بعد اربع سنين خلاف سلمت عليها .

انا عندي بنت عمه في عمري تربطنا صداقه من ايام الطفوله .. لكن الحياة تفرقنا وتجمعنا في مناسبات مختلفه ..

من اربع سنوات رزقها الله بطفله وكنت احب طفلتها جدااااااااا.. لكن بعد ذلك حصل هواش بيننا بصراحه هي الي بدائت .. وكبر الموضع بيننا ..

من بعدها صارت في اي مناسبه تشوفني ماتسلم علي .. يعني لما اجي اسلم على الي جنبها هي تظل جالسه وتشغل نفسها بالكلام بالجوال .. او تتحاشاني باي طريقه..صحيح المناسبات قليله جدااااااا

بصراحه الموضوع يسبب لي احراجات كثيره .. ومو عاجبني هالوضع ..

وتقريبا من يومين شفتها في زواج .. قلت لازم احط حد لها الموضوع بروح برجلي اسلم عليها ..

تقدمت لها شافتني على طول لقطت الجوال تسوي نفسها تتكلم فيه وتتصد عني وكانت جالسه وجنبها بنتها عمرها اربع سنين ,,

انا يوم شفتها سوت هالحركه ,, قلت في نفسي تحاول تتجاهلني .. قال لي ابليس ارجعي لا تفشلك ويطيح وجهك ..


بس هذا ماخلاني اتردد .. تقدمت لحد ماوصلت قدامها ومديت يدي ..

هي رفعت راسها وفتحت عيونها كلها تعجب ومدت يدها بذهول .. طمنت عشان ابوسها وقفت وسلمت علي ...

بنات ما تتخيلون اشلون الفرحه في عيونها .. حسيتها بتطير من الفرحه .. ومسكت يدي قبل مااروح واشرت على بنتها وشالتها وقربتها مني .. والدموع ماليه عيونها .. وكأنها تقول لي تتذكرين بنتي الي كنتي تحبينها ..

اخذت بنتها في حضني ..لأنها عزيزه علي مره ,,

هي دمعت عيونها وحضنتني .. كان موقف جدااا مؤثر ..
وانتهى الزعل الي بيننا ورجعنا مثل قبل واحسن ,,

نصيحه لكم يابنات اذا فيه اي شخص بينكم وبينه زعل روحو لحد عنده وابتسمو في وجهه وابدئو السلام .. لا تسمعون كلام الشيطان يوسوس لك ويقول لك راح يفشلك او راح يردك خايب ..
خلي عندك ايمان قوي بكلام الرحمن العليم في قوله ,,
(( ادفع بالتي هي احسن فإذا الذي بينك وبينه عداوة كأنه ولي حميم )) .

بصراحه تندمت اني ماسويت هالشي من زمان ,, لكن المرات الي شفتها فيها بعد المشكله ما تتجاوز خمس مرات ,,