بعدي عن زوجي .

السلام عليكم ورحمه الله و بركاته .
مشكلتي اليوم أقرب ما تكون للفضفضه و لعل وحده منكم لها رأي سديد او مشوره ما فكرت فيها ..


انا متزوجه من 9 شهور ..
موظفة في قطاع خاص لكن الراتب ممتاز جدا الحمدالله بعد خطبتي شرطت بالعقد وظيفتي واني ما راح اتركها مهما كان ولا لزوجي الحق يمنعني عنها ووافق على الشرط
زوجي و أهله في محافظه
وانا واهلي و وظيفتي في مدينه تبعد 350 كيلو
من وقت خطبتي لزواجي والى اليوم وانا ابحث عن وظيفه هناك في هالمحافظة وما جاورها لكن ابدا ما لقيت ولا شي لي فوق السنه أبحث واقدم لكن فعليا مالقيت ولا شي مع ان شهادتي وخبرتي مطلوبات لكن في المدن الكبيره :(


خلال هال 9 شهور انا الي اروح له و لـ بيتي انظف وارتب واغسل ملابس زوجي وياخذ حقه الشرعي وأرجع لاهلي
أسبوع أروح له واسبوع لا يعني مرتين بالشهر بمعدل 4 ايام كل شهر !
وللأسف هو مايجي يرفض واحيانا يعصب و يقول تحملي أنتي الي شارطه هالشرط
جا مره او مرتين خلال هالأشهر لكن مو لي مع اهله او لشغل ويمرني يسلم علي اهلي بس وما ياخذني من عندهم ..
مره طلبت منه يمرني نطلع نتعشى ومرني واخذ اهله معنا وكانو متنرفزين ويبررون انهم مصدعين وجايين للسوق و موقفي كان جدا يفشل


تعبت وتعبت حياتي من الروحه و الرجعه والتفكير حتى الراتب صرت ما استمتع فيه ..
نحفت من الشغل اذا رحت يومين فعليا ما ادري وش اسوي انظف البيت واغسل الملابس واروح لاهله اسلم عليهم و يبيني اقابله بوجه مبتسم وما يبيني اقوم واخليه ويرفض اجيب خدامه بالساعات تساعدني ..
الحمل مؤجل الى اجل غير معلوم يعني ما خططنا بعد سنه او سنتين او ثلاث تاركين الموضوع لان ظروفنا صعبه وماديا عليه قرضين .. وتقريبا شبه يصرف على اهله
أحس حياتي فارغه ولا هي واضحه حياتي معلقه بهالوظيفه وتشتتي كله منها .. أخاف استقيل واروح هناك ما القى شغل وماديه زوجي ضعيفه
و بكون هناك لحالي لا عندي أهل ولا شي و علاقتي بأهله رسميه جدا .. ف بقابل الجدران :(
زوجي تعود على غيابي وصار ما يعني له .. الفتره الي راحت أأجل جيتي أجلس اسبوعين ما رحت ابيه يجي يقول لي اشتقت لك , تعالي , متى بتجين ؟
تخيلو يقول لي براحتك بتجين تعالي , ومره قال لي لا انا مخطط انك ما تجين بطلع أكشت :)
يعني فعليا صار ما يعني له انا جيت او لا ... الشيطان لعب بعقلي و تفكيري صرت أوسوس لـ انه كم مره يطلع من الدوام او ما يداوم ويروح البيت ويسأل عن القهوة والصياني الزينه و البخور مع انه مافيه مكان ببيتي ل استقبال رجال ابدا .. ممنوع المس جواله مجرد لمس ويدخله معه بكل مكان حتى الحمام .. وقايل لي لو اموت لا تلمسين جوالي وهو بالمقابل نفس الشي ما يلمس جوالي ابدا .. لكن انا عادي افتحه واعطيه اياه لو بوريه صوره او شي هو لا يقول لي اصبري برسلها لك :(


ما ادري فعليا وش اسوي ما ابي اخسر زوجي ولا ابي اخسر وظيفتي واحترت جدا و تعبت ..
طبعا زوجي مستحيل ينقل ويجي عندي لان قطاعهم مو موجود عندنا فما فيه أمل ..