وعليكم السلام ورحمة الله وبركاته

شوفي يالغلا ممكن أطبطب عليك وأواسيك أو أدعيلك وخلاص
وأنت ممكن تنبسطين ان احد يواسيك وحس فيك ودعالك

لكن وبعدين ؟

راح تتغير هالمأساه اللي بنظرك أبدا كله كلام في كلام

كلامك كله حسب ما قرأته هو تضجرك من حال أهلك معك وحالك أنت كونك لا وظيفه ولا زواج ولا حتى اجتماع بالناس

طيب فكري لو أنك توظفتي أو تزوجتي

خلينا نقول جاتك وظيفه طيب وبعدين أنت متوقعه كل الحياه اللي أنت فاقدتها راح تجيك من أول يوم بوظيفتك وراح تصيري محد قدك
ممكن يدور في خاطرك أنك لما تتوظفي راح تصرفي على نفسك وتأمني نفسك علشان ماتعتازين أحد وفي نفس الوقت ممكن اهلك يحسبون لك حساب وأنك راح تكرمي نفسك وتشتري كل شي خاطرك فيه وبالتالي تنبسطين وانه راح يصير فيه مجتمع جديد تختلطين فيه

طيب وبعدين ؟

أنت واثقه أنها راح تكون سعاده فعلا ولا هي فرحه بشي جديد وبس ؟

صدقيني إذا كنت أنت زي ما أنت ما تغير فيك شي شخصيا هالفرحه بالوظيفه بتصير زي فرحت أول ماتشترين لبس جديد
قارنيها بملابسنا يوم العيد صرنا نشتري جديد وافرح به أول ما أشتريه بس لكن شوفي مشاعرنا يوم العيد متبلده لا نحس بفرح ولا سعاده ولا شي وكل عيد زي اللي قبله لين ماصار العيد روتين فقط نشتري فيه ملابس ويمكن صرنا حتى مانفرح بها ذاك الفرح

إذا ياعزيزتي لا تضيعي عمرك في أوهااااااام

أنك لا توظفتي بتعيشي سعاده ماعمرك عشتيها أو راح تكوني بحال أفضل مما أنت عليه الحين
ماتدرين وين الخيره أنك تكوني موظفه أو لا

وبما أنك ماتختلطي بأحد يمكن ما تشوفي وتسمعي بحال الموظفات
خلي مجتمع الموظفات السيء اللي هو حقد وحسد وكيد ومكر لالالا ما أقصد ذا لأنك مو بالضروره تصادفينهم على حسب
لكن الموظفه نفسها وحالها بالحياه هل هي فعلا حاسه بالسعاده بعد ما أغنت نفسها وسوت وفعلت ....الخ
لا تجيبيلي موظفه وحده او ثلاث او عشر حتى أبغاك تنظرين للموظفات عموما
أكيد بتقولين لي يختلفون طيب ؟ وش اللي خلاهم يختلفون مع انهم كلهم عندهم وظايف ؟ اذا الحال اللي هم فيه ماهو من الوظيفه
من حياتهم نفسها

طيب أنا ليش أضيع نفسي وأركض ورى شي ماهو مصدر سعاده هو مصدر للمال فقط
ليش كل هالثقة أن السعاده راح تجي مع الوظيفه والزواج ؟؟؟ مع ان اللي حاطين هالقانون هم هذولي الناس اللي الحين اكثرهم يشتكي هم ضيقه وغم وطفش وضيق في العيش وكثرة الطلاق

انت لما تجيك وحده وتقولك هذا المنتج زين للبشره ومدري وشو وتمدح وتمدح ويوم تطالعين بشرتها هي في الشرق وكلامها في الغرب تثقين في كلامها وتشترينه ولا تقولين لو بيفيد كان فادها هي اول ؟؟

خلاص حطي في بالك ان الناس اللي تعظم من أمر الدنيا بهالشكل هم نفسهم لا سعاده تشوفينها عندهم و يشتكون من الديون وطفرانين بأول الشهر وحالات الطلاق بالكم الهائل هذا وغير المشاكل الزوجيه اللي ملت الهواتف الاستشاريه والتلفاز والنت وغيره وغيره
بعدنا نثق ان اللي ناقصنا بسسسسسس وظيفه وزواج علشان ننبسط ونحس بالحياة ؟!

