بعد اربع سنوات من الحرمان ولدت بنتي وماتت جدام عيني

:icon33:السلام عليكم ورحمة الله وبركاته

أول شي أنا اسفه لو موضوعي ضايق اي وحده فيكم

بس انه حابه افضفض من همي شوي

ويمكن تصيبني دعوه صالحه منكم وربي يعوض علي لأن نفسيتي للحين تعبانه مع انه خذ للموضوع اكثر من شهرين


....

الموضوع ومن غير مقدمات

ان الله ما كتب لي الحمل 3 سنوات ونص وبعدها قررت اعمل عملية أطفال انابيب لأن الحرمان ألمه فضييييع لا يقارن بألم كنت ايام كثيره ابكي دم وانا اتمنى يكون عندي طفل ,,, واحس بالنقص في عيون الناس ,,, وكانت الناس تسألني عن تأخري في الحمل كثير ,,, ناس تبي تطمن علي وقلبها معاي وناس تتشمت فيني وتتشفى ,,,, لدرجة صرت ما أحب أختلط بالناس ,,,, مرات كثييييره أحاول اكذب على نفسي وأقول انا سعيده بحياتي والأطفال ماهو شي ضروري دامني سعيده ,, وبالأخير غريزة الأمومه تصحيني وأنا غرقانه بدموعي ,,, مرات اتصل على امي أسألها لمن انا اشتغل وادرس واتعب ,,, مجرد اضيع وقت واجلس ابكي ,,, لين قررت اعمل اطفال انابيب مع ان زوجي مو مقتنع بالمررررررررررره حتى لو ما نجيب اطفال ابد وامي رافضه الموضوع ولكني اصريت حتى الدكتوره قالت لي انتي ما تحتاجين للأنابيب ولكنج لو مصره اعمله ممكن تحملين برياضه طبعا انا سويت رياضه وما حملت وممكن تحملين بعلاج ولكن نفسيتي كانت تعبانه فما راح استحمل اتعالج وافشل واتعالج واكرر الفشل

وبديت اخذ الابر والادويه المقدمه للعمليه وهي متعبه للغايه اكثر من تعب الوحم الين موعد سحب البويضات وبعد السحب بدت مرحلة الآلام ... صار عندي كل مضاعفات العمليه آلااااااااام فضيعه جدا وبعدين صار معاي ماي بالبطن متجمع وعملت عمليتين سحب للماي وخلو لي ببطني هوز لمدة 20 يوم ينزل منه 6 لتر يوميا فيه كل خلاصة المواد الغذائيه اللي تدخل في جسمي الين صرت مثل الهيكل مع اني آكل وكنت ما اقدر اتنفس لأن الماي وصل عندي لتحت الرئه وصار يضغط على الرئه والمعده فما اقدر آكل او اشرب شي ولا الماي ورغم هالشي كنت سعيده بيوم ترجيع الاجنه ويوم عرفت اني صار حمل وطبعا ابتدى الوحم لمدة 3 شهور كان عندي وحم شديد كان احساسي اني حامل بولد ولكن فرحت يوم دريت انها بنت وبديت اجهز لها من كنت بالرابع اشتريت لها كل شي حتى اللعب متخرعه بالحيل كنت احبه وهي في بطني حب مو طبيعي كنت اسولف معاها ومع ملابسها واغني لها كنت اعشقها احسها حلمي اللي انتظرته سنين وجالس يتحقق وكنت اخاف عليها خوف مو طبيعي لو احس بنغزه ببطني ابكي وعلى طول المستشفى ,,,, رغم انها لسى ببطني لكني كنت احس انها دنيتي كلها ,,,,

بالرابع صار معي شد بالظهر وألم فضيع ما كنت اقدر اتحرك ساعات من الأم ولا يفيد البندووول معه هذا بعد ما خلص الوحم ,,, لكن اول ما دخلت الخامس حسيت نفسي صرت خفيفه وطبعا حركتها زادت وصارت واضحه لما تتحرك بالليل ما انام من الفرحه ومرات كثيره احضن ملابسها وانام واذا شي من اغراضها قدامي ما اعرف انام اغمض عيني وافتحتها اشوفهم واتخيلها فيهم وافكر دوم هي تشبه من تشبهني والا تشبه ابوها .... بتقولون اللي اسويه مو طبيعي ... لهفتي ان يكون لي طفل كانت كبيره كنت احبه بشكل مو طبيعي بجد وامي كانت خايفه علي من هالشي وابوي كان يقولي لا تشترين اغراض هالقد للطفله لأنها تكبر بسرعه كنت اتمنى اني اولدها واهديها الدنيا بما فيها لأني احسب انها راح تهديني اكبر فرحه بحياتي ,,,,,,,

