بعض المجتمعات الي نختلط فيها بهالشكل !

صباح الخير .. :26:

كل وحدة فينا لها مجتمع عائلي
تخالطهم بشكل دايم من عمام او خوال ..

لكن مرت علي نوعية مجتمعات الحريم فيهم
شخصياتهم ماتساعد يكون فيه عشرة وتواصل ..
تفكير سطحي وبدائية واضحة تبان من عدة امور
ممكن تجتمع كلها او بعضها بالشخصية الوحدة:

تشوفين الحرمة او البنت
مستوى تعليمها بسيط (يمكن هالشي ماله دخل لكن لاحظت وجوده بين الاغلب)

بالمجالس تحب تاكل الجو ويصير كل الكلام والاهتمام لها

لما تهتمين فيها وتسالين وتقومين بالواجب تستهين فيك
وتهملك ولا تبادلك نفسك الاهتمام ، هذا اذا ما نفخت نفسها عليك
وصدقت انك انتي المفروض تركضين وراها وتسالين ..

اذا ما حبيتيها وتقبلتيها لاي سبب ما تاخذ الموضوع بروح رياضية
بحيث تنساك ولا تفكر فيك، لا بالعكس تحقد عليك واذا حصلت فرصة
تهينك ما تتردد هذا اذا ماحطتك براسها اصلا وجلست تكيد لك

في حال الخلاف تتفاهم مع غيرها بصوت عالي وهمجية
ولا تراعي لا اسلوب ولا منطق بالكلام
يعني لو غلطت ماتبي احد يقول لها غلطتي
ولو انغلط عليها تاخذ حقها بس مو بالتفاهم والمنطق
بالهواش والسب الصريح او غير الصريح

مو بس كذا ، تحاول تنقل كل الي صار بينها وبينك
للناس عشان تبي تكرههم فيك املا انهم يقاطعونك
او تطيحين من عينهم
وتحاول تتصيد كل الفرص الي تقدر من خلالها انها تهينك
زي مثلا تجي لبيتك وماتمد يدها تسلم ، تدق بالكلام
تصاحب الناس الي يكرهونك بالذات وتزين علاقتها معهم

في الناسبات حتى سلوكها العام يبين حقدها
تقطع كلامك وانت تحكين مع شخص عشان ماتبيك تسولفين
مع احد، تدق بالحكي، تتعمد تجلس معطيتك ظهرها، لو قمتي
من مكانك ترجعين تلقينها جالسة فيه

بشكل عام تحب تعرف وش عند غيرها وين راحوا وين جو
مستواهم المادي بناتهم ينخطبون ولا لا ومن خطبهم
وعيالهم من مين خطبوا يعني هذي الامور الي تشغل بالها اكثر شي

زميلتي بالعمل عندها مجتمع خوالها بهالشكل والمشكلة
المجتمع صغير يعني خوالها مو كثير فبالتالي لما تحتك فيهم
تعاني وقت المناسبات من بعض الامور الي ذكرتها فوق
لدرجة انها تضطر تقاطعهم وما تختلط كثير .. ريحت نفسها

وحدة من معارفي ايضا صار مجتمع خالاتها هو نفسه
مجتمع زوجها واهله لانها تزوجت ولد خالتها فايضا لا زالت
تعاني بسبب كونهم يجون لوسط بيتها وتتكرر الحركات المهينة
ويطلعون .. متخيلين شعور ان شخص يجي لبيتك باستمرار
ويهينك ويغلط عليك ويطلع ولا تقدرين تتكلمين ولاحد يدافع عنك حتى ؟

انا يا كاتبة الموضوع ايضا عندي من مجتمعي 3 حريم بالشكل
الي ذكرته ! ورغم ان عددهم قليل لكن للاسف ماثرين بالباقين
بعقليتهم هذي فصايرة ماقدر اخالطهم كثير واجتمع فيهم كثير

فاذا كنتوا مريتو بهالنوع من المجتمعات
كيف تتصرفون معهم ؟ تعاملونهم بنفس اسلوبهم وتستمرون
بالتواصل ؟ تقاطعونهم وتكتفون بالرسمية بالتعامل ؟
بالذات لا صاروا يجونكم بالبيت كل فترة وفترة مع هالتصرفات
البايخة .. وش الحل ؟