بــــلا مقابــــــــــله,,بــــلا مراوغــــــــــه,,بـــــلا مهاتــــرااات..

السلام عليكم..
يابنات والله ترى أقلقونا..
ودي أعرف وش الغرض من المقابله؟؟
يقولون عشان يتأكدون من شخصيتك,,ومن معلوماتك..
طيب من ناحية الشخصيه فهي أكيد قادره على تربية الاجيال القادمه لانها أم قبل لاتكون مدرسه..
مافيه وحده قبلت عمرها أقل من30 يعني معفنه بالبيت عندها مسؤليه تربيه وتنظيف وترتيب وحقوق زوج..
ومن ناحية المعلومات:فأكيد أن الزمن لعب فيها معلومات مغبره أكل عليها الزمن وشرب..
يعني متخرجه من13 سنه وفوق..وش تبونها تتذكر الوحده منا يالله تتذكر وش سويت وش ماسوت..
حتى المعلمه اللي تمارس التدريس تلاقونها تراجع الدرس عشان ترسخ المعلومه..
يعني وكلوا الله كل وحده بتحضر وبتعمل اللي عليها..
وفيه ملاحظه:قرأت في ردود بعض البنات يقولون المقابله شي روتيني سواء جاوبتي أو ماجاوبتي راح تترسمين..
أنا أقول من وجهة نظري الخاصه والمحدوده..ماأتوقع انه شي بسيط..
هذي أسمها (الخدعه المدنيه)يعني أسم على مسمى,,اسمها منها وفيها..
يعني مايهرولون عبث..يعني أنسوا أنهم يحطون شي عبث..
هم يحطون أشياء معقده وتصعيبيه..عشان يوقفون حجر عثره في طريقنا..
ومقصدهم من وراها التلاعب في الظلام,,وراء الستار,,وخلف الكواليس..
بحيث يشيلون عدد ويحطون اللي يبون..
أنا بسمع أذني وسوف اسأل يوم القيامه عن كل ماكتبت..
الملك أطال الله بعمره وأبقاه..في أجتماعه بالوزراء وبثوه في التلفاز نص كلامه:
أن السعوديين أمانه في ذمتي,,وأنا وضعتهم في ذمتكم..
لا أريد أن يأتيني أي سعودي يشتكي..
كيف ماعندهم طاعه لولي الأمر...
كأنهم بيدفعون لنا شي من جيبهم من دون مقابل..
ماكأن الشهاده ماخذينها من تعب وسهر الليالي..
عشان نوصل لمستوى تعليمي راقي..
وأختي تقول سمعته من فتره يقول:طالما أنكم تأكلون(الفلوس)يعني سرق ونهب..
أعطوهم وأكلوهم معكم..
عشان يسكتون ماهو تأكلون لحالكم..
مثـــال بسيـــط ليس بالبعيـــد:
حافز يخصم عن من يتغيب عن التحديث 200 ريال..ويستمر الخصم للاشهر القادمه..
حتى لو تمت المواضبه على الدخول..(أين العدل وأين الحق)اجرام عيني عينك..
لايخافون من الله ولا من خلقه..
المشكلــــه الاعظــــم فــي المسألــــه:
أشغلونا تعالي طابقي في منطقه,,وقابلي في منطقه,,وحنا من منطقه مختلفه,,والاهل في منطقه أخرى..
عقدونا,,حسبي الله ونعم الوكيل..
حنا رضينا بالوظيفه في أي مكان..نترك بيوت وأزواج وأولاد وأهل..نبي نعيش..
علينا ضغوط في الحياه والله نواجه صعوبات ماديه وجسديه ونفسيه..
وبالاخير ماهم راضيين يوظفونا..الى متى الاستبداد؟؟
يابنات اللي تعرف للفيس بوك أو تويتر تنقذنا..مليناااا
نبي نتكلم نبي صوتنا يكون مسموع وواضح ..نبيه يوصل لملكنا..
كلنا نعرف أنه رحوووم,,من كلامه ومن بساطته
نبي نقول شوف وش يسوون فينا,,أنقذنا من براثنهم ومن أيديهم اللي ماترحم..
صايرين مثل المنشار طالعين آكلين ونازلين آكلين..عذبونا..
ماكأننا نصف المجتمع,,ولا كأن الرسول أوصى فينا وبالرفق بنا..
قال الرسول الكريم:(رفقا بالقوارير)..
والله تكسرنا وتهشمنا يارسول الله..