راح ادخل في الموضوع على طول مثل ماهو واضح من العنوان نقص مقاسي من 16 الى 10 في شهر او اقل بس للأمانه انا اصلا جسمي وسط مايل للنحف اكثر بس بعد الولاده واخذ الفيتامينات زاد وزني واللي خلاني الاحظ لمن جا عندنا زواج واحد من اقاربي وجيت ابي اقيس الفساتين اللي عندي بس للاسف ما جات مقاسي
قلت بروح اشتري وتفاجأت انه مقاسي وصل ل16 بصراحه كانت صدمه لي قلت مافيها لازم انزل وزني
وسويت جدول والحمد لله نزل وزني وشد جسمي وكل من شافني اتفاجأ 
مني الله يسعدكم قولو ما شاء الله لاقوة الابالله العين حق ياجماعه 
وحبيت انكم تستفيدوا زي ما انا استفدت والاجسام مش وحده ممكن البعض ينزل بسرعه وممكن البعض بطيء وممكن البعض ما يضبط معها بس الله يسعدكم اللي ما يضبط معاها الموضوع لا تدعي علي لأني مش ناقصه دعاوينبدأ بسم الله
اول ماتصحي تفكي ريقك على ك ماء دافيء مع ليمونه وممكن اضافة امك عسل او ممكن تشربي شاي اخضر اللي حقولكم طريقته خصوصا اذا اكلتي بالليل ونمتي بس الافضل انك تنامي بعد ما تاكلي ب3ساعات
بعدين نجي للرياضه تمشي لمدة نص ساعه انا كنت امشي نص ساعه لحد ما جسمي تعود بعدين صرت اقسم الوقت بمعنى اني امشي 10د ثم اطلع الدرج وانزل لمدة2د وامشي 10د واطلع الدرج وانزل لمدة2د ثم امشي شويه واهرول في ال5د الاخيره حتحسوا بتعب وصعوبه في البدايه بس بعدين راح جسمكم يقوى ويتعود بعدين اعملوا رياضه خفيفه للمنطقه اللي تبغوا تنحفوها بعدين افطروا وكملوا باقي يومكم عادي كلوا اللي تبونه بس بكميات قليله وكل 3س عشان تعودوا المعده على الحركه وبالتالي تحرق دهون اكثر وكل وحده طبيبة نفسها الاكل اللي تشوفونه يتخنكم قد ماتقدروا ابعدوا عنه
طريقة الشاي:
تجيبي ترمس وتحطي فيه
1مك شاي اخضر مغربي او اللي تفضلوه
2مك شمر مطحون
جنزبيل اخضر او ناشف اللي تقدروا تتحملوه
وليمون تقطعوه شرايح بقشره
وممكن اضافة نعناع بعدين حطوا فوقه ماء مغلي وسيبوا مقدار كبايه
وفي كبايه لوحدها حطي 2مك بردقوش مع ماء مغلي وخليه ربع ساعه مو اكثر وصفيه في الترمس
واللي ضغتها ينخفض لا تحط بردقوش لانه يخفض الضغط واللي ماعندها ضغط عادي تشربه
وخلوه تقريبا ساعه ثم طول اليوم اشربوا منه خصوصا اذا اكلتوا اكل مشبوه
اتمنى انكم استفدتوا وما يكون صعب عليكم وتكون صدقه جاريه عني وعن اهلي وعن اموات المسلمين واي سؤال انا في الخدمه اخواتي العزيزات احبكم في الله
واتمنى انكم تدعولي ان الله يرضى عنا ويستخدمنا في طاعته ويرزقني الذريه الصالحه ويجمل خلقنا وخَلقنا ويحبنا ويحبب فينا خلقه ويحبب اهل زوجي فيني ويهدي اهلي ويصلحهم
معليش كثرت عليكم بس دعوة الاخ لاخيه الغائب مستجابه
واهم شي لا تنسوا ذكر الله
اللهم صلي وسلم على نبينا محمد