بــتــعــرفــوا شــو تــعــلــمــنــا مـن الأجــانــب؟

بــتــعــرفــوا شــو تــعــلــمــنــا مـن الأجــانــب؟

--------------------------------------------------------------------------------




يا ريتنا تعلمنا منهم النظام....



كل يليي بنعرفو هو سياسة المطاحشة والتدفيش ودفع الرشاوي والبخاشيش وحكلي لحكلك...






يا ريتنا تعلمنا منهم إحترام المواعيد...




كل يلي بنعرفو هو إنو التقل صنعة وإنك لازم توصل على موعدك متأخر على الأقل ربع ساعة وإنو لما الدكتور بيكتب على باب العيادة ساعات الدوام من 4 إلى 8 معناتها إنو رح يوصل بعد ما يخلص الغدا والقيلولة وفنجان قهوتو يعني شي الساعة 6 و6 ونص...




يا ريتنا تعلمنا منهم محبتهم للغتهم وثقافتهم وحرصهم على نشرها...




كل يلي بنعرفو إنو العربي لغة بلدي وإذا بدك تكون أكابر يعني Class لازم تحكي كلمة عربي وتلاتة أفرنجي... وأنو المثقف هو الشخص يلي بتابع أخبار المجلات الفنية...تعلمنا إنو بأول مناسبة بسافر فيها الواحد شهرين لبرا بينعوج لسانو وبينسى الحكي العربي وكأنو عاش هونيك عمر وبقول: (يا سيدي العرب بعمرهم ما بصيرو خلق وعالم) وكأن يلي عم يحكي هالحكي خلقان تحت برج إيفل وجنب ساعة بيغ بن...




يا ريتنا تعلمنا منهم حرصهم على تحسين مستوى بلادهم من الناحية العلمية، الطبية والخدمية ..



طبعاً إذا كل صاحب منصب بدو يعتبر منصبو وسيلة لتوزيع الإمتيازات على أهلو وحبايبو والناس الدفيعة فكيف بدها تصير حالة البلد؟؟ إذا ما حدا عم يحاول يطور ويحسن والكل ماشي على سياسات متل: (يا بيت مالي منك)، (بدي من هالحزمة عود والباقي تنتعو القرود)، (أنا ومن بعدي الطوفان)، (من بعد حشيشي ما ينبت حشيش ومن بعدي ما حدا يعيش) و(فالج لا تعالج) ...




يا ريتنا تعلمنا منهم خوفهم على بلادهم وبيئتهم...




أي بيئة وأي شوارع وأي بلد إذا في عنا ناس عم يكبو كياس الزبالة من الشبابيك والبلاكين.. إذا في عنا مطاعم عم يرمو الأكل الزايد وعلب الكولا الفاضية وكل الفضلات يلي عندهم بالنهر، إذا في عنا مجاري صرف صحي عم تصب بأنهار بلادنا؟؟؟




يا ريتنا تعلمنا منهم كيف عم يشجعو السياحة ببلادهم...




أي سياحة إذا ما في حدا يدور على الآثار يلي عنا وإذا حدا لقى آثار بهربها لبرا..إذا الكورنيش بطرطوس منكوش نكش وما في محل متل الخلق لحتى تقعد، إذا لا في منتجعات ولا فنادق متل الخلق ومجاري الصرف الصحي عم تصب بالبحر قريب من الشاطيء الأزرق وريحتا نستنا ريحة هوا البحر وإذا كان في فنادق ومنتجعات محترمة عم تكون أسعارها خمس وست وسبع نجوم أما الفنادق والشاليهات ويلي أسعارها معقولة عم تكون سيئة على كل المستويات...إذا في عنا مناطق بتاخد العقل ناح أم الطيور، ومشقيتا وغيرها وغيرها وما في إلها دعاية ولا طرقات ولا خدمات متل الخلق والعالم وإذا كان فيها شوية خدمات فعم تكون بجهود أهل البلد...




يا ريتنا تعلمنا منهم كيف عم ينظمو شوارعهم ومدنهم..



