- كاتم الصوت والمسدسات
http://www.youtube.com/watch?feature=player_detailpage&v=qZU5TGljAmw
الصوت الخفيف اللي نسمعه والمجرم حاط الكاتم (مثل صوت حبل ينسحب من تحت الفراش بسرعة كلله ب كلَك بكلَك. الكاتم يخفف الصوت بس مو واجد راح يظل صوت الطلقة قوي، وقوي كفاية ان الجيران يقومون منه بعد. علمياً قوة صوت الطلقة من غير الكاتم توصل 150 ديسيبل، ومع الكاتم يصير 120، الفرق مو واجد
- شاحنات نقل البنزين والأكشن
ياخذ له رشاش ويخلصه عالشاحنة بعدين ينفجر الخزان وتطلع ألعاب نارية وإذا كنت محظوظ راح تشوف اسم الفيلم ينكتب بالنار عالأرض، وتلقى البطل عافس وجهه ومعطي الخزان ظهره وماشي يعني مو هامّه وحده كوول
طلقات المسدس أو الرشاش شبه مستحيل تخترق الخزان بالأساس؛ وحتى لو قلنا يمكن هالطلقة قوية حيل ومصنوعة مخصوص حق اختراق الخزانات، كل اللي يصير الخزان يسرّب بنزين شوي لا أكثر ولا أقل.
- كل شي في الفضاء بطيء
مقاطع الفضاء بالأفلام أو حتى الثقافية منها لشركة ناسا واللي نشوفها بالأنترنت دايما نشوفهم يتحركون بطيييييييييءءءء حيييييلللل مثل مقطع مصورينه عالبطيء. اللي يشوفهم يقول حركتهم ثقيلة كلش. حتى واحنا صغار نبي نلعب يعني رواد فضاء نسوي روحنا نطير عالبطيء :2thmup:
الانطباع هذا مو حقيقي، رواد الفضاء يتحركون بطيء عمداً. يعني يقدرون يتحركون بسرعة بس ما يبون. ليش؟ المساحة داخل المركبة الفضائية حيل صغيرة واحتمال كبير يكسرون أجهزة او يطيحون أغراض أو يتعورون إذا تحركوا بسرعة من غير حساب.
فكر فيها، الحركة في الفضاء أسرع بسبب انعدام الجاذبية، إذا ماكو شي يشدك لجهة معينة أكيد بتصير أسرع.
كفخة ورا الراس تمسح ذاكرتك
يورونك واحد من الممثلين يسوي حركة على غشمرة كفخ صماخ صاحبة من ورا والأخ فقد الوعي بعدين قام مو ذاكر شي ولا حتى اسمه. بعدين ينكفخ مرة ثانية بالصدفة وكل شي يرد طبيعي.
بالصج حالات فقدان الذاكرة فوق انها نادرة حيل تلقى من النادر أكثر انها تصير من ضربة على الراس.
السمك الصغير المتوحش اللي ياكل لحوم البشر
نشوف واحد يطيح ببحيرة أو نهر بمنطقة استوائية ومرة وحده يصرخ من قُمة راسه وسطح الماي يتحرك بسرعة يعني أسماك صغيرة مفترسة قاعدة تنهش في الريّال فقير.
الأسماك هذي حقيقية ما عليها كلام، وفعلاً عندها أسنان حادة (شوفوا الصورة) وتاكل لحم إي محد يختلف. بس بالصج ياكلون الأسماك الأخرى بشكل رئيسي مو بشر. ما ياكلون بشر إلا إذا ذبحهم الجوع وكانوا مجموعة كبيرة بحوض صغير يخليهم يتنرفزون، إذا صار وواحد طاح بالحوض هالحزة بس تلقى يعضون ويقرمون منه بس، مو ياكلونه أكل عالآخر ويخلونه عظم نفس ما نشوف بالأفلام والكارتونات.
الحرب في الفضاء
الفضاء ما فيه هوا أو أي مادة تنقل الصوت، إذا في شي ينفجر ما راح يطلع صوت قوي يبط اذنك والسفن الفضائية تسمعه. حتى يوم يحفرون أو يستخدمون أجهزة أو يمشون بسيارة على سطح أي كوكب أو قمر فضائي ما راح يطلع صوت مزعج من عملية الحفر أو ماكينة السيارة وتوايرها أو صوت أجهزة.
