ظلع @thlaa

محررة برونزية

بعض الخطابات زي بشار الاسد حياة الناس لعبه عندهم

مساء الخير
قد تسئلوني او بتهاوشوني على ها العنوان بس ترى هذه هي الحقيقه بعض الخطابات وقحات لا ذمه ولا ضمير ولا تخاف ربها ابقولكم السالفه
انا قبل 4 او 3 سنوات اتصلت علي خطابه وقالت عندي واحد موظف زين ومن عائله معروفه وجلست تمدحه وفي الاخير قالت بس فيه شويت ضيقة صدر بس ميخالف هذا شي بسيط المهم اتصلت امه وقالت نفس الخطابه انا طبعا وافقت مبدئيا على بالي ان ضيقة الصدر شي طبيعي وقلت لهلي عادي كل الناس تضيق صدورهم تفكير وحده غبيه المهم اصرت امه انها تجي قالت امي الافضل ان الرجال يجي اول وزعلت امه وكلمت الخطابه والخطابه كلمتني وهزئتني تهزي وقالت ليش رفضتوه حرام عليكم ترى الاكتئاب شي عادي الرجال ما يعيبه شي انا قلت حنا ما رفضناه عشان كذا حنا بس قلنا خلو الرجال يجي في الاول والام زعلت المهم مرت 4 سنوات وقبل اسبوع كلمتني صديقتي قالت تذكرين فلان الفلاني الي خطبك قلت ما خطبني بس مجرد كلام حريم قالت تزوج قبل مده من بنت خالته وماجلست معه الا 6 شهور ونحاشت قلت ليش قالت الولد مريض نفسي بقوه وفيه خطر على غيره قلت كيف وهو وظيفته زينه ومتعلم قالت مو صحيح لا متعلم ولا وظيفه زينه ولا يحزنون حنا نعرفهم زين انا قلت الله لا يجزا ذيك الخطابه خير بغت ترميني في النار وتغسل مخي خصوصا اني عندي اهل لو وافقت على اي واحد بيقولون بكيفك هذا قرارك وانت الي تتحملين
وتجربتي الثانيه كانت ايضا قبل سنوات طبعا عن طريق خطابه جابت واحد ونمديح فيه وجتنا امه وبرضه تمدح وبعدها جاء هو وسئلنا عنه والكل مدحه وكنت خلاص بيتم الموضوع بس اخوي ربي هداه وقال بسئل الشرطه لانه يعرف واحد هناك وحنا نقول وشهوله خلاص الكل قال ماشفنا به شي ولا ندري عنه قال اخوي لا ابسئل المهم سئل وطلع الرجال خريج سجون وماسكينه مره وهو سكران
انجن اخوي قالهم كيف والكل يمدحه قالو الناس وشدراهم ماخفي كان اعظم وبرضه تاكدنا من ولد عمي وقال وين صاحين انتم بتزوجون بنتكم لهذا المهم رديناه
واتصلت الخطابه قالت ليش رديتوه قلت السالفه كذا وكذا المهم بعد شهر اتصلت الخطابه الزفته قالت فلان الفلاني ملكته اليوم وخطبتله بنت حلوه من التحفيظ يعني بتندمني عليه انا انجنيت قلت كيف خطبتيله وانا قلتلك قصته كان خبرتي البنت عن ها السالفه او على الاقل قلتيلهم يسئلون الشرطه قالت ماسئلو الشرطه وشهوله انا قلت ترى اذا جاء البنت شي الله لايحللك وتصير بذمتك يوم القيامه يا غشاشه قالت اصلا انت خوانك يكذبون عليك ما يبنوك تتزوجين انا سكرت بوجهها السماعه
وانا رحمت البنت المسكينه لان اهلها ماجاء على بالهم يسئلون الشرطه مو زيي لولا الله ثم اخوي في اخر لحظه سئلهم كان رحت فيها حتى ابوي قال لخوي الله يجزاك خير لو كان علينا كان اعتمدنا على سوال الناس عنه فقط ووافقنا
واخيرا انا منقهره من افعال ها الخطابات يعني حياة الناس الى ها الدرجه صارت لعبه احسهن ما يفرقن عن بشار الاسد

يلزم عليك تسجيل الدخول أولًا لكتابة تعليق.

تسجيل دخول

المتميزة كول • 13 سنة

لاحول ولاقوة الا بالله بعضهن ماهدفهاا الا المادة

ملاك سدير • 13 سنة

كلامك صحيح بعضهم ماهمها الا الماده علشان كذا انا ضد هالنوع من الزواج
قبل سنتين اتصلت خطابه علينا قالت داليني عليكم ناس وتمدح بتخطب لواحد يوم سألنا طلع حق شرب وحشيش ومطلق زوجته غصبا عنه لان هي اصرت ع طلاقه مالومها بتشرد من حياة الجحيم ولاالخطابه الحقيره تقول طلق لان زوجته ماتعرف تطبخ ولا تنظف بيتها يوم دقت تأخذ القرار من حضها رديت انا قلت جايبه لي سكير تلقيناها باهلك ان شاء الله ع طول قفلت بوجهي الله لايوفقها

أأحلام • 13 سنة

السوالف قديمة ولها سنين

وبعدين من متى الخطابات يجيبون ناس صاحية

اللي له أهل وصاحي

يخطبون له

وكل يتمناه وما يحتاج لعجوز كذابه تورط بنات الناس

واللي يلجأون للخطابات

المعددين

المطلقين

الأرمل

اللي يبي مسيار

اللي راتبه ضعيف

و

و

ويا ما سمعنا قصص تشيب

khulwd saad • 13 سنة

الله يرزقك الزوج الصالح يارب

مثل العسل2011 • 13 سنة

الله ينتقم من كل ظالم