ودخلت السادس وبدا بطني يكبر وانه احبه اكثر واكثر ,,,, وبيوم كنت جالسه لا لي ولا علي في بيت اهل زوجي ولهم وحده الله يثبت لها حامل بس تعبانه ممنوعه من الحركه المشيمه عندها نازله وكانوا يتكلمون عنها وزوجة اخو زوجي جالسه يمي ومن غير مقدمات كنت سرحانه وربي الا حطت يدها على بطني وقالت لي ((( حمدي ربك انتي تروحين وتجين وتتحركين وتسوين كل شي والطفل في بطنك ما فيه ولا شي ولا تحاتينه حتى اغراضه اشتريتيهم من الحين حمدي ربك وسألتني انتي تنامين مع زوجك عادي وانتي حامل قلت لها اي ما عندي مشكله _ على نياتي_ وكان اذان المغرب قمت عنها ورحت صليت بس حسيت قلبي منقبض أخذت اغراضي وجيت اطلع قالت لي اخت زوجي قعدي معانا قلت لها احس نفسي متضايقه وقلبي مقبوض ومختنقه ما ادري ليش بروح بيت امي تعبانه ,,, وانا ولا على بالي والبيبي حركتها زينه ما في شي مخوفني والحقيقه ما في شي تاعبني غير قرصة قلبي ورحت بيتنا بس انا حاسه نفسي مخنوقه ومتضاقه من غير سبب بجد اتصلت على زوجي وقلت لهاني متضايقه مو حابه اقعد مع اي احد او اشوف احد تعال نطلع نروح شقتنا وفعلا رحنا وقعدنا ساعات نسولف ونمنا وانا نمت على نفس الحاله وافكر ليش حاسه بهالاحساس جلست الفجر صليت واخذت حبة الحديد ونمت ورجعت جلست الساعه 9 الصبح الله يعزكم اروح الحمام قلت وارد اكمل نومي يوم اجازه السبت عندنا بالبحرين والعاده نطول بالنوم انا وزوجي بالاجازه بس بعد ثاني خطوه ومن غير الم او اي مقدمات شفت ماي ينزل ما بين ارجولي ما استوعبت في البدايه بس وانا اشوف تواصل الماي عرفت ان ماي الياهل قاعد ينزل صدمه ما كنت اتوقعها صحيت زوجي وانا في حالة انهيار وهو قام من الخوف بسرعه وصلى ركعتين لله واخذني ورحنا على العياده وحاولت الدكتوره انها ترفع الجيس لأن الماي حوالين الياهل كان جيد وتسوي لي ربط لكن وهي تحاول ترفعه انفتح واتصلوا بالاسعاف ياخذني على المستشفى على طول للحين انا ما استوعبت اني راح اولد لأني بس 26 اسبوع ما كملتهم بس كنت من خوفي على الياهل والماي ينزل عنها ابكي بشده وبس وصلت المستشفى سمعت الممرضه تكلك زوجي وامي وابوي وتقول لهم ليش ما خبرتونا قبل لا توصل يمكن ما في حاضنه للبيبي فعرفت اني رايحه في ولاده مع ان ما عندي الم ابدا بس الماي مو واقف فبديت بالانهيار والبكاء بشده ومن يكلمني اصرخ فيه يتركني في حالي بعد خلاص ما في شي يهديني .... وكان هاي بداية موت الحلم

نقلوني لجناح الولاده وهم ينقلوني على السرير حسيتهم ينقلوني في قبري والله حضنت زوجي وكأني اودعه وانا منهاره من البكاء وقلت له خلاص انا بولد قالي المهم عندي سلامتج كنت ابي استوعب كنت ابي يقولي لا ما بتولدين كنت اتمنى اني للحين نايمه وهذا مجرد كابوس وهو لو كان كابوس كان بكون ابشع كابوس بحياتي بس كان واقع شديد البشاعه ,,,, ما كان عندي طلق ابدا ومثل ما قلت الماي ما يوقف وما في حل بأي لحظه ممكن ادخل في حالة ولاده وخصوصا ان البيبي صغير وايد ورفعوا رجلي فوق ونزلو راسي بالسرير تحت وقالو لي ممنوعه من اني اتحرك اطلاقا عن هالوضعيه الين اولد او تستقر اموري ويوقف الماي ويقدرون يسووون لي ربط ,,, ضليت بهالحاله والنفسيه 5 ايام كانوا يعطوني ابر مهدأه لكن ما اهدأ ولا انام حتى الممرضه تقولي انتي غريبه هاي ابر تهدأ جمل بس تخيلوا النفسيه ,,,, بعد الخمسة ايام قرروا اني اصوم ويحاولون يسووون لي ربط يمكن تنجح العمليه ويمكن لا بس المفاجئه ان في هاي اليوم صار معاي نزيف حاد جدا يعني يا اولد او اموت فقرروا لي قيصريه واللي مجربه القيصريه تعرف الامها غير اني بولد وما اعرف مصير بنتي لو ولدتها وهي بهالعمر وولدت

زوجي ملا الغرفه والممر كله ورد طبيعي وجاب اروع استقبال للطفله اللي ظلت بالحاضنه غرفتي كانت خيال والممر كله ريحة الورد كل شي وردي حتى ملابسي اشترى لي كل شي وردي كان يحاول يخفف عني

اكيد تفكرون ماتت بنتي هني لاء

انا تعبت لين حملت وتعبت في حملي وتعبت لين ولدت وولادتي كانت تعب بس ما خلصت القصه هني .........