بتلاقي عنا الشارع فيه ميت حفرة وجورة ومطب وإذا نزلت نقطة مطر بصير بدك زورق لتقطع الشارع، بتلاقي عنا إشارة مرور وجنبها ميت شرطي عم يكركبو الدنيا، بتلاقي عنا عمليات التحفير والنكش والنبش معبية الشارع وما في إشارة تنبيه متل العالم، بتلاقي الطرقات شي منور وشي الله ينور عليكم (خاصة طريق المصايف بين دمشق وبلودان) وبيقولو ليش فيه حوادث؟؟ يتلاقي عنا البناية بلزق البناية لا مساحة خضرا ولا هم يحزنون، بتلاقي كل واحد عم ييعمر على كيفو ويعمل الكسوة الخارجية على كيفو وهاد عامل واجهة البناية خضرا وهاد بيضا وهاد بنية يعني متل منشر الغسيل المشرشح...




يا ريتنا تعلمنا منهم إحترامهم لرأي الآخر...



و لو بلا رأي آخر بلا بطيخ نحن برأي واحد يا دوب ماشين كيف إذا صار في أكتر من رأي والكل بدو يكون الراس؟؟




يا ريتنا تعلمنا منهم كيف بحبو بعضهم كأولاد بلد واحد على اختلاف المناطق...



لساتنا عايشين على مبدأ أنا سوري وإنت عراقي وهاد إبن الريف وأنا إبن المدينة، هادا سني وأنا مسيحي ويلي جنبو شيعي ويلي وراه درزي...




يا ريتنا تعلمنا منهم كيف عم يستخدمو التقنيات ووسائل الاتصال الحديثة بشكل صحيح بيخدم مصالحهم...




كل يلي بنعرفو هو إننا نبعت لبعض رسائل وملفات بالـBlue Tooth كلها خلاعة وقلة أدب، كل يلي بنعرفو هو كيف نستعمل الــ Chat والانترنت لحتى فلان يطبق فلانة وفلانة تظبط فلان...تعلمنا كيف نستعمل الـ Photoshope لنطبق صور ما أنزل الله بها من سلطان...بعدين عن أي تقنيات عم نحكي إذا خط الـADSL بدك ميت سنة لتجيبو وبعد ميت واسطة وبوسة إيد؟؟ الناس وصلت عالقمر ونحن لسه عنا في قطع مي وكهرباء وأزمة غاز ومازوت؟؟



كل يلي تعلمناه من الأجانب هو هز الخصور والبطون، تعلمنا إنو حرية المرأة هي إنو البنت تلبس من غير هودوم وتصاحب ميت شب...صارت الحرية والتفتح يلي بقولولو Open Mind إنو الرجال يقعد جنب مرتو وبنتو وهي من جماعة كاسيات عاريات وعم يتفرج عليها ميت رجال وميت شب... قلدناهم بإننا كترنا الملاهي والكباريهات ويا ريتنا صرنا لاس فيغاس....



قلدناهم ببرامج الـ Real TV يلي عم تخرج كل يوم ميت رقاصة ورقاص وجيل كامل عقلو ملان تفاهة وكل همو يبعت رسائل على المحطات ويضيع وقتو ومصاريه لصالح شركات متل كوكاكولا وبيبسي...قلدناهم بالأغاني الهابطة وموجات التعري والشلح وبرامج الرقص والفقش والنط والهز...



تعلمنا شغل المافيات والعصابات وابتكرنا أساليب جديدة لتعزيز الفساد بالبلد...



يا ريتنا قلدنا جامعاتهم ومشافيهم وشركاتهم... نحن بس استنسخنا برامجهم الهابطة وكباريهاتهم...



شلحنا أواعينا ويا ريت عرفنا نلبس أواعيهم... إلا ضلينا عريانين وبردانين...



شلحنا النخوة والشهامة والكرم ومحبتنا لبعض.. شلحنا الغيرة على بعضنا كشعب عربي واحد ولبسنا الغيرة من بعض وكرهنا لبعض يلي كل مالو عم يفرقنا ويصغرنا بعيون حالنا وبعيون العالم.....



أخدنا القشور وتركنا المضمون.. فكرنا حالنا إننا إذا أكلنا همبرغر وشربنا بيبسي ولبسنا جينز ودخنا مالبورو بنصير متلهم... ولك مو كل مين لبست بنطلون صارت شارون ستون ولا كل مين أكل برغر صار أرنولد شواتزنغر...


لك يا ريتنا ما حاولنا نتعلم منهم شي وحافظنا على مبادئنا وعاداتنا وتقاليدنا الأصيلة والحلوة ويلي كانت تخلق معنا....


هاد يلي تعلمناه بـكــل أســـف من الأجانب والــغــرب...و لك آه يا وطــن...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~~~~~~

الـمــوضــوع مــقــتــبــس للـفــائـدة والــمــعــرفــة:angry2::angry2: