بعد عذاب ٨ سنين ، شلت المراره :)

السلام عليككككم حبيباتي
قبل فتره كتبت عن اعراض كنت أحس فيها من ٨ سنوات واكثر يمكن .. وطول هالسنوات كان التشخيص يا ألتهاب في المعده أو جرثومة معده أو القولون .. ماتتخيلون قد إيش تعبت نفسياً ماكنت أتوقع اللي فيني كله من المراره الله يجعل مامريت فيه كفاره يارب ..
كتبت هالموضوع للي كانوا مثل حالتي وتعبوا ..
شوفوا بنات انا الالم طول السنين اللي راحت كان مرتكز أعلى المعده فقط وألم قوي وشديد بالبدايه كان ربع ساعه بعدين نص ساعه وكل مره كان مدة الالم يتطور إلى ان وصل ١٢ ساعه واحيانا ياخذ ٢٤ ساعه .. اللهم الم ماتتخيلون قد ايش وخلال فترة النوبه اللي تجيني لون البول غامق واحس ببروده بجسمي حتى بعز الصيف وحكه بجلدي .. قعدت فتره اخذ ملعقة عسل مع مويه دافيه ع الريق لمدة ٣ شهور متواصله واختفت الالام كم سنه ماعاد حسيت فيها .. الين قبل شهر رجعت لي الاعراض جداً قويه .. وهنا بدت معي النغزات يمين المعده تحت ضلوعي مع جنبي وظهري كأن فيه احد ماسك سوط ويضربني على ظهري .. وسبحان الله ربي هداني لدكتور بمستوصف عندنا كنت فاقده الامل منه .. اول ماشرحت له الاعراض قال لي لازم اسوي فحص للمراره وفعلاً طلعت فيني حصوات بالمراره وهي اللي متعبتني كل هالسنين :( ..
استخرت ورحت اكثر من مستشفى واكثر من دكتور وفعلاً شخصوا حالتي حصوات بالمراره ولازم تنشال .. بيني وبين نفسي قلت يلا دام عرفت وش فيني خلاص يكفي باخذ علاجات وانتهينا الين قبل اسبوعين جاني الم فضيع فضيع فضيع اتعب وانا اقول فضيع بمعدتي وجنب معدتي اليمين تحت ضلوعي وظهري لدرجة رحت المستشفى وعطوني ابر مسكنه ولا سكن الالم جتني الدكتوره تقول يابنت الحلال خايفه اعطيك ابر زياده اللي خذيتيها تكفي قسم بالله يابنات 5ابر ماهجدتها اخر شي عطتني ابره مخدره بالموت هجدت وبعدها خذوا عنوان بيتنا ومعلومات مدري ليش .. وقالوا لي لازم تشيلين المراره خلاص مالها حل ملتهبه عليك واذا التهبت ماتهجد وبتتعبين منها وفعلاً خذيت موعد مع جراح شاطر عندنا وشلتها لي تقريباً ٨ ايام .. ارتحت اللهم لك الحمد على الصحه والعافيه ياربي .. للحين فيني تعب شوي خصوصاً فتحة المنظار اللي فوق السر .. تألمني وبسأل اللي شالوا المراره كيف تعاملتوا مع الجروح وحركتكم والقومه والقعده .. وايش استخدمتوا عشان يطيب بسرعه ..
واي وحده تشتكي من احد الاعراض هذي على طول اطلبي فحص سونار للمراره وكل شي يبين واذا طلعت فيها حصوات شيليها اذا مسببه لك الم لاتنتظرين لين تلتهب لانها اذا التهبت بيكون وضعك جحيييييييم نصيحه والله وشكراً ..