مع اني والده قيصريه الا اني ما ارتحت يوم واحد من بعد العمليه رغم ان الحركه في منتهى الصعوبه وكنت اقضى معظم وقتي مع بنتي في البدايه كانت حالتها غير مستقره كنت اتفتت لين استقرت حالتها ودت تكبر يعني وصلت للغرق لين آيست لقيت نفسي اتفس فوق الشط تخيلوا بس ما انتهت القصه اربعين يوم بالضبط عاشت بنتي نفاسي بس يعني لكن حالتها بعد اول اسبوع كانت زينه ليش مااتت

سمعت ان في فيروس ينتشر بيونت الاطفال خفت حاولت انقلها لعدة مستشفيات خاصه بس ارفضوا يستقبلونها لأن فوووول ما في مجال قالي الاستشاري اذا الحي اللي انتي فيه كله محترق الا بيتكم وما في مكان ثاني تروحينه ما عندج حل الا انج تضلين في بيتكم وتدعين الله ان يسلمج بس بيتي بالاخير احترق رغم ان كلمت الصحافه وكلمت ادارة المستشفى وسويييت المستحيل ضحيت بأضاحي مرتين وصدقات لدفع البلاء يوميا وصلاه ودعاء حتى تطلع الشمس بس امر الله هو الغالب سبحانه وبحمده على كل حال يوم اللي خبرتني الدكتوره ان بنتي في احسن حال وقريب استلمها واشتريت لها فساتين روووووووعه للعيد طبعا ييت يوم ثاني لقيت عليها الاجهزه

ليش

شنو صار

ببساطه قالو لي الياهل انتقل لها مكروب قوي في الدم صعب نقضي عليه وحتى لو انقضى عليه سمومه في الدم صعب نقضي عليها واغلب الاطفال اذا مو كلهم يموتون ونخسرهم بسبب هذا المكروب طبعا قصوا علي صغر المكان وكثرت الخدج ومسؤولية الدوله وانا في حالة صدمه الطفل اللي يم بنتي مات خلال 3 ساعات من انتقال المكروب له بس بنتي عاشت 5 ايام بعد المكروب لقيتها تتعذب جدام عيني تخيلوا طفل بهالعمر فيه 4 الى 5 ابر سيلان اليد الوحده فيها 2 باليد وبالزند وبالاخير سووو لها قسطره بالفخذ وحطو لها سيلان بعد تخيلوا الدكتور يقول لزوجي عادة اي مريض ينتقل له هاي المكروب يدخل في غيبوبه مستحيل يقدر يتحرك او يكون فيه نشاط الغريب ان بنتكم للحين نشيطه تتحرك وتصيح وتلعب بنتي كانت تحب الحياه بس الحياه ما كانت تحبها ... صوت التلفون كان بالنسبه لي عباره عن رعب كنت اخاف ارجع البيت انام اسمع تلفون يقول تعالوا بنتكم ماتت بس يه تلفون يقول تعالو شوفو بنتكم ترى بتموت الدكتوره تقولي خلاص خل تموت مرتاحه احنا ما بنحال نسوي لها انعاش او نساعدها على الحياه تعذبت كفايه ونخاف لو عاشت تكون عندها امراض ... تقدرون تتخيلوني والدكتوره تقولي والله خلاص انه اسفه بس الياهل بتموت اصلا ما في وقت ان ننقذها

الحمد لله على كل حال

بس حسره بقلبي ما تروح

تخيلوا اني كنت احلم باليوم اللي اولدها فيه احبه ابويه احضنها على صدري

بس انه شفت بنتي اربعين يوم تلعب وتضحك وتصيح وتلعب بس ما حضنتها ولا بستها كانت الممرضه تقولي ما راح اطلعها من الحاضنه بنتج زينه باجر تكبر تشبعين منها وانا كنت احيانا اصيح وبعدين اقول لحالي بلا غباء حمدي ربج باجر تشبعين منها المهم تكبر وتاخذينها وبديت اجهز كل شي لأستقبالها

انتظرتها اتيي بس راحت عني المقبره

انتظرت ألمها .................... بس مريم بنتي لمها التراب والقبر

ثيابها العابها غرفتها اغراضها كلهم عندي بس اهي مو عندي


ادعوا لي الله يعوض علي ويخفف عني لأن نفسيتي كلش تعبانه وسامحوني ان كنت ضايقت وحده فيكم او طولت عليكم ومللتكم




وانتهى الحلم