بعيد عن الخرابيط والمبالغة

بعيد عن "خرابيط" الخلطات والحوسه واللعوزه والكسل عقب مده وبعيد عن المبالغة بانه الحل الامثل وبتحصلين النتيجه باجر الطريقة السهله والمضمونة للنظارة والبشرة الموحده هي انج تتبعين جدول سهل تقدرين تستمرين عليه ويكون جزء من حياتج اليومية
اول شي نبدا بأهم المهم


لترين الى ثلاث ماي - مافي داعي اشرح فوايد الماي للبشرة والشعر والجسم بشكل عام


تختارين كريم نهاري وكريم ليلي وسيروم فيتامين سي و كريم للعيون من اي ماركه تختارينها اهم شي خواتي ما تكون الماركات الغير معروفه والخلطات اللي ما تعرفين شو فيها اختاري الشركات الثقة اللي عندها مختبرات تختبر فيه مكونات منتجات العناية بالبشرة ممكن تشوفين الاشياء الغاليه او الاشياء المتوفرة مثل منتجات نيفيا او لوريال هم الافضل بالنسبة للمنتجات منخفضة السعر والمتوسطة مثل ذا بودي شوب ولوكسيتان وغيرها اما الغاليه فعندج لابريري واستي لودر وابتعدي عن شانيل وديور وطبعا كل ماركة عنايه الها كريمات متخصصه في لتفتيح البقع وللتجاعيد وللبشرة الحساسه فانتي تختارين اللي تحتاجينه


ابتعدي عن الكريمات الصينية والتايلندية وهالخرابيط مافي مقارنه بين شركات تصرف ملايين على مختبرات وبين شركات تبيع اي شي عشان الكسب والضحية هي البشرة والدليل لو تقرين اول ثلاث مكونات من الكريمات هذي تشوفينها كلها كيميكالز


ملاحظة على كريمات التفتيح هي لتفتيح البقع وتوحيد اللون مش للبياض وابتعدي عن اي شي له خص بالبياض لانه البشرة الموحده الخالية من العيوب اجمل بكثير من البشره المتفتحه عن طريق كريمات وخلطات


لا تنسين ماسكات الوجه sheet masks اختاري نوع واحد واستمري عليه اسبوعيا مره او مرتين


سنفرة الوجه مره وحده وبطريقة خفيفه مش بقوة


فيه زيوت خاصة للوجه من ماركات مختلفة ما يمنع انج تحطينها اذا حبيتي تزيدين من عنايتج بس مش شرط - اذا حاسه الخطوات الكثيره تخليج تتكاسلين اكتفي بكريمات النهار والليل وسيروم وللعين


غسل الوجه وتنظيفه قبل النوم ضروري جدا جدا جدا
ممكن تتبعين طريقة تنظيف الوجه الثنائي اول شي بزيت ازالة المكياج بعدين بصابون الوجه السائل او الرغوة عشان تتأكدين من انه البشرة تنظفت عدل


كل يوم خمس دقايق صباحا ومساءً كفيلة بانها تعطيج بشرة رطبه موحده


خلي فيتامين سي و اي جزء من برنامج الفيتامينات اللي تاخذينه




اني للجسم


الحل الوحيد والامثل لمشكلة توحيد لون البشره في شيين اثنين بس (سنفرة + ترطيب)
شفت كل انواع الخلطات وضحكت يعني مسوين زحمة والشارع فاضي عندج سنفرة السكر والزيت سواء سويتيه في البيت او اشتريتيه من صيدلية فهذيل المكونيني الرئيسيين كفيلين بازالة الجلد الميت وتنشيط البشرة وبعدها ترطيب باي كريم او زيت تريدينه


السنفرة مرتين اسبوعيا اما الترطيب فهو يوميا


سنفرة تحت الابط والركبه والفخذ كل يومين مع الترطيب


نقطة مافي داعي اذكرها طبعا وهي الاستحمام مره الى مرتين يوميا


اذا ما تلعبين رياضه فحطيلج يومياً تسوين ٥٠ setups ما بتاخذ منج خمس دقايق وممكن في البداية تجزئينهن على كم مرحله ترتاحين او تبدين بعشره وتزيدين وخلاص خلي هذا جزء من روتينج اليومي


كتابة روتين يومي مهم جدا جدا في ترتيب يومج وعدم تضييعه وانتي ما سويتي شي لنفسج
اذا عجبكم الموضوع بكمل واذا لا فاكتفي بهالقدر وباذن الله الكل يستفيد


ماكتبت هالموضوع الا بعد ما حسيت انه فيه وايد مبالغات من بعض العضوات يعني اعرف نيتهم زينه بخلطات واشياء معقده بس اعرف بعد انه كلها ما تفيد واللي يفيد هو روتين بسيط ومنتجات ثقه