تحديد مكان المكالمة يبيله حوالي الدقيقة
لازم المجرم يظل يتكلم بالتلفون مع المحقق حوالي 45 ثانية أو دقيقة أو أكثر علما يصيدون مصدر المكالمة ويروحون له. لا يبه هالأيام بس يرن التلفون خلاص عرفوا من وين متصل ووين قاعد بالضبط.
نط من الدريشة عادي الزجاج ما يجرح
الزجاج اللي يستخدمونه بالأفلام هذا من نوع خاص بس حق المشاهد وينكسر بسرعة يصير مثل تراب ما يعوّر الممثلين. بالصج الزجاج نادراً ينكسر إذا ركضت ونطيت عالدريشة أو الباب الزجاج أو واجهة المحل.
يمكن إذا شفتوا نشرات الأخبار حق أحداث الشغب راح تلاحظون الناس اللي تحذف كراسي عالمحلات زجاجهم ما ينكسر بسرعة نفس الأفلام، هذا الصدق عاد كيفكم.
السجاير المولعة تشب البنزين
يصبون خط من البنزين على مسافة معينة لي سيارة أو طيارة وبعدين واحد يقط سجارته المولعة والنار تشب بالخط ليما توصل للسيارة أو الطيارة وكاااابووووووووم انفجار والعاب نارية.
في واحد خبير بالأدلة الجنائية اسمه ريتشارد تونتارسكي سوا تجربة سنة 2007م كان يولّع سيجارة ويقطها بصينية أو صحن بنزين. عاد التجربة 2000 مرة، ولا مرة من هالألفين ولّع البنزين من السيجارة!
السيارة إذا كانت حد الدوسه تقدر تعبر الحفر الكبيرة
عشان تطوف السيارة حفرة كبيرة بين جسرين أو طرفين بناية ما راح يفرق إذا كانت دايسه أو لأ، بالحالتين راح تطيح السيارة. فيزيائياً لازم يكون في شي يخلي السيارة تصعد بزاوية مرتفعة عشان توصل للجهة الثانية وبسرعة معينة.
الطلقات تطلّع شرار
يفرغون مسدسات ورشاشات على البطل اللي يناقز ومحد يحوشه وحوالينه نشوف شرار يطير يعني الطلقات مبوشه الهدف. طلقات المسدس مصنوعة من الرصاص وما يصدر منها شرار سواءاً حاشت الكاشي أو معدن أو خشب أو خشم ديناصور.
السيارات المحترقة تنفجر
من الحالات النادرة انفجار السيارة بسبب الاحتراق،
نفس الشي إذا طاحت سيارة من مرتفع عالي أو رشوها بمسدس أوتوماتيكي أو طلقات واجد، المفروض ما تنفجر.
واحد يطير لي ورا من طلقة حاشته
يعني لازم مسدسات الأبطال شي ما صار ولا استوى، هوليوود يحبون يشوفون البطل يطق بمسدسه العجيب وهو مكيّف أو حتى منسدح مرتاح وتلقى الأشرار يتطشّرون أمتار لي ورا من الطلقات.
ما يصير يبه والله ما يصير ، يعني وين قاعدين يا عالم يا بشر حرام عليكم في شي اسمه فيزيا، في واحد اسمه نيوتن قانونه الثالث يقول “لكل فعل رد فعل، مساو له في المقدار ومعاكس في الاتجاه. بشرط ان لايتأثر من تلقى الفعل بشكل سلبي يؤثر على رد فعله.” إذا واحد طق مسدس طلقته قوية لازم اهو يطير لي ورا أو تنكسر ايده عشان المجرم يطير لي ورا.
وسلامتكم ياعسسسسسسولات ولاتصدقون حركات الافلام :2thmup:
بس جد كنا نعيش معهم لحظه بلحظه بذات الي يكب بنزين بعدين يجدع السجياره وتمشي نار مسافه وبوم
هذي مدري احسها صدق من كثر ماشوفها في الافلام