بعد ما حصل أكبر مخاوفي قدام عيني ..ببدأ على بركة الله..تعالوا حطوا إيدكم بإيدي..

السلام عليكم ورحمة الله وبركاته
شخباركم يا بنات أحلى منتدى..وكيف الشهر الفضيل معاكم..يا رب كلكم تكونون بصحة وعافية..
بنات أنا باقولكم قصتي باختصار..أنا في مراهقتي كنت ضعيفة ومانيكان ومضرب مثل بجمال جسمي في العايلة ..كبرت وتخرجت ولله الحمد واشتغلت..ويوم اللي أشتغلت فيه بدا إدماني عالوجبات السريعة لأن دوامنا طوييييل..صرنا نفطر معجنات ونتغدا برغر وبطاطا وبيبسي..وظليت على هالحال لين ما وصل وزني خلال سنة وحدة إلى 95:(:( ..
المهم حاولت أنحف كثير وللأمانة كانت لي تجارب ناجحة بس عمري ما كملت أو حافظت عاللي خسرته..إلين جا اليوم اللي صار فيه أكبر مخاوفي قدام عيني..أنا يا بنات كان أكبر خوفي إني ما ألقى لبس يناسبني ..يعني أول كان ينقال عني مليانة وكنت ألاقي بلايز في برومود, كامييو, وهالشلة الحلوة من المحلات ..ألحين حتى هالمحلات ما عدت أقدر أشتري منها..:06::06:
وياما تحملت تعليقات وتجريح وانكسر قلبي من تعليقات الناس الناقصة اللي بس تحكم عليك بشكلك وتنسى داخلك كم فيه من طيب ونظافة قلب :06: لدرجة يا بنات أن أختي الصغيرة المراهقة من الحين تراقب وزنها وجسمها وتقول لي ذاك اليوم " انا كنت طول عمري خايفة أصير مثلك ..أنتي مرة ضخمة على أنك تكونين بنت" أقسم بالله ما أخفيكم قد أيش زعلني كلامها وبكاني من قلب بس قلت معليش رايها وأحترمه..
المهم حاولت يا بنات أعالج نفسي بنفسي وبديت أقرا كثير عن هالموضوع وعن الأكل الصحي إلين ولله الحمد تعلمت أطبخ صحي و بطعم ولا أروع بس قلتلكم عمري ما كملت..
جلست مرة مع نفسي وحاولت أسجل الأسباب اللي المفروض تخليني أنزل وزني والأسباب اللي تخليني أبقى على حالي..تخيلوا بنات إني لقيت 13 سبب يشجعني أخسر وزن وما لقيت ولا سبب واحد يخليني أكمل على ما أنا عليه..وبرضو ما بديت بإصرار..عشان كذا يا بنات أنا ودي إنو نكون مجموعة عشان نشجع بعض واللي بسويه هالمرة بإذن الله إني باطبخ صحي وبصور لكم طبخي بإذن الله وباكتب يومياتي..ولو صرنا مجموعة كبيرة راح أقترح أكل يومي لنا يعني الحين برمضان نقترح فطور وسناك وسحور وبعد العيد بحول الله نقترح فطور وغدا وعشا مع إني ناوية بعد العيد إن شاء الله أبدأ بريجيم حافظته في كمبيوتري من فترة ينزل 25 كيلو بأسبوعين على ذمة كاتبته..
طيب قبل ما نبدا اليوميات خلونا كل وحدة فينا تكتب أسبابها ليه تبي تخسر وزن بعدين بياناتها وبعدين النظام اللي بنتبعه كل يوم بيوم ونوعد بعض بالإلتزام والأمانة وعدم الكذب يعني إذا خبصنا نكتب بأمانة ..
أسبابي ال13:
1- الناس تحكم علي بإني إنسانة ما عندي إرادة ولا لي سيطرة حتى على جسمي اللي أملكه..
2- نظرات الناس في الجمعات لو أخذت قطعة حلو باكلها ما ترحم كن عيونهم تقول "وقفي أكل..كل هالجسم ولسه تاكلين"..
3- التسوق بالنسبة لي مأساة ..ما أقدر أشتري إلا من محلات محددة وإن وجد اللبس المناسب فلازم تدفعين دم قلبك..
4- نفسي أتخلص من السؤال المحرج اللي أسأله بياعين المحلات " لو سمحت كم أكبر مقاس من هالقطعة؟؟ أو مافيه مقاس أكبر من كذا؟؟" وأتخلص من نظراتهم اللي كلها إزدراء لي لما يردوا علي..
