بعض الافكار لازالة الروائح الكريهة.

أحلى صباح لأحلى أعضاء في الكون..

أنا بصراحة عاجبني هذا القسم بالمرة وأحس فيه تفاعل و جديه اكثر من غيره بالرغم من قلة عدد المشاركات بالنسبة للأقسام الثانية..

المهم عندي كم فكرة دايما أسويها وحابه أشاركم بها...

1-حبيبات النفثالين:دايما اشوفها في الفنادق وفي الحرم محطوطة في المغاسل وكمان مره شفتها في سلات النفاية أعزكم الله,,وانا دايما الاحظ عندي ريحة في واحد من الحمامات اللي عندي بالذات المغسلة فجربته وكانت نتيجته بالمرة روعة شال الريحة كلها..وحطيته كمان في سطل الزبالة في المطبخ وفي سلات النفايات اللي في الحمامات طبعا نحطه تحت الكيس وبكذا ما عاد اضطريت لغسلها في كل مرة أغير الاكياس لان ريحة الزبالة تروح بالمرة..


2-عطور الجسم : أستخدمها لمسح الارضيات بالذات ايام المناسبات والعزايم وطريقتي هي اني اخلط منها مقدار فنجال شاهي مع موية التمسيح وبس وتصير ريحة البيت تجنن ...وطبعا عطور الجسم متوفرة وبأسعار مختلفة ب6,10,15,20ريال وعاد انتي اختاري الريحة اللي تحبيها..
كمان استخدمها مع موية فرك الفرشات والسجاد (موية +عطر+شامبو سجاد)ولمن اخلص ارشها ببودرة الموكيت على طول واشغل المروحة علشان تجف..

3-الديتول: اخطه مع مويه واحطهم في بخاخ لتسهيل استخدامه, واستخدمه لتعقيم الاسطح في المطبخ ولالعاب بناتي ..

4-المستكة و الجاوي: احط قطعة صغيرة من المستكة او الجاوي مع المعمول اللي ابخربه البيت لانها تثبت الريحة اكثر وتخليها تدوم اطول...

5-أقراص الكلور:لقيت عند (عالم ساكو) أقراص دائرة كبيرة لونها ابيض واتضح انها كلور وتنحط في السيفون للتعقيم والتبيييض,وفيه نوع ثاني نفسها بس معاها مستطيا كحلي يضيف رائحة ولون وكل نوع ب22ريال ...انا جربتها والله رووووعة ايش نظافة؟ايش ريحة؟!وتراها تدوم لاربع شهور..

هذي اللي في راسي ذالحين واذا افتكرت شي ثاني راح اكتبه..

بس اتمنى اني افدتكم بشيء مفيد وجديد. ..