بصير عروس جديده ومحتاسه حوسه من بشرتي

السلام عليكم ورحمة الله وبركاته
بنات انا مخطوبة وقريب راح املك ويعقد قراني والعرس احتمال بعد شهرين أو ثلاث شهور بعد الملكه بس، مشكلتي السواد اللي بجسمي دايم قبل أفكر اني مااتزوج والسبب كذا ، ودايم انخطب ونا أرفض وأقول لأمي مابي أتزوج الحين واطلع أعذار من راسي ، المهم حاليا انخطبت ووافقوا علي وانا رضيت عشان أرضي امي وابغى اشوف امي مبسوطه مابي إكسر قلبها ، حاليا احتري نتائج التحليل وراح املك بعدها ، بنات انا افكر وربي بعدين اذا أخذني زوجي كيف البس له كيف بأول ليله أقدر أكون واثقه من نفسي كيف؟ السواد اللي فيني مركتز بالمؤخره كلها وتحتها يعني نهايتها عند مكان الجلوس من الجهتين ( أظن عرفتوه ) حيل حيل اسود مثل الفحم هالمكان عندي وحتى فخوذي مش موحد لونها وربي سوداء وانواع درجات السواد فيني ولا أبالغ في كلامي تفشل تفشل ، والمنطقة الحساسه مفحمه وبين فخوذي واللي حولها دمار شامل من السواد لدرجه اني كرهت نفسي لتدهنت ماحب اشوف هالاماكن ، وزادت علي قهر الخطوط الحمراء بجسمي وربي اكتب ونا ابكي من القهر اللي فيني تخيلوا توني بنت وفيني خطوط ، المؤخرة عندي كلها كلها فيها خطوط حمراء من بدايتها لما نهايتها ، حتى مكان الجلوس الأسود نهاية المؤخرة عندي فيها خطوط حمراء وكثيره ، ماجتني إلا يوم سمنت كمن كيلو عشان يصير وزني مثالي وجد صار مثالي لكن الخطوط خربت علي جسمي قسم بالله مااقدر ارفع ملابسي واشوفها واتذكر اني راح اتزوج أحس العبره تنشبني ودي ابكي ، الخطوط الحمراء اللي معي على المؤخرة كلها وعلى ساقي كله تخيلوا حتى ميدي استحي البس قدام زوجي المستقبلي اذا تزوجت ، وعلى فخوذي كلها مخططه ، والسواد على ركبي والقدم عندي أسمر والسبب كان معي اكزيما بجسمي كامل من صغري والحمد لله راحت لكن الحين صار جسمي الاغلبيه أسمر والسبب آثار الاكزيما اللي معي ، وحول عيني طلعت لي هالات اغمق من لون بشرتي الاساسيه بدرجه وشوي ومكان الشنب عندي متقرح والسبب الحلاوه تصلخ مكانها وبعدها صار فيه آثار تصلخات احط عليها مكياج تخف من بعيد أما إذا أحد قرب ودقق مع المكياج طبعا راح تبين ، انا قبل كنت اشيل بالخيط وسبب لي حبوب كثيره بمكان الشنب وتركته عشان كذا شلت بحلاوه وصلخت عمري وجبت العيد لنفسي لاني شديت بقوه وعدت على المكان مرتين ماكنت اعرف، ويدي كان معي اكزيما شديده فيها من صغري ويوم كبرت حاليا عمري 22 سنه الحمد لله خفيت كثير بس المفاصل عندي سمراء واصابعي لونها طبيعي لكن لون ظهر الكف عندي أسمر ، ساعدوني بنات والله حالي مايعلم به إلا الله ، انا كنت من زمان ودي اروح مستشفى جلدية اعالج السواد والخطوط لكن من قلت لأمي قالت بعدين بعدين لما الحين زاد السواد وكثرت الخطوط الحمراء اللي فيني وإلى الآن أقولها تقولي بعد الملكه اوديس تو الناس ، وأنا الصراحه ودي اسوي أي شي عشان مايجي عرسي إلا قد راح ، لكن إذا تأخرت خوفي مايروح بسرعه ، خوفي اذا بديت علاج بعد الملكه ابوي يعجل بالزواج واتورط وخوفي النتايج ماتبين إلا بعد مده طويله عشان كذا ابي أي علاج مجرب من الصيدلية أو بالبيت يزيل أو يخفف من السواد في الأماكن اللي قلتها لكم ، وانصحوني يابنات والله انا جاهله بهالامور ماعندي خبره كثير ، وأحس اني اتحطم اذا أحد جرحني ، وأنا أتمنى اكون عند زوجي كل شي وينبسط مني من كل ناحية وأبغى مساعدتكن حبايبي ابي أكون واثقه من نفسي ،
وأنا الحين تقريبا تقريبا اذا بديت من الحين بيكون عندي فرصه ثلاث شهور أو شهرين ورجاء اللي تدخل وتستهزء على موضوعي أو تكتب رد قاسي رجاء لاتكتب انا مو ناقصه إحراج وتحطيم ،




ومن ناحية المكياج انا يابنات مو ذاك الزود اعرف للمكياج لكن الشي اللي مجنني مااعرف اختار لون البودرة وكريم الأساس المناسب للون بشرتي . بنات انا لون بشرتي حنطيه فاتحه اميل للبياض على خفيف وأحيانا يسموني بيضاء على صفراء فهمتوني .
بالله ايش لون الكريم والبودره المناسبه لي علما أن بشرتي نوعيتها مختلطة




بالله يامشرفات لاتنقلون موضوعي لقسم الاستفسارات لاني مااشوف فيه تفاعل كثير