بعد انتظار طويل للزواج وسعادتي فيه .. بتطلق وانا في الشهر الخامس من الزواج

بس مالله الرحمن الرحيم

قبل كل شى بنات اتمنى كل وحدة تدخل تدعي لي ان الله يسير علي ويكتب لي الى فيه الخير ويعوضني بكل خير..

هذه قصتي باختصار ..
ملكت قبل سنة واستمرت الملكة شهور .. انصدمت فيها بعد شهر ونص من الملكة بخيانة زوجي لي مع وحدة متزوجة له علاقة فيها وقصة حب من 5 سنين..و كنت بتطلق بس المشكلة انحلت بعد ما تأسف وترجى وقال انه ما راح يعيدها وسامحته.. بس مستحيل طبعا انسى.
بعدها عانيت لاني حاسة قلب زوجي مو معاي ولا فيه حب بينا .. الحب الى تحلم فيه كل بنت، ولا شفت ايام الملكة الحلوة الى يتكلمون عنها الناس .. بس كان يوعدني زوجي ان كل شى بيتغير بعد الزواج وراح يجي الحب وبنعيش حياة حلوة..
جا الزواج .. وتزوجت ..اكتشفت ان كل الى اشوفه عكس توقعاتي .. انصدمت ان ابسط حقوقي(الفراش) كان في الاسبوع مرة وبعد لوم وعتاب مني وهذا احنا لسه في شهر العسل.. اتلبس واتعطر واتجهز وبدووون فايدة لانه ما يعطيني وجه ولا يتحرك .. وبديت اتحطم نفسيا ..
قام الموضوع يكبر لدرجة انه صار في الشهر مرة ( وهذا احنا لسه في الشهور الاولى)
وياما الومه وانا ابكي واقوله لييش !! بس بدون جدوى
هو ما فيه مرض ولا عجز بالعكس تماما بس مااعرف ليش يمكن لانه ما يحبني :(
حتى لما نقعد في الغرفة لحالنا كنت اتوقع بيكون فيه حضن او بوس يعني علامات حب خصوص احنا تونا عرسان .. لكن لا اقعد معاه كأني اخته في الغرفة ما يحط ايده حتى على ايدي
----

شى ثاني معاملته واسلوبه لي جاااااف مرة ، يقعد معاي أغلب الاوقات ساكت ويبوز في وجهي بسبب او من غير سبب..

وغير عن اشياء وتفاصيل ثانية كثيرة خلتنى مو متحملة العيشة هذه ومو مرتاحة . وما في حد شافنى بعد العرس وعرف اني مو مرتاحة في زواجي

ياما فاتحته في موضوع الطلاق واني ما بي العيشه هذه معاه .. كان يرد علي اذا تبين روحي انتي اطلبي الطلاق انا ما راح اطلقك .. ماادري ليش يقولي روحي انتى اطلبي ؟؟ يمكن عشان اتنازل عن حقوقي..

المهم .. الاسبوع الماضى جد ما قدرت اتحمل لانه طول الاسبوع مبوز ولا يكلمنى وانا محتاره وش السبب !! رحت وطلبت الطلاق في المحكمة بدون ما اقوله لانه اصلا ما كان يكلمنى طول الاسبوع
وتحدد موعد الاسبوع الجاي جلسة حقنا

وانا خذت اغراضي كلها من بيتهم وجيت لبيت اهلي .. مع اني ما كنت ناويه اسوي كذا لين يطلع حكم المحكمة ..بس ليش سويت كذا .. لانه لما عرف اني طلبت الطلاق ما اهتم يسأل او حتى يتصل فينى ليش سويت كذا .. وحتى شافني في البيت ومر عني مرور الكرام بدون اي كلمة.. قلت خلاص مالي قعده في ها البيت وانا منذله كذ ولا لي اي اهمية

---

لما راحوا له اخواني وقالوا له طلق بدون محاكم البنت ما تبيك .. قال انا ما بطلق بس اذا هي تبي بكيفها تدفع مبلغ معين الى هو تكاليف الزواج وبعدها بيطلق
___

مااعرف الي سويته صح او غلط وما اعرف هل لي حق في الى سويته او لا.. ساعات احس بندم وساعات لا .. اذا حد عنده علم في القضايا الشرعيه يا ليت يفيدني.. ويا ليت تدعون لي يا بنات ان الله يوفقني ويكتب لي الخير بالطلاق او بغيره... لان اهم شى عندي الحين والى راح يفيدني هو دعواتكم الصادقة وادري انكم ما تقصروون