كوبونات الراقية تسجيل الدخول

مريومه*_*

مريومه*_* @mryomh_2

كبيرة محررات

بعد عشره دامت 15 سنه زواج ... تزوج عليها :(

الأسرة والمجتمع •

السلام ...

اخباركم :26:

بنات مدري وش اقول لكم .. قريبتي محتاجه دعائكم لها بالصبر ورزقها بالذريه الصالحه ...

بعد قصة حب تزوجو .. دام الزواج 15 سنه .. وبيتزوج عليها عشان يبي اطفال .. مع انه مافيها عيب .. ولاهو فيه عيب .. بس ارداة الله مايجيبون عيال ...

اللي صار يابنات ..انه هي ياحرام منهاره ومقهوره ومتضايقه موت .. يحق لها بصراحه ماتنلام .. خصوصا انه بينهم حب وعشره .. شي مو سهل ..

زوجها فاتحها بالموضوع من اول انه بيتزوج عليها وحده عمرها 30 مطلقه .. واهل زوجها وقفو معها .. وقالو انه بيتزوج وكلام طويل وعريض .. فنختار له حنا احسن من يروح يجيب لنا من برا .. واحنا ماودنا يتزوج حنا نبيك انتي .. واحنا قلنا له .. مايضرك ولا راح نزعل عليه ..وكلمو اهلها .. ومدحو بنتهم.. لحد هنا هي ماسكه اعصابها ..

بس اللي صار .. جدة زوجها توفت .. وطبعا بالعزا .. شوفو البجاحه يابنات .. خطيبته جات العزا 3 ايام كامله .. وجالسه من النهار لحد الليل معهم ...وتسولف مع اهل زوجها ضحك وسوالف .. تقووول اموت اموت قهر ..

عاد زوجته تقول لامي .. انه خطيبته قمر .. تهبل .. وصفتها لنا وصف وربي تحسون انها حلووه .. طبعا لاحظو زوجته قالت هالحكي .. تقول انهارت هذاك اليوم يوم شافتها .. خصوصا مقابلتها 3 ايام ورا بعض ..

امي يوم شافتها فكرتها مسويه دايت .. تقول ناحفه 7 او 8 كيلوو ..كله من الهم والقهر ..الله يعينها ..

مسكينه تشتكي .. تقول يطلع معها مايجي الا 3 الفجر .. ومكالمات قدامي .. تقول اذا كان جالس عندي .. تدق عليه جوال .. وهو يرد عليها عادي ومومعبرني ..ويسوولف معها ..

تقول اشوف جواله اقلب بالمسجات ... كلها رسايل منها .. تقول اموت بحسرتي ..

امي نصحتها .. انه لاتدور الاذيه لنفسها .. ولازم تطنش وتتأقلم .. مايصير تفتش من وراه لانه محد بيتأذى الا هي .. تقول لها اطلعي واكشخي وانبسطي ووسعي صدرك.. غيري صديقاتك اطلعي لهم .. تقول ماقدر اسوي كذا .. كل مااذكر انه بيتزوج بعد اسبوعين وبيروحون شهر عسل ماليزيا .. ابكي ..

تقول المشكله كله اتهاوش معه .. وصايره حساسه .. وماتقبل منه شي ...

بنات ادعو لها بالصبر ويهدي سرها مع زوجها .. ويجملها في عين زوجها .. ويرزقها بالذريه الصالحه .. ويكفيها شر خطيبته ... وتخفف مكالماتها له قدامها .. الله اعلم ماندري اذا هي متعمده تسوي كذا او لا ..بس هو عادي يرد ويسوولف ..

لو تشوفونا انا وامي اليوم .. نبكي عليها .. جد اغلبنا متأثرين .. لانه ماتستاهل هالشي ..:(

ادعو لها يابنات ..والله كاسره خاطري .. الله يفرج همها .. ويرزقها بالذريه الصالحه ..:(
52
4K

يلزم عليك تسجيل الدخول أولًا لكتابة تعليق.

تسجيل دخول

ام الخمائل
ام الخمائل •
اللهم فرج همها وابدلها مكان حزنها فرحا ورضا وارزقها الذرية الصالحة وسخر لها زوجها وضرتها ........
كلام والدتك عين العقل بس هي صدمة ولا زم تاخذ حقها من التأثر الله يهونها عليها وما تدري وش بيصير من الغيب........
فيه موضوع للأخت نور الليل قابلت فيه وحده من البنات بالضبط نفس مشكلة قريبتك ياليت تقارها او تقرينها وتطبعينها لها ........
وهذا هو الرابط الله يربط على قلبها:

http://forum.hawaaworld.com/showthread.php?t=434581
مريومه*_*
مريومه*_* •
جزاك الله خير ياقلبي ..

بس الموضوع بصراحه احسه جارح لوحده في مكانها ..صعب اطبعه واعطياها اياه ..:(

مشكوره عالمساعده والدعاء ..
مجنونة الشرقية
مجنونة الشرقية •
الله يفرج همها
مريومه*_*
مريومه*_* •
امين..

جزاك الله خير
نور القرآن
نور القرآن •
مريومه*_* مريومه*_* :
امين.. جزاك الله خير
امين.. جزاك الله خير
اللهم فرج همها وابدلها مكان حزنها فرحا ورضا وارزقها الذرية الصالحة المعافاة وسخر لها زوجها وضرتها

اللهم آمــــيــــــــــن