5- الوقوف أمام المرأة عندي هو فرصة لتحطيم النفسية وبس ..وعلى الرغم من مدح الناس جمييييييييع لأناقتي إلا إني عمري ما حسيت بجمال أي شي علي..
6- نفسي أتخلص من نظرات وتعليقات الأشخاص المرضى اللي طول الوقت بس تتشمت بالناس وما عندها الا التعليق السلبي وبس ولا يهمتون لو أن الكلام بيجرحك أو يؤذي مشاعرك حتى لو قدام جماعة مو لحالكم..
7- فيه تفرقة بين النحاف والسمان حتى في مجال العمل وانكسر ظهري وأنا أداوم بالكعب في محاولة يائسة مني إني أظهر خصر لو بالكذب..
8- فيه ناس ناقصة همها بس تطلق ألقاب عليك وما تناديك الا بألفاظ تجرح من باب المزح والميانة..
9- انخطبت في حياتي مرة وحدة لا وبعد يوم كنت نحيفة والحين الكل لما يشوفني يقول "كم صار عندك من عيال؟" عشان كذا ما انخطب أبد..
10- ما عندي ثقة بنفسي وأحس بإحباط وضعف دايما وأحس بغيرة شديدة من اللي أجسامهم حلوة أو اللي كانوا بمثل حالتي ونحفوا وأقعد أذكر الله عليهم خوف تصيبهم عيوني..
11- شراء الملابس الداخلية في قمة الأحراج و لا تنسون نظرات البياعين..
12- لما أفكر بالزواج ..يجي على بالي أنو أنا مش ممكن أجذب أحد وأنا بهالجسم وعلى فرض أني تزوجت كم بيصير وزني بعد الزواج؟ وممكن تصير لي مشاكل مع الحمل والسبة هالموضوع>>تجهز الدوا قبل الفلعة بس الأحتياط واجب:35:..
13- ما عندي حياة أجتماعية والسبة هالمشكلة..أتهرب من التجمعات وأتهرب من الزواجات خوفك أحد من اللي كانوا يعرفوني أول يشوفني ويعلق تعليق يجرحني لأنو مرة وحدة قالت لي بعد ما انقطعت عنها 4 سنين وشافتني " شفيك كذا انفجرتي..أكيد تزوجتي.. وريني عيالك الحين..والا تاركتهم عند أبوهم؟؟"":44::44:
وهاذي كل أسبابي يا بنات ..طيب الحين بياناتي.. أنا طولي 146 ووزني 95.5 وعمري 25 سنة..
ودي أصير 65 لأنو الوزن المثالي لي..
نجي لبكرة بحول الله..نظامي:
الفطور: 7 تمرا وكاس لبن و راح أسوي مكرونة سباغيتي بالمعكرونة البنية كاملة الحبوب و صلصة لحم مفروم بدون دهن ,,وعصير برتقال طبيعي بدون سكر
سناك: تفاحة خضرا
السحور: زبادي قليل الدسم و4 شرايح أناناس وبشرب شاي أخضر بعد الفطور وقبل النوم.. هاه وشرايكم ومنو يبدا معاي؟؟
وتذكروا بنات المثل يقول "ربعن على ضيم الدهر تعاونوا ما ذلوا">>شعندها من الهم قلبت عجوز ههههه
والرسول عليه الصلاة والسلام قال فيما معناه " كان الله في عون العبد ما كان العبد في عون أخيه"
وبنات بخبي الميزان لين نهاية رمضان وبشوف..ويا رب يا رب يا رب أنحف بخير وعافيه أنا وكل اللي معاي يا رب..
طيب بنات في قناعات ضرورية قبل ما نبدا..
1- الوزن هذا ما تكون في يوم وليلة ..وعلى هالأساس خسارته تحتاج برضو وقت..فلا لليأس..
2- الأكل اللي سمنا لسه بيظل موجود بالدنيا يعني نقدر نستمتع فيه بعد ما ننحف من غير ما نحس بالذنب واحنا ناكل..
3- ممنوع المشروبات الغازية والمقليات حتى بدون ما تكونين تتبعين ريجيم حفاظا على نفسك اللي هي أمانة من رب العالمين..
وبكرة بإذن الله بجيب لكم الصور وبنزلها أول بأول إذا عرفت وبعلكم بطريقة الطبخ مع ان ما يبيلها شي..
تحياتي للجميع وهاذي وردة لكم :26::26: