( بطـــــــاقة معـلمة ) ! بدلاً من شهادة الشكر !! في يوم تكريمها ... !!

قصيدة رائعة للأستاذة منيرة الحمد
وفقها الله
اترككم مع القصيدة
بطاقة معلمة




أشرقت شمسـي وبانـت
فيـك يايومـي وزانـت
وفرصة التعبير .. حانت
عن همومي في سفرهـا
قمت انا اسابق صباحـي
وكل طفلٍ لـه صياحـي
ذاك قام .. وذاك طاحـي
وقصتي .. كـلٍّ خًبًرهـا
يوم.. لملمـت الشتـات
بين هاك .. وبين هـات
والخطـاوي مسـرعـات
حالتـي ربـي ستـرهـا
جيت للطابـور اركـض
وساعة التوقيت ترفـض
ترفع بضغطي وتخفـض
عجلةٍ مـا احـدٍ باثرهـا
سطّروه الخـط الاحمـر
مانفع ركضي ولا اثمـر
والحيا بالوجـه الاحمـر
والعيون ارخَـت نظرهـا
رحْت والشكوى على الله
لايفـوت الوقـت كـلـه
والفصل بالسيـب جِلـه
يامعيـن اللـي زجرهـا
كدّسـوا فـوق اربعينـي
كـل يـوم مسجليـنـي
والوضـع الله يعيـنـي
تشكي الغرفـة خطرهـا
والمكـيـف ياسـيـادة
ودّع الـواقـع بــراده
عنـدي لموتـه شهـادة
وغيمتي هلّـت مطرهـا
وابتديت الدرس واشـرح
ذي تنام وذيـك تسـرح
وذي تبي تضحك وتمرح
ماتهـاب اللـي نَهَرهـا
وطقّـت البـاب البنيـة
ما اسْتحت بدري شويـة
وادْخَلـت عيـنٍ قـويـة
ويل مثلي لـو عسرهـا
ليـه تـوك تحضـريـن
فاتـك الـدرس الثميـن
جاوبتـنـي تعـرفـيـن
الدشوش اعشق سهرهـا
ماعلـى مثلـك عتابـي
الولي وان كـان غابـي
اللـوايـح ماتـغـابـي
بس انا اللي في نظرها ؟!
صفّـرت والصفـر زادي
صـار شـيٍ اعتـيـادي
وش يفيـد الاجتـهـادي
والنتايـج مـا تْخَسِرْهـا
كـل فرصـة للنجاحـي
هيـأوهـا بارتيـاحـي
لين ساح العلـم ساحـي
الحقوا باقـي ثمرهـا !
وقالـوا امشـي لـلادارة
وتعرفين اصـل العبـارة
أصـدر المكتـب قـراره
مثل وضعـك ذا قِدَرهـا
للنـدب لـو قـلـت لا لا
شفـت بالظهـر الهـلالا
آه ياضـيـق المـجـالا
والخواطر مـن جبرهـا
ليت في الوقت اتساعـي
والصدور ايضا وساعـي
كـان اعبّـر باقتناعـي
عن همومٍٍ مـا حَصِرهـا
واسمحوا لي في كلامـي
اقترح مسـك الختامـي
عـل يحظـى باهتمامـي
عنـد مسئـولٍ حضرهـا
ليت فـي يـوم المعلـم
ما نخصـص بـل نعمـم
فالبطـاقـة للمـعـلـم
رمز شكر اللـي شكرهـا