ومحنا راضين نوقن حق اليقين بقولة تعالى ( مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ )

احنا محتاجين مشروع أكبر من كذا بكثيييييييييير مشروع إصلاح أنفسنا
وهذا اللي يخلينا سعداء طول حياتنا سعداء فعلا سعاده تنبض بها قلوبنا وتضخها لجميع أعضائنا

صارت الوظيفه بالذات والزواج أيضا زي البندول لا اشتكيتي من الهم والضيق ولا حتى طفشانه قالوا شوفيلك وظيفه ولا اتزوجي
والبندول ماينصحك فيها الا عامة الناس اللي ماهو بطبيب ولا يفهم وش هي علتك
طيب اخذنا بندول وبعدين ؟ بنقعد طول أعمارنا بمسكنات والا اذا جابلي هالبندول بلوى ثانيه وش اسوي ساعتها ؟
ليه ما نشوف وش سبب هالصداع من أصله واعالجه من جذوره ؟

ممكن يجي ببالك أنك أنت تبحثين عن أشياء حلال وكثر الله خيرك انك ما التفتي لشي حرام

ترى أحيانا الواحد يبرر لنفسه بسالفة حلال وحرام
الله سبحانه وتعالى في كثير من الايات كان يحذر من الانغماس في الدنيا والجري وراها ونسيان الاخره
يعني السالفه مو سالفة انه حلال وبس انشغالك بالحلال هذا لحد ينسيك ذكر الله وعباته اللي هي اساس وجودنا بهالدنيا هذا لازم نحذره بعد

الله سبحانه وتعالى يقول : ( يا أيها الذين امنوا لا تلهكم أموالكم ولا أولادكم عن ذكر الله ومن يفعل ذلك فأولئك هم الخاسرون )

طيب هذي أموالهم وأولادهم يعني حلالهم لكن اذا انشغلوا فيها عن الأساس صارت عليهم خساره

صحيح الوظيفه قد يغنيك الله بها عن الناس
وصحيح الزواج مطلب إنساني غريزي

لكن ماهم اساس السعاده ابدا بدليل أنك تجدي موظفات ومتزوجات ولازالوا يبحثون عن السعاده !

طيب أنت ممكن تشوفين وحده متوظفه وسعيده وتجي تنصحك يافلانه توظفي تتونسين وتغيري جو وتخالطي الناس وتصيي قويه ..... الخ من نصايح الحريم المعروفه
أنت قد تغترين أن فعلا الوظيفه هي اللي خلتها كذا وغيرتها وخلتها سعيده
طيب أولا أنت ماتدرين عن حياتها ممكن هي مو بسعيده في كل نواحي حياتها
بس الواحد بطبيعته مايحب يطلع اسراره
ثانيا قد يكون تفكيرها غير تفكيرك يعني هي آدميه عندها الوظيفه بالدنيا كلها وعندها شلتها اللي بالوظيفه أهم من اي شي فطبيعي تحصلينها تتكلم عن الوظيفه بهالشكل لأن ممكن الوظيفه حققت لها رغبة بحكم انها تحب جمعة الحريم والسولف فتحقق لها هالشي او انها وحده تحب نوعية العمل اللي هي تشتغل فيه يعني مثلا طبيبه هي اصلا تحب الطب فالكلام والبهرجه اللي هي تقول عنها لانها حصلت الوظيفه اللي تناسب اهتمامها واشبعت حاجتها العلميه
او ممكن وحده تحب المناصب وانها تكون السيده فلانه وقبل اسمها ألف ولا دال
فلقيت اللي تبغاه
ثالثا : قد تكون هي متوفره فيها أسباب السعاده الأساسيه يعني آدميه مصليه صائمه قائمه تخاف ربها مطيعه لله لها نصيب من الطاعات والذكر
وكانت الوظيفه أو الزواج رزق دنيوي لها من الله فطبيعي انها تفرح به
فانت لما تنصحك بالوظيفيه قد يكون حالك غير حالها في الطاعه والعباده فتظنين انه هذا اللي مخليها سعيده بحياتها
وهي غلطانه اذا نسبت سعادتها للوظيفه أو الزواج هي قد تكون مكمل لكنها ماهي اساس ولو كانت أساس السعاده كان غيرها من الموظفات والمتزوجات سعيدات برضو واذا ظنت انها فعلا هي سبب سعادتها وحرصت عليها وانشغلت بها عن الامر الاساسي اللي اسعدها راح تفقد هالسعاده ويمكن ربي يبتليها ويجعل ما ظنت انه اساس سعادتها بالدنيا هو سبب لهمها وغمها
فلا يغرك لانك اذا بغيتي تقليدين احد بحياته علشان تصيرين مثله سعيده اما تاخذي الوصفه كامله والا بلاش لا تاخذي الظاهر بس انها موظفه او متزوجه أو غيره!


