بعد ماكشفت حقيقة أخت زوجي غيرت اسلوبها لأسلوب المصيدة

أخواتي الحوائيات..كتبتلكم موضوع عن اخت زوجي وأذيتها العظيمة لي..هي ليست بالسحر ولكن تؤذيني أذية عظيمة بلسانها..تستنقصني قدام الناس وتخاصمني اذا غلط فيها ولو غلط مو مقصود وتعبي عليا زوجي وسلفاتي كشفتها بان زوجي خبرني عنها ومرة جات زارتني هي واخواتها وقالت احنا جينا عشان أخونا وشويا لان اخواتها مابيني وبينهم شي جلسنا نسولف مع بعض قام وجهها انقلب وكشرت وانقهرت على طول بان في وجهها..ودحين اخوات زوجي بدوا يبعدوا عني مرة واضح بعد ماكشفتها انها هي السبب لانهم طيبات ومابيني وبينهم شي ..وصارت لما نتقابل تستفزني مرة وترمي كلام وتطالعلي قصدها ترى الكلام لكي..ولأني كنت..ولما كتبت الموضوع هنا وحدة من الاخوات فكت رموز مشكلتي وقالت لي ترى انتي خايفة منها عشان كدا ماوقفتيها عند حدها وهي عارفة في قرارة نفسها انك خايفة منها وجالسة تتسلى بيكي..واني لازم اكون ما اخاف الا من الله عز وجل ويكون قلبي شجاع..
وفكرت وأعدت الماضيولقيت ان كلامها صح..طيب ليش أنا كدا؟!
وللأسف صار بعض أهل زوجي كمان يستنقصوني بسببها انها تسبني وما أرد عليها واذا رديت عليها تتهجم عليا أو ترمي رد يسكتني ومايجرأني عليها..
قلت لازم أحل المشكلة وأوقفها عند حدها بالاستعانة بالله ثم باني أحلل شخصيتها على حقيقتها..
هي تجلس جلسة الواثق من نفسه وصوتها نوعا ما متمكن وياويل اللي يدوسلها على طرف..
جلست اتذكر مواقفها ..تذكرت انها رغم كرهها لي باعترافها طبعا الا انها اذا واجهت شي ماتبغى احد يعرفه تجي تقول لي وهي عارفة امانتي واني ما حخبر احد وفعلا هذا اللي يصير..
ومرة اعترفت لي وهي معصبة ومنهارة انها زيي واكثر مني في حاجة تعتبر ضعف لكن هي ماتبين وانا أبين..
عرفت انها أكثر مني حتنفعص اذا لقيت اللي يوقفها عند حدها..بعدين قلت صح..فلانة موقفتها عند حدها لأنها شافتها بدأت تزودها وتدخل في حياتها فصارت ماتهمها واذا رمت عليها كلام ياتبتسم او تفحمها..
أنا في الوقت الحالي وضحت لها إني ما أبغى وصلها الا في حدود الرسمي فقط عسان مايصير قطع أرحام في الدوريات فقط والمناسبات وكلام رسمي كيفك بخير وبس..لكن هي صارت تتكلم معايا رغم توضيحيلها..وكلام مستفز تقوله لي قدام الناس تقوله لي وقدام زوجي..مغلف بغلاف الرحمة والخبث في آن واحد ..بحيث ان اللي يسمعها يقول يارحمتها الكبيرة وياكبر أخلاقها مع زوجة أخوها..وصايرة الا تبغى تطلع الغلطة مني عشان تنفر الناس مني..وصايرة تعاملني حاليا كدا بعد ماشافتني اني خلاص قرفت منها وابغى العلاقة تصير رسمية..أنا على نياتي مرة ومالي في حركات الكيد وهيعندها الكيد والخبث زي شرب المويا ..وأنا لازم تتكرر حركات كيدها كم مرات عشان افهم انه كيد ..وافهم حركات كيدها متأخر لكن هذا الاسلوب اللي صارت في الفترة الخيرة تستخدمه معايا..
كيف يكون تعاملي معاها بناء على تعاملها الاخير معايا. بحيث اني افهمها ان ترى كيدك مايهز فيني شعرة..لأني ابغى اتقي شرها وهي لما قررت البعد عنها طلعت لي بدا الاسلوب الاستفزازي؟
اذيتها زادت مررة وصبرت لين تضررت..اللهم اشغلها بنفسها ونفر منها من تحب كما تنفر مني من أحب اللهم رد كيدها في نحرها واشغلها بنفسها عني..واشغلها بنفسها عني.. واشغلها بنفسها عني
وعذرا على الاطالة وجزاكم الله خيرا