بعد ترجيع الاجنة بالتفصيييل

السلام عليكم ورحمة الله وبركاته
موضوعي اللي راح اتكلم عنة بعد ترجيع الاجنة بالضبط
انا عارفة ان حالة عن حالة تفرق ولكن كنت ابحث عن اي وحدة كاتبة اش المراحل اللي عدت فيها بعد الترجيع بالتفصيل ومالقيت وحبيت اشارك تجربتي يمكن احد يستفيد منها


السحب كان يوم 4/3/2024
تم سحب 11 بويضة
وتم تلقيح 2 فقط درجة اولى
سبب تلقيح 2 لاااااا اعلم محد فهمني ولا احد يبغى يفهمني 😅😅

هنااا نبدأ المراحل المهمه :
الترجيع كان يوم الاربعاء 22/5/2024 بعد شهرين من السحب حتى الرحم يرتاح حسب كلامهم

الساعة 12 ونص المساء تم ترجيع 2 اجنة
كنت مبسوووطة جداً

ف اليوم الاول بعد الارجاع تمدتت ع السرير لمدة نص ساعة بعدها سمحولي اروح الحمام بعدها جات الدكتورة وكتبولي خروج وطلعت امشي عادي مافي اي اعرض ولا في الم ابداً

اخذت الادوية اللي مكتوبة لمدة 14 يوم عبارة عن
حمض الفوليك
الاوميجا 3
اسبرين
حبوب كرتزون
ابر سيولة و ابر تثبيت
وتحاميل تثبيت

اليوم الثاني من الترجيع بدأت اتحرك طبيعي واسوي شغلات خفيفة جداً ومافي الي اعراض ومستمره على الادوية

اليوم الثالث من الترجيع نفس اليوم الثاني حركة طبيعية ولا يوجد اعراض فقط ارتفعت درجة الحرارة ف جسمي

اليوم الرابع من الترجيع حسيت الم ف ظهري من صحيت واحس بحرارة ف جسمي بس لمن اقيس تطلع 37.6 او37.7 يعني ارتفاع بسيط بس انا احسة نااار
وقبل انام تقريباً الساعة 2 بالليل نزل مني دم فاتح جدا بقعة متوسطة والم خفيييف بالرحم والم ظهري بعد خفيييف جداً
على طول رحت تمددت على سريري
واستودعت الله نفسي واجنتي يارب ثبتهم يارب

اليوم الخامس من ترجيع الاجنة
صحيت اموري تمام بس مافي دم ومافي شي
وتحمست وطلبت تحليل حمل منزلي وسويتة طلع سلبي
ما جاني احباط لان فعلاً بدري ع التحليل بس قلت اجرب 🫣

اليوم السادس
سويت تحليل بعد وطلع سلبيمستمرة ع الادوية والابر
الم خفيف بالظهر والرحم وسخونة بالليل

اليوم السابع
صحيت الم ف ظهري متوسط وفالرحم واحس بسخونة قبل ما اصحى وكنت اعرق كثير من عند رقبتي



اليوم الثامن
اول ماصحيت صداع ونغزات خفيفة بالرحم من الجهتين خمول فضييييع وراسي ثقيل
وافرازت خفيفة بني


اليوم التاسع
الحمدلله كل شي تمام مافي اي الم
وتحمست كالعادة وجبت اختبار حمل ولكن للاسف طلع سلبي لكن عندي امل لان اصلن مو موعد الاختبار بس تعبت من التفكير
ربي يسهل الامور


اليوم العاشر
الحمدلله كل شي تمام بس النفسية جداً متوترة وضعف عام بجسمي
المغرب نزلت افرازات بنية مع الم في الرحم
يارب يسر اموري


اليوم الحادي عشر
صحيت الم وصداع ودخلت الحمام مسحت بالمنديل في افراز وردي او نزيف معرفت بين البني والوردي زي قبل الدورة فاتح جدا
كلمت الدكتوره قالت عادي وعلى الالم اخذ بنادول
بس ما اخذت راح اتحمل


اليوم الثاني عشر
نفس الشي الم ف الرحم وافرازات بنية على وردية
وصداع
الساعة 3 الظهر نزل دم ثقيل احمر
الساعة 10 المسا نزل مني دم كثير وقطع دم كبيرة
استمر النزيف القوي الين الساعة 3 ف الليل
جاتني دوخة وهبوط
صار الدم ينزل خفيف


اليوم الثالث عشر
مستمر الدم بنزول خفيف
كلمت الدكتوره الصباح طلبت ننتظر لموعد التحليل
اخذت الابر والادوية وصار الدم كثيف ونزلت قطع كبيرة


اليوم الرابع عشر
مستمر الدم بالنزول خفيف
احس بدوخة بس مافي الم الحمدالله
على المساء حسيت بالم وجاتني دوخة وهبوط ثواني فقط اتوقع بسبب نقص الدم الحمد والشكر للة




اليوم الخامس عشر
مستمر الدم بالنزول متوسط الغزارة
اليوم هو يوم التحليل ضروري اسوية حتى لو نزل دم مني
توكلت على الله ورحت سويتة النتيجة بعد ساعة

النتيجة مافي حمل للاسف
الحمدالله قدر الله وماشاء فعل
اللهم لا اعتراض الله يعوضني خير ويرزقني بالذرية الصالحة السليمة المعافاة انا وكل من يتمنى دعواتكم ليا 🤍🤍🤍