بعد زواجك هل ما زلت وفية لامك وابوك والا ثقلتي عليهم ؟؟ !!!!!

انا علاقتي كانت بامي وابوي قويه جدا بعد الزواج خفت من ناحية امي مادري ليش بس يمكن تشره علي اني اخذها معي اي مكان اروح له واشتري لها مثل اي شي زوجي يجيبه لي بس هي ماتكلمت بس انا احس .ابوي الله يطول في عمره علاقتي اخف من قبل بس احسه راضي جدا ومقدر ظروف الزواج والابناء وانشغالي فيهم وفي زوجي ...انايوميا ازورهم مره في الاسبوع ادخل بيدي فيها شي يفرحهم .ايه احس اني ضيفه ثقيله بسبب بناتي يحوسون ويوصخون البيت واذا هناك اولاد اخواني تزيد الحوسه.وانا خلاص تعودت على بيتي ماقدر انام الا فيه ..اكيد بعد الزواج تنشغلين في حياة ثانيه ومارح تقدرين تعطي وتخدمي اهلك مثل زمان مثلا تدليك ابوي كنت يوميا ادلك له ظهره الحين اذا شافني مع بناتي مايطلب مني لانه يشوف كيف يتعبوني بناتي .تنظيف بيت اهلك قبل الزواج الحين انتي تجين منهكه من بيتك واولادك اذا جيتهم يالله تنظيف سطحي مش من نفس زي اول .تمشيط لامك وحناء يدها اكيد زمان بكل سهوله الايام هذه احني لامي الله يطول بعمرها يد واليد الثانيه بنتي تصيح 😂فخلاص تقولي روحي لبنتك .واختي تكمل حناء لها..........الي لسى ماتزوجت تغتنم هالفرصه وتخدم امها وابوها والي متزوجه تجاهد نفسها والله يعين.
.دايم اجيب لامي هدايا من فلوس زوجي عادي حتى هو يدري وانا اطلب منه عادي .اذا كان معي مبلغ محترم وناقصها شي اجيبه لها.امي دايم تناظر وتطلب مني بالتلميح ..ابوي مستحيل يطلب اويلمح او يمن علي انه رباني او خسر علي .بس امي دايم تذكرنا انها كانت تخسر علينا وتعطينا وتتعب علينا الله يكتب اجرها يمكن هي تبغى رد جميل اقوى من كذا الله مع اني في اوقات الجد اجدها بجانبي الحمدلله الله يجعلنا من البارين....صراحتي عشان يستفيدون الاخوات وشكر ا

عني زادة علاقتي ف امي صرنا نفضفض لبعض المشاكل والهموم مو مثل قبل
اما ابوي من يوم م ملكت صرت استحي منه استحي حتى اطلبه شيء اذا شفته دخل اعدل جلستي حتى كلامي فوجودة يتغير
ونادرا م اجلس اضحك واسولف معه
اما بقية الاسرة نفس الوضع بس صاروا يطفشون مني بسرعه بسبب بناتي وخاصة اذا خربوا او ازعجوهم
وطبعا كثير احن لبيت اهلي ونفسي نرجع نلتم انا واخواني نسهر مثل قبل ما نتزوج ونلعب سوى بس خلاص صعب ترجع الحياة مثل اول كل شخص انشغل بحياتة واسرته وحتى لو تجمعنا الاطفال م يخلون احد يا خذ راحته ربي يصلحهم


اما اذا على الهدايا خلاص عيد الفطر اجيب هدايا
وكل فترة عجبني شيء مثل لوازم مطبخ قماش قميص اخذ لامي ابوي احيان لما اخذ لزوجي قميص او ملابس اخذ كمان لابوي
والحلى على حسب اما اسوي فبيتي واخذ معي نتقهوة عندهم او اشتري او اطبخ فبيت اهلي
احيان انا اطبخ لهم واحيان زوجي يجيب ونجتمع كلنا واحيان امي تعزمنا على اكله معينه ومرات اخواني او ازواج اخواتي
يعني مافي شيء محدد

بالنسبه لي ماتغير شي الحمدلله علاقتي فيهم جميله ولاني بعيده عنهم وممكن اجلس شهور عنهم بحكم اني مرتبطه بعمل الا انهم يفروحون بزيارتي لهم وانا اتصرف عادي كأني ماتزوجت ارتاح اول يوم بعدها ابدا اشتغل اطبخ وانظف وارتب لانو هذا بيتي الاول مع انهم يرفضون اشتغل ويقولو انتي تجي عشان ترتاحي بس انا راحتي في خدمتهم والحمدلله ماعمري دخلت عليهم ويدي فاضيه واحاول اني اسعدهم ع قد ماقدر مع اني مهما سويت ماراح اوفيهم حقهم واكثر شي اثر في نفسي اني كنت اعطي امي مبلغ بسيط شهرياً وبعدها تفجأت انها جمعت المبلغ واشترت لي فيه شي معين كان نفسها تجيبو لي من زمان قالت اخواتك عندهم وانت ماتفرقي عنهم مع اني اعطيها عشان ماينقص عليها شي الله يحفظهم لي ويقدرني ع برهم وسعادهم

بالعكس علاقتي فيهم اقوى الله لايحرمني من امي وابوي واخواني واخواتي اول يوم راحه لأتي اجي من سفر واجلس شهور مااجيهم لكن ثاني يوم انا انظف وارتب وكل شي انا واخواتي امي مانخليها تلمس شي فديتها وربي اشتقت لهم الله يجمعني فيهم اجيهم نهاية الشهر ان شاءالله
كل مااتذكر امي وابوي ابكي حنيت لهم😭😭😭😭

بالعكس زادت علاقتي بأمي وحبي لها زاد لأني عرفت إنها عانت وضحت في حياتها من أجلنا