وقيسي الكلام اللي قلته عن الوظيفه طبقيه على باقي مطالبك الدنيويه الثانيه بالرغم أني أبدا ما أقارن أهمية الوظيفه بأهمية الزواج لأن الوظيفيه كناية عن المال فقط لكن فيه أسباب أخرى لسعة الرزق فما أعتبر الوظيفه شيء مهم وأساسي خاصة للنساء فالواحد كمان لا يضيق على نفسه ويكلفها أكثر ماتطيق من المطالب يعي بعض الحريم صارت الوحده اذا ماتوظفت ضاقت عليها الدنيا واهتمت واغتمت وهي ماهي محتاجه لكن صار عند البعض كأنه دستور لازم لكل يمشي عليه والا حياته ناقصه


خلاصة الكلام هذا كله واللي أبغى أوصله لك تحديدا

أن اللي النواقص اللي ناقصت بحياتك على قد ماهي مهمه ( بعضها ) وكلامي ذاك كله مو تقليل من شأنها أبدا ولا تتفيه لها بل أنا مقدره لوضعك وظروفك اللي ذكرتيها لكن ماهي هيا النقص الحقيقي اللي مكدر حياتك بشكل كبير وماهي هيا السبب الرئيسي اللي راح يجلب لك السعادة الحقيقية وليست فرحه مؤقته فالواحد لا يضيع عمره وهو يوهم نفسه انه ( بس لو يحصل هالشي راح يعيش بهنا طول عمره ) لك يبدأ يغير تغيير جذري في حياته

والتغيير الجذري اللي أقصده هو علاقة جديد تربطنا بخالق الكون ومدبره
ماراح أقولك أقري في فلسفات البشر لانك راح تتوهي وتتشتتي
لكن أقري كلام رب البشر واتقربي اليه هذا هو اللي راح يغيرك جذريا وبالتالي راح تتغير حياتك جذريا
اذا منتي عارفه ايش تسوين أبدأي التغيير ( بالمحافظه على الصلوات وذكر الله وركعات بآخر الليل )
والحسنه راح تدعو أختها
استغلي هذا الجزء من عمرك اللي ذهنك فيه صافي منتي شايله هم دراسه أو بيت أو عيال وأعيدي تأسيس نفسك علشان تعيشي بقية عمرك على هالأساس

أما بخصوص أذية من حولك لك فخذي من وصية الله لنبيه

( ولقد نعلم أنك يضيق صدرك بما يقولون فسبح بحمد ربك وكن من الساجدين واعبد ربك حتى يأتيك اليقين )

ورمضان الحين مقبل علينا أسي همومك وأنسي أمنياتك هالشهر بس وأجمعيها بهم واحد الدار الآخره خليها هالمره رضى الله الظفر بليلة القدر العتق من النار .... الخ وكوي على ثقة بعدها انك ماراح تشيلين هم شي دنيوي بعد اليوم كل شي بيجيك لعندك
جربتي رمضانات فاتت وأت شايله نفس الهموم والغموم ولا أتغير شي

" من كانت الآخرة همه جعل الله غناه في قلبه و جمع له شمله و أتته الدنيا و هي راغمة ، ومن كانت الدنيا همه جعل الله فقره بين عينيه و فرق عليه شمله و لم يأته من الدنيا إلا ما قدر له "

اعتذر عن الإطاله وأتمنى ما أكون قلت كلمة ضايقتك لكن صدقيني مانصحتك الا باللي احب أذكر فيه نفسي

أسأل الله العظيم رب العرش الكريم أن يفرج همك وغمك وأن يشرح صدرك بالإيمان والطاعه وان يتولاك برحمته ويغنيك بفضله عمن سواه يارب

نانسي
زوزي
نبض
برنسسا
مدام
سفينة
ذوق
احلا ايامي
جزاكم الله الف خير والله يسعدكم يارب


ترانيم قلبي
كلامك صحيح مية بالمية عمر الزواج والوظيفة كانت طريق لسعادة لكن محد ينكر انها من احد واهم اسباب السعادة بعد تقوى الله
ورب العالمين قال المال والبنون زينة الحياة الدنيا والأنسان مفطور على حب المال والتزاوج والأنجاب
والأهم زي ماقلتي هي الباقيات الصالحات والعمل للأخرة
شكرا لك وعلى الوقت اللي عطيتني اياه بردك علي الله يسعدك دنيا واخرة