***بعد تكيس المبايض ^^^ من الله علي بالحمل ****

السلام عليكم ...........
أسأل الله الكريم رب العرش العظيم أن يرزقني وأياكم الذريه الصالحه ...
أنه ولي ذلك والقادر عليه ....

من بعد ولادتي في بنتي أنقطعت عني الدووره لمدة تسع شهووور ..
كنت في البدايه أرووح عند الدكتوره قالت هذا طبيعي من الرضاعه ..
وبعدها لاحظت أنها أنقطعت علي أكثر من خمس أو سته أشهر وأنا كنت مستهوونه لأني قلت كذا أفضل عشان ما أحمل ..
لأن بنتي باقي صغيره ..
وبعد التسع شهووور رحت عند الدكتوره أعطتني حبووب تنزل الدوره ..
ونزلت أسبوع .. ورجعت نزلت تاني تقريبا 15 يوم ..
وأنتظمت شهرين وأنقطعت..
تقريبا بعد سنتين أكتشفت عندي ضعف في المبايض ..

قالت الدكتوره عندنا نوعين من العلاج لحالتك ..
أذا ما تبغي تحملي تستخدمي حبوب منع الحمل وجلوكوفاج ..
وأذا تبغي تحملي نعطيك منشطات ..

طبعا بنتي باقي كانت صغيره وأنا ما كنت أفكر أحمل ..
بس كان كل همي أن الدوره تنتظم عندي لأنها تعبتني ..
سمرت وزاد وزني وزاد الشعر في جسمي وخف شعر راسي .. وكان عندي صداااع شديد ..
فعشان كذا كان اول همي أتخلص من التكيسات بعدين الحمل ...

وجلست تقريبا ثلاث سنين بعدها ...
لكن الصراحه حبووب منع الحمل ما كنت انتظم عليها أخذها ثلاث شهور واذا تعبتني تركتها لأني ما كنت ايامها افكر احمل ..وحتى الجلوكوفاج أستخدمته شهر فقط وتركته .. لأنه أتعبني كثيير ...
بس بعد ما صار عمر بنتي اربع سنوات قالو الناس خلاص لازم تشدي حيلك وتجيبي تاني ..

سبحان الله ومن السنه الي راحت اهتميت بالحبوب ولا تركتها يوم واحد والحمد لله انتظمت عندي الدوره وهذا اهم شئ ويوم تركتها الشهر الي راح من الله علي وحملت ....

الحين أنا راح أقول لكم الخطوات الي أتبعتها في العلاج .....
أول شئ وأهم شئ الي لازمت عليه هو الأستغفار ..
وفعلا والله يوميا وفي كل ساعه وكل مكان أستغفر الله ...وأنا أكوي واطبخ وأنا في السياره في كل مكان .. والحمد لله ..
لكن أهم شئ وأنت تستغفري يكوون عندك ثقه بالله ويقين أن الله ما راح يخذلك أبدا ...

ثاني شئ التخفيف من الأكل ..
مو اني ما أكل لا أكل بس أذا في شئ أحس أنه ماله داعي أكله أتركه ...

ثالث شئ والي أنتظمت عليه الشهر الي راح الأناناس ...
والله يجزاها خير الجزاء الأخت رنوووود هي الي تشجعت من قرأت موضوعها عن الأناناس ...
فصرت يوميا أشرب ما يقارب ثلاث أربع كاسات ..
والي شجعني عليه أني أحبه بصرااحه طعمه لذيذ ..
أنا أعرف نفسي من النووع الملوول اذا ما عجبني شئ تركته .. وكنت تقريبا في الأسبوع أكل اناناسه او ثنتين ....
وفي الدوره الأخيره كنت أشرب يوميا كوبين شاي أخضر واحط مع الشاي العادي ميرميه بدل النعناع ...

وسبحان الله تركت حبوب منع الحمل وأنا والله ما كان على بالي الحمل لكن تعبت منها ومليت وكنت في أجازه قلت أرتاااح منها على الأقل شهر ..
ولا كان في بالي ولا في خاطري اني ممكن راح احمل ..
لكن بعد اسبوعين من الدوره حسيت بألم في صدري وأسفل بطني وفي ظهري ..
وجا موعد الدوره ولا جات وما اهتميت الا وهي تأخرت أسبووع وحللت في البيت وطلع حمل .. بعد يومين رحت المستشفى وطلع نفس النتيجه ....

انا اسفه أذا طولت عليكم لكن والله انه كله عشان أساعدكم بالي أقدر عليه ..
لكن شووفوا اهم الشئ الثقه بالله .. وانسوا موووضوع الحمل ..
يعني قولوا مو مشكله اذا ارتحنا شهرين ثلاثه من العلاجات والتعب ..
واشغلو نفسكم ..
واتبعوا نفس الخطوات الي استخدمتها ..

لا تحطوا في بالكم انه عشان حمل تعملوها ..
لا بس مجرد اهتمام بصحتكم ..

والله يرزقنا جمعياً الذريه الصالحه ..



أخواتي كل الي أتمناه منكم أنكم تدعون لي ان الله يثبت حملي ويتمم لي على خير ....