بغيت رأيكم و خصوصا الحكيمات

السلام عليكم ورحمة الله و بركاته


اشلونكم؟

عندي موضوع بشوف رأي الحكيمات ورجاءا اللي تبي تتهاوش او تقط حجي غير لائق تغنينا عن رأيها

شوفوا بنات، قبل ما ابدأ بالمشكلة بشرح بإيجاز واخليكم بالصورة علشان تلقون الاجوبه لكل تساؤلاتكم اذا تساءلتوا ، انا اولا من الكويت وانتمى لقبيلة من قبائل الجزيرة ( يعني بدو)، عمامي كلهم تزوجوا حريم ما يصيرون لنا لكن من نفس القبيلة، إلا أبوي اللي خذا أمي حضرية ومتعلمة ووحيدة امها وأبوها من بين خوالي الثلاثه و مدلله عندهم عسى ربي يخليها لنا و يخلي لي أبوي ، و طول حياتنا تعلمنا على السفرات والطلعات و اكثر اختلاطنا مع خوالنا اكثر من عمامنا اللي ما نشوفهم الا بالمناسبات اما خوالي أسبوعيا نشوفهم، والسبب ان حريم عمامي وايد يضايقون أمي و يحبون يتهاوشون معاها وأمي طبعها مسالمه ما تحب تدخل بمشاكل و خلت زياراتها بالمناسبات و مع هذا ما تسلم من لسانهم.

طبعا انا بعد ما كبرت (يعني صرت بعمر الثانوية العامة)حاولت اختلط ببنات عمي والاحظ عليهم من تصرفاتهم انهم ما يبوني بس والله لأني مصفيه النية اقول يمكن انا متوهمه وأحاول اقرب منهم لكن انصدمت منهم صدمات بمواقف كثيرة بينت انهم يكرهوني و قالوها لي اشكره بلسانهم ان إحنا نكرهج و نكره امج وانا من صدمتي رحت ابجي عند أمي واشكي لها واهني أمي قالت لي ان هذا طبع بعض البدو جذي ما يحبون الغريبة تدخل بينهم وينبذونها (تقصد عنها أهي وهالشي الأمهات ورثوه لبناتهم) و فهمتني ان مهما كان هذيلا بنات عمج من لحمج

واستمرت علاقتنا معاهم بس بالمناسبات ليما كبرنا وانا تخرجت وبعد تخرجي درست دراسات عليا و خواتي من بعدي كملوا دراسات عليا و صرنا اذا رحنالهم بالمناسبات يحترمونا (سبحان مغير الأحوال) ويكلمونا بأدب بعد ما كانوا يدورون الشاره علينا بس علشان يتهاوشون معانا و يهزأونا بصراحه لان إحنا ما تربينا على المداحر والهواش كنا ننصدم و نسكت او نبجي بس لما كبرنا اللي تغلط علينا نرد عليها ونوقفها عند حدها وصاروا يحسبون حساب الكلمة اذا قالوها،

على العموم اللي صار انهم من 7 او 8 شهور قالوا لي بنات عمي انهم مسوين قروب في الواتساب ويبوني انضم معاهم و ضافوني انا وأختي و ماشاالله اول الأشهر صايرين عسل و سوالف و نكت والأمور ماشيه تمام الي ان صار حوار بموضوع عام و انا قلت رأيي فيه رأيي و قاموا يستفزوني و قلبوا 180 درجة و شفت وجوه غير الوجوه من هجوم علي و قاموا يسبون و يغلطون واصدموني يعني جنهم أطفال مع ان أعمارهم اصغرهم 29 و اكبرهم وحده بال 48 سنه

مع انه نفس الموضوع تناقشت فيه مع بنت خالة أمي و صديقاتها اللي اختلفت بالرأي معاهم بس نقاشنا صار بدون سب و شتم و قمت أقارن بين حوارهم و الحوار اللي دار بيني و بنات عمي
اللهم ياكافي ، والله انا قلت عقلوا عن اول و صاروا حريم طلع العكس

المهم اللي صار أني حذفت القروب وريحت بالي لأنهم علي الرغم من مرور أسبوعين علي الموضوع اللي تناقشنا فيه الا انهم مازالوا يتحرشون و يقطون نغزات مثل اليهال و بصراحه انا ما احب أعيش نفس هالوضع المتكهرب ، يـــا اما يناقشون بأدب او ماله داعي أناقشهم واسمع سب منهم


الحين انا قلت خلاص علاقتي مع بنات عمي بخليها مثل اول زيارة بالمناسبات و أوجبهم و بس لأني شفت هذا اللي أحسن لي و يناسبني، و ياليت يـــا بنات اللي عندها اقتراح تقوله لي علشان اخفف اشوي من ها لكراهية اللي فيهم بدون ما انزل من قدر نفسي ؟ ولا خلاص فات الأوان؟

رسولنا. عليه الصلاة و السلام قال بما معناه تهادوا تحابوا والله ربي شاهد أني ما اهديهم الا الهدايا اللي لها وزن و ثقل بمناسباتهم بس مادري ليش ما يصفون النيه

والله يحز بخاطري اذا شفت صديقاتي علاقتهم في بنات عمهم حلوه و قلوبهم على بعض اللهم لا حسد بس يضيق خلقي علي وضعي انا و بنات عمي