموضوع بهـالطريقة

السلام عليكم ورحمة الله وبركاته


<--------<< داخله ومشمره عن سواعدها :mad:

:) أمزح وياكــم .. أخباركم بنات حواء ؟ عساكم طيبين ومرتاحين ؟



الغاليات ..

قبل كم يوم وانا في بالي موضوع ناويه اكتبه في المنتدى .. بس قلت بالاول راح انسقه وادلعه واكشخه .. وبعدين اطرحه بين ايديكم ..:39:

بس قبل شوي قريت موضوع خلاني انجبر احطه الحين عشان أبرد عن مكنون قلبي .. ما اكذب عليكم مشمره عن سواعدي شوي لا تخافون :27:


حبيباتي هي مجرد نصيحه لوجه الله .. كثيره المواضيع اللي تطرحها البنات .. بغرض انكم تنصحونهم او انكم تدعون لهم .. او تقولون رايكم بالموضوع

وبعض البنات الله يسامحهم مرات عواطفهم تحكم على ردودهم .. يعني اول شي يخطر في بالهم يكتبونه .. انا مثل الغالبيه .. تنطبع في بالي فكره اوليه حابه اكتبها .. بس ارجع للمنطق واحاول اكتب المنطق مو رايي الشخصي .. يعني المفروض نحاول نقول الكلام الصحيح والمناسب .. بغض النظر عن تفكيرنا .. وما يصح الا الصحيح ..


الحين اكيد بتقولون خلصينا شو تقصدين ..


خواتي العزيزات

في بهالزمان ناس لازالوا متخلفين .. او ما نقول عنهم متخلفين .. ولكن عاداتهم وتقاليدهم لازالت مسيطره على حياتهم .. ناسين ان الايمان وشرع الله فوق كل شي ..
فتلقونهم في موضوع الحرمه اللي تجيب بنات 4 او 5 او اكثر موضوع حساس عندهم ... بعضهم لانه يشوف انه عار .. والبعض الثاني لانه يشوف في الولد السند اللي بيلاقيه .. وفي الولد يشيل اسم الاب والعايله ..


وفي ناس فاهمين الدين والدنيا صحيح .. وعارفين ان الاناث والذكور كلهم رزق من الله .. والحمدلله .. وربنا يكثرهم




بس عتابي لكم يا خواتي .. لما تطرح بنت موضوع انها جابت بنات .. ان في بعض البنات تكون ردودهم في غير محلها ؟؟؟

يعني مثل ما عليج البنت احن من الولد .. الولد اذا كبر .. يهتم بزوجته ويترك امه وابوه .. الولد .. يطلع يصيع بالشوارع .. الولد عاق الولد ..الولد .. الولد .. تخلون اللي عندها أولاد تعيش حالة رعب وخوف من المستقبل ومرات تحس انها تكره عيالها !!!!

يعني يرضيكم هالمشاعر اللي تكونونها في قلوب امهات الاولاد


الرسول عليه الصلاة والسلام يقول : من كان يؤمن بالله واليوم الآخر ، فليقل خيرا أو ليصمت .. الى اخر الحدييث


يعني عزيزاتي تبون تريحونها بالكلام الطيب .. ما اختلفنا ..

والحمدلله الكلام الطيب كثير .. والتذكير بآيات الله عن الرزق .. وبأحاديث الرسول عليه الصلاةو السلام من انسب الردود

ذكروها ان في بعضهم محرومين ويتمنون ريحة هالبنت ..

ذكروها ان في بعضهم اطفالهم معوقين ...

ذكروها ان في بعض الحريم وياهم 7 اولاد او اكثر ويتمنون البنت ..

ذكروها بقصص عن عقوق الولدين من النوعين يعني البنت والولد .. وانها لا تفكر انها جتها بنت وبس .. بس تدعي ان الله يرزقها برها ويصلحها لها ولابوها .. وينبتها نبات حسن

قولولها اللي يجيب البنت يجب الولد ...


بس مو تذكرون عيوب الولد وتألفون من عندكم ان البنات يجي وياهم الرزق !!!
يعني بذكركم مثل مافي اولاد صايعين .. في بنات صايعات .. مثل مافي اولاد مشاغبين .. في بنات مشاغبات .. مثل مافي اولاد سليطين اللسان في بنات سليطات اللسان... يعني الخير والشر موجودين .. في الولد والا البنت
اتوقع ان هالموضوع على حسب تربية الاب والام ورزعهم في قلبهم حب دينهم .. هذا اللي يحدد حنانهم واحترامهم لامهم وابوهم وخوفهم من المعاصي والعصيان .. وابتعادهم عن قلة الادب



أول ما تكون الوحده حامل .. المفروض .. اول شي تحمد ربها وتشكره على هالنعمه اللي حرمها ربي لبعض الناس .. ورزقها لها ولغيرها ..

ثانيا .. تدعي ان الله يتمم حملها على خير .. ويحفظ لها جنينها من كل مرض واي تشويه ..

ثالثا .. تدعي ربها .. ان يرزقها بر مافي بطنها .. ويجعله من الذريه الصالحه بغض النظر عن انه ولد والا بنت ..



هذا كل اللي في قلبي .. اتمنـــى ان أي وحده تقرى الموضوع .. ترجع تقراه مره ثانيه .. واتحاول تفهم انا شو قصدي بالضبط


اتمنــى محــد تشيل بخاطرها مني


أحبكــــم في اللـــــــــه