بعلمكم كيف فطمت ولدي من الرضاعة

حبيت اشارككم وافيدكم في فطام ولدي ان شاء الله احد يستفيد من تجربتي مثل ما افدتوني في مجالات مختلفة.

بعض المعلومات المهمه :
عمر ولدي : سنه و ثمانيه شهور
نوع حليبه : المراعي ابو مزاز
مدة الفطام : اسبوعين


اسباب الفطام :
انعدام الشهية
اعتماده على الحليب فقط سبب له امساك شديد جدا
كل مرة اروح الطبيب يقول لي عنده فطريات على لسانه وفي فتحة الشرج وانتو بكرامه (رغم اني اعقم الرضاعة بعد كل استخدام لكن الشكوة لله)
بدات اسنان ولدي تتاكل الاماميه وكفاية عليه قريب يكمل سنتين




الاسبوع الاول (اسبوع المرض)
فطمت ولدي يوم ويوم ثاني مرض ترجيع وسخونه فعلا كانت ايام عصيبه وصعبه علي وعلى ولدي لكن الحمد لله على كل حال ما اكذب عليكم بغيت اضعف وارجع له الرضاعة من خوفي عليه وشفقتي لانه ما ياكل شي ابد صار فعلا ريشه الوزن في ثيابه بس.. علبه حليب المراعي 200 مل ماتخلص طول اليوم وما ياكل شي ابدا وطول الوقت معصب ومتنرفز امي كانت تهاوشني ارجع له الرضاعة وابوه يقول اذا شفت الرضاعه بيدك او يده برميها في الزباله لكن انا قررت افطمه وربي بيكون في عوني وعون ولدي وفعلا كان لمرض ولدي جانب سلبي وجانب ايجابي لاتستغربون ايه كان له جانب ايجابي الي هو انسداد شهيته ورفضه لكل شي يدخل فمه سهل عمليه الفطام والجانب السلبي انه في فترة مرض ومحتاج اي شي علشان يرويه وانتهى الاسبوع الاول بكل معاناته


الاسبوع الثاني (اسبوع العصبيه والدلع والغضب)
دئما معصب ويتدلع كثير وطول الوقت في حلقي وبصعوبه ينام قيلولته ما ياخذها الا اذا فرينا فيه الديره كلها بالسيارة لين ينام وباليل اطفي الانوار كلها ويتعلق في ابوه احيانا يمشي فيه واحيانا يقرا عليه (الحمدلله بسم الله ما شاء الله زوجي كان له دور كبير في فطام ولدنا)
تحسن اكل ولدي وابرز شي صار يشرب ماي عقب ما ضل سنه ماطب بطنه الماي تحسنت باطنيته وقلنا بيباي للامساك
تحسن نومه صار يصحى مرة وحدة يشرب حليب بالمزاز وينام


الاسلوب الي اتبعته مع ولدي في فطامه
عندي طاوله جنب سريري احط عليها رضاعاته وحليبه يوم قررت افطمه شلت كل الرضاعات الي عندي في البيت وخبيتهم بحيث ان عينه ماتطيح عليهم وما يشوفهم وكل ما يصحى من النوم ويطلب الحليب اعطيه حليب بالمزاز واذا رفضه وبكى يبغى الرضاعه احتضنه بقوه واقول له اخذهتها القطة (لانه يخاف منها ومايحبها) اذا جا الصباح بنروح للقطوة وبناخذها منها ويهدا وينام واذا رفض ينام وصار يبكي اطلع معاه من الغرفه افتح له الثلاجة ويقوم يدور على الرضاعات الي انا استبدلتهم بلبن وروب وجلي والاشياء الي يحبها ولدي طبعا هو ما يعبرهم لكنه يلهي شوي ويهدى


والحمد لله تمت العمليه بنجاح واتعافى ولدي تحسن اكله شويه عن قبل بالرغم انه ما زال بكميات قليله ومافيه تنويع لكني بثابر معاه وادعو لي الله يزين حاله ويعافيه ويهديه
امانه الي تستفيد من موضوعي تدعي لي