كيف الحال ياحلوات؟؟
قبل فترة (كنت جالسة في العصرية لا بيا ولا عليا) طبوا علي خواتي فجأة بدون سابق إنذار
وطبعا أختكم في الله يومتها كانت مقررة تأخذ إجازة من المطبخ
فقلت مبدهاااااااااااااش لازم نقطع الإجازة (يافرحة ماتمت )
مو مشكلة يستاهلوا حبيباتي نقطع الإجازة عشانهم
وبعد حوسة ومشاورات ومداولات معاهم قررت أسوي لهم بسبوسة عالسريع
مع القهوة
وهذي صورة لهامع القهوة لأول وحدة ترد بصفحتي قبل ماأبدأ بطريقتها
المقادير ::
كاسة ونص سميد
علبة قشطة
نص علبة حليب نستلة
ملعقتين حليب بودرة
ربع اصبع زبدة
6حبات جبن كيري أنا أحط اربع
ملعقة بيكنج بودر
شيرة(لكل كأسين سكر كأس موية وقشر ليمونة أوبرتقال ورشة فانيلا وملعقة صغيرة زبدة) توضع جميعها عالنار لحد مايذوب السكر وتصبح الشيرة متوسطة لاهي ثقيلة ولا خفيفة
الطريقة ::
**نخلط القشطة والنستلة والحليب والزبدة والكيري في الخلاط لحد مايتجانسوا
**بعدها نضيفها عالسميد والبيكنج باودر ونخلطها بالمضرب أو الملعقة الخشب بسرعة ونحطهابالصينية ومانطول في الخلط وهذي خطوة
أساسية عند عمل البسبوسة عشان ماتصير ناشفة ويابسة بعد الخبز
**ندخلها الفرن لحد ماتتحمر من تحت ومن فوق
بعد مانطلعها نسقيها بالشيرة وهيا حاارة مع مراعاة إن الشيرة لازم تكون باردة
ونقطعها بالشكل اللي نحب وهذي صورة مقربة لها
وعشان كنت مستعجلة ماصورت الخطوات
بعد ماتقهوينا وسولفنا وعينا من الله خير فكرت إيش أسوي عشاء
قلت خليني أسألهم فإيش نفسكم؟
عاد أختي حامل(الحمد لله أمس ولدت) قامت تتدلع كل شوية لها شي لما طفشتني وقررت أسوي إللي في رأسي
طبعا مكرونة باشميل بالتونة أسرع من حوسة اللحم والدجاج ولذيذة خاااااااااالص
نخش عالمقادير والطريقة مع بعض..
سلقت باكيت مكرونة سباجيتي في موية وملح وشوية زيت
وأعذروني على ردائة الصورة كم صورة صورتها وتطلع مو واضحة بسبب البخار
وبعد ماأستوت صفيتها وغسلتها بموية باردة من الحنفية
بشرت حبة بصل عشان زوج أختي مايحب البصل باين في الأكل وحمرتها بزيت
وحطيت عليها شوية ثوم وعلبتين كبيرة تونة مصفيتها من الزيت وحبتين طماطم معصورة وملعقتين صلصة وحبة ماجي وملعقة صغيرة بهارات لكل من (كمون -كزبرة-قرفة مطحونة-بهارات الوالدة الله يحفظها)
ورشة بهارات إيطالية وفلفل رومي (العادة أحط جزر مبشور بس برضوا زوج أختي مايحبه)وملح
وقلبتها وغطيت عشان تتسبك(طبعا ماتخذ وقت عالنار 10دقايق تقريبا وربع ساعة لوكانت على نار جدا هادية)وماننسى نقلبها كل شويتين عشان ماتنشف وتنحرق
(صور الخطوات هذي طارت ماأدري وين )
نجي للباشميل بماإني مستعجلة حطيت عباس على دباس إختصار للوقت
حطيت 8ملاعق دقيق وستة ملاعق حليب بودرة
وعلبة قشطة وحبة ماجي وملعقة شاي اجينو موتو ورشة ملح وشوية زيت وحطيت موية باردة وحركتها وصارت سائلة مرة وحطيتها عالنار طبعا مع التحريك المستمر عشان ماتتكتل
لحد متصارت ثقيلة شوي بعد كذا طفيت عليها
نحط تقريبا ربع كمية الباشميل عالمكرونة ونقلبها مع بعض
ونفرد نص كمية المكرونة في الصينية
ونوزع عليها التونة بالتساوي
نغطيها بباقي المكرونة ونصب عليها باقي الباشميل ونوزعه بالملعقة بحيث يغطي المكرونة كلها
ونقطع شرائح زبدة صغيرة
نوزعها
على اطراف الصينية وفي الوسط نحط شريحتين
وأنا أحب أرش عالوجه بقسماط يعطي نكهة خطييييييييييرة وبعض أحيان جبنة موزاريلا
وهنا رشيت بقسماط بس ماكثرت ارضاء للذوق العام
ندخلها الفرن على درجة حرارة 350 فهرنهايت (180درجة) لمدة ربع ساعة من تحت
ثم نحمرها من فوق أنا هنا أستعجلت عليها عشان الوقت متأخر فخليتها فاتحة شوي
وقدمت معاها عصير أصفهاني عمايل إيديا
(لأن أخواتي كان نفسهم فيه)
أرجو عدم الرد لحد ماأكمل
طريقة عمل العصير الأصفهاني:::
3كاسات عصير مانجا (المراعي أو تروبيكانا) أنا أفضل هذي النوعين
كاسة لبن سايل أو 3ملاعق لبن زبادي
سكر حسب الرغبة
4ملاعق حليب نيدو
ممكن نحط ثلج إذا حبينا
نضعهم في الخلاط ونخلطهم جيدا
عند التقديم نصب في الكاسة ملعقة فيمتو مركز ونصب عليها العصير حيعطينا نكهة وتمويجات رهيبة
وعواااااااااااااااااافي على قلوب الجميع
بإنتظاااااااار رد